ఆడియోను కట్ చేసి పెట్టారు..లోకేశ్ విజ్ఞతకే వదిలేస్తున్నా

తాను ఓ జర్నలిస్టును చంపేస్తానంటూ బెదిరించినట్టు టీడీపీ నాయకుడు నారా లోకేశ్ ట్విట్ చేసిన ఆడియోపై నెల్లూరు రూరల్ వైసీపీ ఎమ్మెల్యే కోటంరెడ్డి శ్రీధర్ రెడ్డి స్పందించారు. నెల్లూరు జిల్లాలో జర్నలిజం ముసుగులో అక్రమాలకు పాల్పడుతున్న ప్రసాద్ అనే వ్యక్తితో తాను మాట్లాడిన మాటలను అక్కడక్కడ కట్ చేసి ఆడియో రిలీజ్ చేశారని శ్రీధర్ రెడ్డి విమర్శించారు. ఎన్నికలకు ముందు తమ కుటుంబంపై సదరు వ్యక్తి దుష్ప్రచారం చేయడం వల్లే… తాను ఇలా చేశానని వివరించారు. గతంలో ఇలాగే చంద్రబాబు కుటుంబంపై వార్తలు రాసిన ఓ విలేఖరిని ఆయనే హత్య చేయించారనే ప్రచారం ఉందని శ్రీధర్ రెడ్డి ఆరోపించారు.

ఇలాంటి వాటిని ప్రచారం చేయడాన్ని లోకేశ్ విజ్ఞతకే వదిలేస్తున్నానని ఎమ్మెల్యే శ్రీధర్ రెడ్డి వ్యాఖ్యానించారు. నారా లోకేశ్ ఇలాంటి వాటిపై దృష్టి పెట్టడానికి బదులుగా ప్రజల్లో తిరిగి మంచి ప్రతిపక్షంగా ఉండాలని సూచించారు. అంతకుముందు కోటంరెడ్డి శ్రీధర్ రెడ్డి విలేకరిని బెదిరించారంటూ నారా లోకేశ్ ట్విట్టర్‌లో ఆడియోను పోస్ట్ చేయడం రాజకీయవర్గాల్లో చర్చనీయాంశంగా మారింది.