Gas Cylinder: ఇంట్లోని సిలిండర్లో గ్యాస్ ఎంత ఉందో సులభంగా తెలుసుకోవడం ఎలా.? సింపుల్ చిట్కాలు
ప్రస్తుతం దేశంలో నెలకొన్న పరిస్థితులు దృష్ట్యా గ్యాస్ చాలా జాగ్రత్తగా వాడుకోవాలి. మరి అసలు ఇంట్లో గ్యాస్ సిలిండర్లో ఎంత గ్యాస్ మిగిలి ఉందో సులభంగా తెలుసుకోవడం ఎలాగో ఇప్పుడు తెలుసుకోండి. వంట మధ్యలో గ్యాస్ అయిపోతుందన్న ఆందోళన లేకుండా చేసుకోవచ్చు.
Updated on: Mar 26, 2026 | 5:35 PM
మిడిల్ ఈస్ట్లో నెలకొన్న వార్ దృష్ట్యా ప్రస్తుతం దేశంలో గ్యాస్ సంక్షోభం నడుస్తోంది. ఇలాంటప్పుడు గ్యాస్ మధ్యలోనే అయిపోతే.. వంటగదిలో గ్యాస్ అయిపోతుందనే ఆందోళన ప్రతి ఒక్కరిలో ఉంటుంది. వంట మధ్యలో గ్యాస్ అయిపోతే ఇబ్బందులు తప్పవు. మీ ఇంట్లో ఉన్న గ్యాస్ సిలిండర్లో ఎంత గ్యాస్ మిగిలి ఉందో సులభంగా తెలుసుకోవడానికి కొన్ని సాధారణ చిట్కాలు ఉన్నాయి. వీటిని పాటించడం ద్వారా గ్యాస్ స్థాయిని ముందే అంచనా వేసి.. మీరు అనుకున్న సమయం కంటే ముందుగానే గ్యాస్ బుక్ చేసుకోవచ్చు.
ఆ పద్దతులు ఇవే..
మొదటి పద్ధతి.. తడి గుడ్డతో గ్యాస్ స్థాయిని తెలుసుకోవడం. దీనికోసం ఒక తడి గుడ్డను తీసుకొని, గ్యాస్ సిలిండర్కు పైనుంచి కింద వరకు తుడవండి. గ్యాస్ లేని ప్రాంతంలో తడి త్వరగా ఆరిపోతుంది. గ్యాస్ ఉన్న ప్రాంతంలో మాత్రం తడి అలానే ఉంటుంది. ఈ వ్యత్యాసాన్ని గమనించడం ద్వారా గ్యాస్ ఏ స్థాయి వరకు ఉందో సులభంగా గుర్తించవచ్చు.
రెండో పద్ధతి.. సిలిండర్ను చేతితో పట్టుకుని అంచనా వేయడం. గ్యాస్ ఉన్న ప్రాంతం చల్లగా అనిపిస్తుంది, ఖాళీగా ఉన్న ప్రాంతం సాధారణ ఉష్ణోగ్రతలో ఉంటుంది. ఈ తేడాను గుర్తించడం ద్వారా గ్యాస్ స్థాయిని అంచనా వేయవచ్చు.
మూడవ పద్ధతి.. గ్యాస్ మంట రంగును బట్టి అంచనా వేయడం. సాధారణంగా, పూర్తి స్థాయిలో గ్యాస్ ఉన్నప్పుడు మంట నీలి రంగులో ఉంటుంది. గ్యాస్ స్థాయి తగ్గుతున్నప్పుడు మంట రంగు కొద్దిగా పసుపు లేదా నారింజ రంగులోకి మారవచ్చు. మంట రంగులో మార్పులను గమనించడం ద్వారా కూడా గ్యాస్ ఎంత మిగిలి ఉందో అంచనా వేయవచ్చు. ఈ సులభమైన చిట్కాలను పాటించి, మీ గ్యాస్ సిలిండర్ను సమర్థవంతంగా ఉపయోగించుకోవచ్చు. వంట మధ్యలో గ్యాస్ అయిపోతుందనే టెన్షన్ లేకుండా ఉండవచ్చు.
