రూపాయి పతనం.. మన విద్యార్థులపై పెను భారం! విదేశాల్లో చదవాలంటే..?

డాలర్‌తో పోలిస్తే రూపాయి విలువ భారీగా పడిపోవడం భారతీయ కుటుంబాలపై ప్రత్యక్ష ప్రభావం చూపుతోంది. ముఖ్యంగా విదేశీ విద్య, విదేశీ విహారయాత్రలు లేదా అంతర్జాతీయ ఖర్చులకు ప్రణాళికలు వేసుకున్న వారికి ఇది పెద్ద ఆర్థిక భారంగా మారుతోంది. ఇటీవల రూపాయి విలువ డాలర్‌కు 96 మార్కును దాటడంతో, విదేశాల్లో చదువుకునే ఖర్చులు గణనీయంగా పెరిగాయి. నాలుగేళ్ల క్రితం డాలర్ మారకం విలువ రూ.78 వద్ద ఉండగా, ఇప్పుడు అది రూ.96కు చేరుకోవడం వల్ల విద్యార్థులు, వారి కుటుంబాలు అదనపు లక్షల రూపాయల భారాన్ని భరించాల్సి వస్తోంది.

విదేశీ మారక నిపుణుల ప్రకారం అమెరికాలో సంవత్సరానికి 40,000 డాలర్ల ఫీజు ఉన్న కోర్సుకు 2022లో సుమారు రూ.33 లక్షలు ఖర్చవుతుండగా, ఇప్పుడు అదే కోర్సుకు రూ.36 లక్షలకు పైగా ఖర్చవుతోంది. యూనివర్సిటీ ఫీజులు పెరగకపోయినా, కేవలం రూపాయి బలహీనత వల్లే ఈ అదనపు భారం ఏర్పడింది. యూకే, కెనడా వంటి దేశాల్లో అద్దె, భోజనం, రవాణా ఖర్చులు కూడా రూపాయల పరంగా మరింత పెరిగాయి. విద్యార్థులు ప్రతి నెలా రూ.8,000 నుంచి రూ.18,000 వరకు అదనపు ఖర్చు చేయాల్సి వస్తోందని నిపుణులు చెబుతున్నారు.

జ్ఞాన్‌ధాన్ విశ్లేషణ ప్రకారం విదేశీ విద్య కోసం తీసుకునే విద్యా రుణాల పరిమాణం గత నాలుగేళ్లలో భారీగా పెరిగింది. అమెరికా కోసం తీసుకునే సగటు విద్యా రుణం రూ.35 లక్షల నుంచి రూ.66 లక్షలకు చేరింది. యూకే కోసం రూ.20 లక్షల నుంచి రూ.35 లక్షలకు పెరిగింది. ఆస్ట్రేలియా, కెనడా, జర్మనీ వంటి దేశాల్లో కూడా రుణ అవసరాలు గణనీయంగా పెరిగాయి.

ఇదిలా ఉండగా విద్యార్థుల ప్రాధాన్యతలు కూడా మారుతున్నాయి. ఒకప్పుడు అమెరికా, కెనడా ప్రధాన ఎంపికలుగా ఉండగా, ఇప్పుడు తక్కువ ఖర్చుతో కూడిన జర్మనీ, ఐర్లాండ్ వంటి దేశాలపై ఆసక్తి పెరుగుతోంది. వీసా నిబంధనల మార్పులు, ఉద్యోగ అవకాశాల అనిశ్చితి, పెరుగుతున్న ట్యూషన్ ఫీజులు కూడా ఈ మార్పుకు కారణమవుతున్నాయి. నిపుణుల అభిప్రాయం ప్రకారం విదేశీ విద్య ఇప్పటికీ మంచి అవకాశాలను అందిస్తున్నప్పటికీ, పెట్టుబడిపై లాభం ఖాయం అనే పరిస్థితి ఇక లేదు. అందువల్ల విద్యార్థులు కోర్సు ఎంపిక, దేశం, ఖర్చులు, ఉద్యోగ అవకాశాలపై ముందుగానే పూర్తి ప్రణాళికతో ముందుకు వెళ్లాలని సూచిస్తున్నారు.

మరిన్ని బిజినెస్‌ వార్తల కోసం ఇక్కడ క్లిక్‌ చేయండి