EPFO: పీఎఫ్ అకౌంట్ ఉన్నవారు ఈ ఒక్క పనిచేయకపోతే డబ్బులు పొందలేరు.. భవిష్యత్తులో ఇబ్బందే..

ఈపీఎఫ్‌వో ఖాతాదారులకు అలర్ట్. ఈ-నామినేషన్ ప్రక్రియను కేంద్రం తప్పనిసరి చేసింది. లేకపోతే పీఎఫ్ క్లెయిమ్ పొందటంలో ఇబ్బందులు తలెత్తే అవకాశముంటుంది. మీ కుటుంబసభ్యులు మీ అమౌంట్‌ను క్లెయిమ్ చేసుకోవడంలో ఇబ్బంది పడాల్సి ఉంటుంది. మీరు ఆన్‌లైన్ ద్వారా సులువుగా నామినేషన్ ప్రక్రియ అనేది పూర్తి చేయవచ్చు.

Epfo

Venkatrao Lella |
Updated on: Jun 13, 2026 | 5:22 PM

పీఎఫ్ అకౌంట్ కలిగి ఉన్నవారు కొన్ని పనులు తప్పనిసరిగా చేయాల్సి ఉంటుంది. ఈ మేరకు కేంద్ర ప్రభుత్వం కొన్నింటిని తప్పనిసరి చేసింది. అందులో ఒకటి ఈ-నామినేషన్. గతంలో నామినేషన్ తప్పనిసరి అనే నిబంధన లేదు. కానీ ఇప్పుడు ఖచ్చితంగా నామినీ వివరాలను పొందుపర్చాలి. లేకపోతే మీరు ఆన్‌లైన్‌లో పీఎఫ్ సేవలు పొందలేరు. చాలామంది నామినీని నమోదు చేయడాన్ని నిర్లక్ష్యంగా తీసుకుంటారు. కానీ ఇప్పుడు కేంద్ర ప్రభుత్వం తప్పనిసరి చేయడంతో ఖచ్చితంగా అందరూ చేసుకోవాల్సి వస్తోంది. ఆన్‌లైన్‌లో మీరు సులువుగా నామినీ వివరాలను అప్డేట్ చేయవచ్చు. అదెలా అనేది ఇప్పుడు చూద్దాం.

నామినీ అవసరం ఎందుకు..?

పీఎఫ్ ఖాతాదారుడికి ప్రమాదవశాత్తూ ఏదైనా జరిగి మరణిస్తే.. కుటుంబసభ్యులకు నిధులు అందుతాయి. పీఎఫ్ అకౌంట్లోని నగదును నామినికి అందిస్తారు. అలాగే రూ.7 లక్షల జీవిత బీమా కూడా ఈపీఎఫ్‌వో అందిస్తోంది. ఉద్యోగంలో ఉన్నప్పుడు మరణిస్తే రూ.7 లక్షలను నామినీకి అందిస్తారు. దీంతో నామినీ వివరాలను ఈపీఎఫ్‌వోకు అందించాల్సి ఉంటుంది. ఒకవేళ నామినీ వివరాలు అందించకపోతే మీ పీఎఫ్ అకౌంట్లోని నగదును కుటుంబసభ్యులు క్లెయిమ్ చేసుకోవడంలో ఇబ్బందులు ఎదురవుతాయి. ఈపీఎఫ్‌వో కార్యాలయాల చుట్టూ తిరగాల్సి ఉంటుంది. అదే ముందుగానే నామినీ వివరాలను ఆన్‌లైన్‌లో అందించడం వల్ల కార్యాలయాల చుట్టూ తిరగాల్సిన అవసరం ఉండదు. ఎలాంటి డాక్యుమెంట్స్ సమర్పించకుండానే ఆన్‌లైన్‌లో నామినేషన్ ప్రక్రియ పూర్తి చేయవచ్చు.