ఆధార్ కార్డులో ఫొటో ఎన్ని సార్లు అప్డేట్ చేసుకోవచ్చు? ఫ్రీనా.. డబ్బులు కట్టాలా?
ఆధార్ కార్డులో ఫోటో నచ్చలేదా? అయితే దాన్ని మార్చుకునే అవకాశం ఉంది. ఫోటో అప్డేట్ను ఆన్లైన్లో చేయలేరు. సమీప ఆధార్ సేవా కేంద్రానికి వెళ్లి అప్డేట్ ఫారమ్, బయోమెట్రిక్ వెరిఫికేషన్ పూర్తి చేయాలి. అక్కడే కొత్త ఫోటో తీస్తారు. దీనికి నిర్ణయించిన రుసుము చెల్లించాలి.
Updated on: Aug 22, 2026 | 8:57 PM
ఆధార్ కార్డు ప్రస్తుతం మన జీవితంలో అత్యంత ముఖ్యమైన గుర్తింపు పత్రాల్లో ఒకటిగా మారింది. బ్యాంకింగ్ సేవలు, ప్రభుత్వ పథకాలు, మొబైల్ సిమ్, రైలు ప్రయాణం, విద్యా సంబంధిత అవసరాలు ఇలా అనేక సందర్భాల్లో ఆధార్ను గుర్తింపు, చిరునామా ధ్రువీకరణ కోసం ఉపయోగిస్తున్నారు. అయితే చాలామంది ఆధార్ తీసుకునే సమయంలో ఫోటోపై పెద్దగా దృష్టి పెట్టరు. కానీ వయసు పెరుగుతున్న కొద్ది ఆధార్లోని ఫొటోను అప్డేట్ చేసుకోవాల్సి ఉంటుంది.
అయితే ఆధార్లో ఫోటోను మార్చుకోవచ్చా? ఇప్పటికే ఒకసారి మార్చుకున్న తర్వాత మళ్లీ మార్చుకోవచ్చా? అనే సందేహాలు చాలామందికి ఉంటాయి. ఆధార్లో ఫోటో మార్పుపై ప్రత్యేకంగా నిర్ణీత సంఖ్యలో పరిమితి లేదని సమాచారం. అవసరమైతే ఆధార్లో ఫోటోను అప్డేట్ చేసుకునే అవకాశం ఉంది. అయితే ఇందుకోసం తప్పనిసరిగా ఆధార్ సేవా కేంద్రాన్ని సందర్శించాల్సి ఉంటుంది.
ఆన్లైన్లో ఫోటో మార్చుకోవచ్చా?
ఆధార్ ఫోటోను ఇంటి నుంచే ఆన్లైన్లో మార్చుకునే సదుపాయం లేదు. ఇందుకోసం సమీపంలోని ఆధార్ సేవా కేంద్రం లేదా ఆధార్ నమోదు, అప్డేట్ కేంద్రానికి వెళ్లాలి. అక్కడ ఆధార్ అప్డేట్ ఫారమ్ను సమర్పించి, అవసరమైన ధ్రువీకరణ ప్రక్రియను పూర్తి చేయాలి. అనంతరం కేంద్రంలోనే కెమెరా ద్వారా కొత్త ఫోటో తీస్తారు. ఆధార్లో ఫోటో అప్డేట్ చేయడానికి బయోమెట్రిక్ వెరిఫికేషన్ కూడా నిర్వహిస్తారు. కొత్త ఫోటో తీసిన తర్వాత అప్డేట్ అభ్యర్థనను ప్రాసెస్ చేస్తారు. ప్రక్రియ పూర్తయిన తర్వాత ఆధార్ వివరాల్లో కొత్త ఫోటో నమోదవుతుంది. ఆ తర్వాత అప్డేట్ అయిన ఈ-ఆధార్ను డౌన్లోడ్ చేసుకోవచ్చు.
ఎంత రుసుము చెల్లించాలి?
ఆధార్లో ఫోటో వంటి బయోమెట్రిక్ వివరాలను అప్డేట్ చేయడం ఉచితం కాదు. ఇందుకు UIDAI నిర్ణయించిన అప్డేట్ ఛార్జీ వర్తిస్తుంది. ప్రస్తుతం బయోమెట్రిక్ అప్డేట్కు రూ.125 వరకు ఛార్జి వర్తించవచ్చు. అయితే సేవా కేంద్రానికి వెళ్లే ముందు UIDAI అధికారిక ఛార్జీలను ఒకసారి పరిశీలించడం మంచిది. ముఖ్యంగా ఫోటో మార్చుకోవడానికి మధ్యలో తప్పనిసరిగా నిర్దిష్ట సంవత్సరాల గడువు ఉండాల్సిందేనని భావించాల్సిన అవసరం లేదు. అవసరం ఉన్నప్పుడు నియమాల ప్రకారం అప్డేట్ చేసుకోవచ్చు. ఆధార్ ఫోటోతో పాటు పేరు, చిరునామా, మొబైల్ నంబర్ వంటి వివరాల్లో మార్పులు ఉంటే వాటికి సంబంధించిన ప్రత్యేక నిబంధనలు, రుసుములు వర్తిస్తాయని గుర్తుంచుకోవాలి.
మరిన్ని బిజినెస్ వార్తల కోసం ఇక్కడ క్లిక్ చేయండి
