CM Chandrababu: భవిష్యత్తు అమరావతికి తొలి అడుగు.. అమరావతిలో సీఎం చంద్రబాబు సొంత ఇల్లు..!
ఈ ఇల్లు కేవలం చంద్రబాబుకే కాదు, అమరావతికి, ఆంధ్రప్రదేశ్ భవిష్యత్తుకి ఒక చిహ్నంగా నిలవనుంది. ఈ ఇంటి నిర్మాణం రాజధానిలో అభివృద్ధి శక్తివంతంగా కొనసాగనున్నదని తెలియజేసే సాక్ష్యంగా నిలవనున్నట్లు తెలుస్తోంది.
ఆంధ్రప్రదేశ్ రాజధానిగా అమరావతిని ఎంపిక చేసిన తర్వాత ముఖ్యమంత్రి చంద్రబాబు నాయుడు ఎన్నో సవాళ్లు ఎదుర్కొన్నారు. రాజధాని నిర్మాణంలో జాప్యం, రాజకీయ విమర్శలు, ఆర్థిక సమస్యలు మొదలైన వాటి మధ్య ఆయన రాజధాని అభివృద్ధి కోసం కొనసాగించిన కృషి ప్రశంసలకు పాత్రమైంది. అదే సమయంలో రాజధానిలో చంద్రబాబుకు సొంత ఇల్లు లేదన్న విమర్శ తరచూ గట్టిగా వినిపిస్తూ వచ్చేది. ఈ విమర్శలకు సీఎం చంద్రబాబు ఇప్పుడు చెక్ పెట్టారు.
త్వరలో సీఎం చంద్రబాబు ఇంటి చిరునామా మారబోతోంది. గత పదేళ్లుగా లింగమేనని అతిథిగృహంలో ఉంటున్న చంద్రబాబు అమరావతిలో సొంత ఇంటి నిర్మాణ పనులకు శ్రీకారం చుట్టారు. ఇందులో భాగంగా అమరావతి పరిధిలోని వెలగపూడి రెవెన్యూ పరిధిలో E-6 రోడ్డుకు ఆనుకుని, 25,000 చదరపు గజాల ( సుమారు 5 ఎకరాల) స్థలాన్ని కొనుగోలు చేశారు. ఇది రిటర్నబుల్ ప్లాట్ల కింద ఒకే కుటుంబానికి చెందిన ముగ్గురు రైతుల నుంచి తీసుకున్నది. రైతులకు ఇప్పటికే ఆ స్థల ఖరీదు చెల్లింపులు కూడా పూర్తయినట్లు తెలుస్తోంది.
అత్యంత ప్రాధాన్యత గల ప్రాంతంలో సీఎం నివాసం
ప్రతిపాదిత రాజధాని అమరావతిలో ఇటువంటి స్థలం చాలా అరుదుగా దొరికే అవకాశం ఉంటుంది. సీఎం చంద్రబాబు కొనుగోలు చేసిన ఈ స్థలం నాలుగు వైపులా రోడ్లు కలిగి ఉంది. ఇది రాజధాని అభివృద్ధి కోసం ఏర్పాటు చేస్తున్న సీడ్ యాక్సెస్ రోడ్‌కు సమీపంలో ఉంటుంది. ఈ స్థలానికి చుట్టుపక్కల గెజిటెడ్ అధికారుల నివాసాలు, ఎన్జీవో కాంప్లెక్స్, జడ్జిల ఇళ్ల సముదాయం, తాత్కాలిక హైకోర్టు, విట్, అమరావతి గవర్నమెంట్ కాంప్లెక్స్ వంటి కీలక భవనాలు ఉన్నాయి. అంతే కాకుండా, ఈ ప్రాంతం రాబోయే రోజుల్లో రాజధానిలో అత్యంత ప్రాధాన్యత గల ప్రాంతంగా మారే అవకాశం ఉంది.
ప్లాన్: 5 ఎకరాల్లో ప్రణాళిక
ముఖ్యమంత్రి చంద్రబాబు ఈ 5 ఎకరాల స్థలంలో ఒక భాగంలో తన సొంత నివాసం నిర్మించనున్నారు. ఇది ఆయన వ్యక్తిగత అవసరాలకే కాకుండా, అధికారిక కార్యక్రమాలకు కూడా ఉపయోగపడేలా రూపొందించనున్నారు. మిగిలిన స్థలాన్ని గార్డెనింగ్, సెక్యూరిటీ సిబ్బందికి గదులు, వాహనాల పార్కింగ్0 వంటి అవసరాల కోసం వినియోగించనున్నట్లు సమాచారం. ప్రస్తుతం ఈ స్థలంలో మట్టి పరీక్షలు జరుగుతున్నాయి. నిర్మాణం కోసం పటిష్టమైన ప్రణాళికలు సిద్ధం చేస్తుండగా, త్వరలోనే నిర్మాణ పనులు ప్రారంభమయ్యే అవకాశం ఉంది.
విమర్శలకు ముగింపు
అమరావతిలో నివాసం లేదని చంద్రబాబుపై వచ్చిన విమర్శలు ఈ నిర్ణయంతో ముగియనున్నాయి. రాజధాని ప్రాంత ప్రజలతో ఉన్న అనుబంధాన్ని మరింత బలపరచడమే కాకుండా, రాజధాని అభివృద్ధి పట్ల ఉన్న ముఖ్యమంత్రికి ఉన్న అంకితభావాన్ని ఈ నిర్ణయం స్పష్టం చేయనుంది. చంద్రబాబు నాయుడు అమరావతిలో ఇల్లు నిర్మించుకోవడం కేవలం ఒక వ్యక్తిగత నిర్ణయం మాత్రమే కాదు. ఇది ఆయన రాజధాని పునర్నిర్మాణంపై చూపుతున్న దృక్పథానికి ప్రతీక కానుంది. ఈ నిర్ణయం అమరావతిని మరింత అభివృద్ధి చేయడానికి ఆయన కృషిని ప్రతిఫలం చేయనుంది. ఈ నిర్ణయం ద్వారా అమరావతిలోని ప్రజలకు ఆయనపై ఉన్న నమ్మకాన్ని రెట్టింపు చేసారనడంలో ఎలాంటి సందేహం లేదు.
చివరగా, ఈ ఇల్లు కేవలం చంద్రబాబుకే కాదు, అమరావతికి, ఆంధ్రప్రదేశ్ భవిష్యత్తుకి ఒక చిహ్నంగా నిలవనుంది. ఈ ఇంటి నిర్మాణం రాజధానిలో అభివృద్ధి శక్తివంతంగా కొనసాగనున్నదని తెలియజేసే సాక్ష్యంగా నిలవనున్నట్లు తెలుస్తోంది. ఇక అమరావతి భవిష్యత్తు మరింత ప్రకాశవంతమవుతుందని చెప్పడంలో సందేహమే లేదు.
మరిన్ని ఆంధ్రప్రదేశ్ వార్తల కోసం ఇక్కడ క్లిక్ చేయండి..