టూత్ బ్రష్‌లో 4 రకాలు ఉంటాయని తెలుసా? ఎవరు ఏది వాడాలంటే..?

ప్రతి రోజు ఉపయోగించే టూత్ బ్రష్‌ను చాలా మంది కేవలం ధర లేదా బ్రాండ్‌ను చూసి కొనుగోలు చేస్తుంటారు. కానీ టూత్ బ్రష్‌లోని బ్రిసిల్స్ (ముళ్లు) గట్టితనం కూడా దంతాల ఆరోగ్యంపై కీలక ప్రభావం చూపుతుంది. అందుకే మార్కెట్‌లో ఎక్స్‌ట్రా సాఫ్ట్, సాఫ్ట్, మీడియం, హార్డ్ అనే నాలుగు రకాల టూత్ బ్రష్‌లు అందుబాటులో ఉంటాయి. ప్రతి రకం ఒక ప్రత్యేక అవసరం కోసం రూపొందించారు.

ఎక్స్‌ట్రా సాఫ్ట్ బ్రష్ ఎవరికోసం?

ఎక్స్‌ట్రా సాఫ్ట్ బ్రష్‌లోని బ్రిసిల్స్ చాలా మెత్తగా ఉంటాయి. చిగుళ్ల నుంచి రక్తం వచ్చే వారు, దంతాలపై సెన్సిటివిటీ ఎక్కువగా ఉన్నవారు, నోటి శస్త్రచికిత్స లేదా దంత చికిత్స చేయించుకున్నవారికి ఇవి అనుకూలంగా ఉంటాయి. ఈ బ్రష్‌లు చిగుళ్లపై ఒత్తిడి తగ్గించి, సున్నితమైన భాగాలను రక్షించడంలో సహాయపడతాయి.

సాఫ్ట్ బ్రష్ అత్యంత సాధారణ ఎంపిక

దంతవైద్యులు ఎక్కువగా సిఫార్సు చేసేది సాఫ్ట్ టూత్ బ్రష్. సాధారణంగా ఆరోగ్యకరమైన దంతాలు, చిగుళ్లు ఉన్న చాలా మందికి ఇది సరిపోతుంది. ఇది పళ్లపై ఉండే ప్లాక్‌ను సమర్థంగా తొలగిస్తూనే చిగుళ్లకు హాని కలిగించకుండా శుభ్రం చేస్తుంది. సరైన పద్ధతిలో బ్రష్ చేస్తే దంతాలను దీర్ఘకాలం ఆరోగ్యంగా ఉంచడంలో సహాయపడుతుంది.

మీడియం బ్రష్ ఎప్పుడు వాడాలి?

మీడియం బ్రష్‌లోని బ్రిసిల్స్ కొంచెం గట్టిగా ఉంటాయి. పళ్లపై ఎక్కువగా మరకలు ఏర్పడే వారు లేదా టీ, కాఫీ ఎక్కువగా తాగే వారు కొన్నిసార్లు దీనిని ఉపయోగిస్తారు. అయితే ఎక్కువ ఒత్తిడితో బ్రష్ చేస్తే చిగుళ్లు దెబ్బతినే ప్రమాదం ఉంటుంది. అందుకే దంతవైద్యుల సలహాతో మాత్రమే ఉపయోగించడం మంచిది.

హార్డ్ బ్రష్ అందరికీ కాదు

హార్డ్ టూత్ బ్రష్‌లోని బ్రిసిల్స్ చాలా గట్టిగా ఉంటాయి. ఇది సాధారణ వినియోగానికి దాదాపు పనికిరాదు. ప్రత్యేక పరిస్థితుల్లో మాత్రమే కొంతమంది దంతవైద్యులు సూచించవచ్చు. రోజూ హార్డ్ బ్రష్ వాడటం వల్ల పళ్లపై ఉండే రక్షణ పొర (ఎనామెల్) అరిగిపోవడం, చిగుళ్లు వెనక్కి తగ్గడం వంటి సమస్యలు తలెత్తే అవకాశం ఉంది.

చిన్న పిల్లల దంతాలు, చిగుళ్లు చాలా సున్నితంగా ఉంటాయి. అలాంటి వారు హార్డ్ బ్రష్ ఉపయోగిస్తే చిగుళ్లకు గాయాలు కావడం, రక్తస్రావం, నొప్పి, పళ్లపై ఉన్న ఎనామెల్ దెబ్బతినడం వంటి సమస్యలు రావచ్చు. అలాగే దంతాల్లో సెన్సిటివిటీ ఉన్నవారు హార్డ్ బ్రష్ వాడితే చల్లటి, వేడి ఆహారం తినేటప్పుడు నొప్పి మరింత పెరిగే అవకాశం ఉంటుంది. చిగుళ్లు క్రమంగా వెనక్కి తగ్గి దంతాల వేర్లు బయటపడే ప్రమాదం కూడా ఉంటుంది.

సరైన బ్రష్ ఎంపిక కీలకం

దంత నిపుణుల అభిప్రాయం ప్రకారం.. సాఫ్ట్ బ్రిసిల్ టూత్ బ్రష్ వాడటం ఉత్తమం. ఇది దాదాపు ఎక్కువ మందికి సరిపోతుంది. అలాగే ప్రతి మూడు నెలలకు ఒకసారి లేదా బ్రిసిల్స్ వంగిపోతే వెంటనే బ్రష్ మార్చుకోవాలి. సరైన టూత్ బ్రష్‌తో పాటు, రోజుకు రెండుసార్లు సరైన పద్ధతిలో బ్రష్ చేయడం దంత ఆరోగ్యానికి మంచిది.