Ugadi 2026: శ్రీ పరాభవ నామ సంవత్సర ఉగాది ఫలితాలు.. మిథున రాశి వారికి ఎలా ఉందంటే..?
Ugadi 2026 Panchangam Mithuna Rashi Phalalu: దశమస్థానంలో శని, భాగ్యస్థానంలో రాహువు, జూన్ నుంచి ధనస్థానంలో గురువు ప్రభావంతో మిథున రాశి వారికి సంవత్సరం మొత్తంగా అనుకూల ఫలితాలు లభించే సూచనలు ఉన్నాయి. వృత్తి, ఉద్యోగ, వ్యాపారాల్లో పురోగతి కనిపించి, అనుకూల పరిస్థితులు పెరుగుతాయి. ఆర్థికంగా ఆదాయం సంతృప్తికరంగా ఉన్నప్పటికీ, అనవసర ఖర్చులు పెరగడం వల్ల ఒత్తిడి కలగవచ్చు. ముఖ్యమైన పనులు సఫలం అవుతాయి. ఉద్యోగ, వ్యాపారాల్లో పనిభారం పెరిగినా ఫలితం దక్కుతుంది.
మిథునం (మృగశిర 3,4, ఆర్ద్ర, పునర్వసు 1,2,3): శ్రీ పరాభవ నామ సంవత్సర ఉగాది ఫలితాలు..
ఆదాయం-8, వ్యయం-11 | రాజపూజ్యం-1, అవమానం-7
ఈ ఏడాదంతా దశమ స్థానంలో శని, భాగ్య స్థానంలో రాహువు, ధన స్థానంలో జూన్ నుంచి గురువు సంచారం వల్ల ఈ రాశివారికి ఉత్తమ ఫలితాలు అనుభవానికి వచ్చే అవకాశముంది. వృత్తి, ఉద్యోగ, వ్యాపారాలు నల్లేరు మీదబండిలా సాగిపోతాయి. ఇంటా బయటా అనుకూలతలు బాగా పెరుగుతాయి.
ఆర్థిక వ్యవహారాలుః దశమ శని, భాగ్య రాహువు, ద్వితీయ గురువు కారణంగా ఆర్థిక పరిస్థితి లోటుండదు. ఆదాయం పెరుగుతూనే ఉంటుంది. కొన్ని ముఖ్యమైన వ్యవహారాలు, ప్రయత్నాలు సానుకూల ఫలితాలను ఇస్తాయి. వ్యక్తిగత సమస్యలు పరిష్కారం అవుతాయి. ఆదాయం బాగానే ఉంటుంది కానీ, అనవసర ఖర్చులతో ఇబ్బంది పడతారు.
వృత్తి, ఉద్యోగాలుః వృత్తి, ఉద్యోగ, వ్యాపారాల్లో పనిభారం బాగా పెరిగినప్పటికీ ప్రతిఫలం ఉండే అవకాశముంది. పిల్లల చదువుల పట్ల శ్రద్ధ చూపించాల్సిన అవసరం ఉంటుంది. వృత్తి, ఉద్యోగాలలో జీవిత భాగస్వామికి మంచి గుర్తింపు లభిస్తుంది. నిరుద్యోగులకు విదేశాల నుంచి కూడా ఆశించిన సమాచారం అందుతుంది. దైవ కార్యాలకు ఆర్థికంగా సహాయపడతారు.
కుటుంబ వ్యవహారాలుః స్నేహితుల సహాయంతో కీలకమైన పనులను పూర్తి చేస్తారు. ప్రయాణాల వల్ల లాభం ఉంటుంది. ఆహార, విహారాల్లో వీలైనంత జాగ్రత్తగా ఉండడం మంచిది. కుటుంబ సమస్యలు పరిష్కారమవుతాయి. కుటుంబ విషయాల్లో బంధువుల జోక్యం పెరిగే అవకాశం ఉంది. ఇంట్లో శుభ కార్యాలు జరుగుతాయి. సంతాన యోగానికి అవకాశం ఉంది.