Andhra Pradesh: ఏపీలో మళ్లీ వర్షాలు.. వచ్చే 3 రోజులు ఎక్కడెక్కడ పడతాయో తెలుసుకోండి..

ఆంధ్రప్రదేశ్, యానాం పరిసర ప్రాంతాల్లో రాగల మూడు రోజుల పాటు తేలికపాటి నుంచి మోస్తరు వర్షాలు కురిసే అవకాశం ఉందని భారత వాతావరణ శాఖ వెల్లడించింది. వర్షంతో పాటు ఉరుములు, మెరుపులు, గంటకు 30 నుంచి 40 కిలోమీటర్ల వేగంతో బలమైన ఈదురుగాలులు వీచే అవకాశం ఉందని అధికారులు తెలిపారు. మన్నార్ గల్ఫ్, దక్షిణ తీర తమిళనాడు ప్రాంతాల మీదుగా ఉన్న ఉపరితల ఆవర్తనం నుంచి ఉత్తర అంతర్గత తమిళనాడు, ఉత్తర కేరళ మీదుగా తూర్పు మధ్య అరేబియా సముద్రం వరకు సముద్ర మట్టానికి 0.9 కి.మీ ఎత్తులో ద్రోణి విస్తరించి ఉంది. దక్షిణ అంతర్గత కర్ణాటక పరిసరాల్లో ఉన్న మరో ఉపరితల ఆవర్తనం ఈ ద్రోణిలో విలీనమైంది. దక్షిణ కోస్తాంధ్ర పరిసరాల్లో నిన్నటివరకు కొనసాగిన ఉపరితల ఆవర్తనం బలహీనపడింది. ప్రస్తుతం దిగువ ట్రోపో ఆవరణంలో ఆగ్నేయ, నైరుతి దిశల నుంచి గాలులు వీస్తున్నాయి.

ప్రాంతాల వారీగా వాతావరణ వివరాలు

కోస్తాంధ్ర – యానాం

ఆదివారం అక్కడక్కడా తేలికపాటి నుంచి మోస్తరు వర్షాలు లేదా ఉరుములతో కూడిన జల్లులు పడే అవకాశం ఉంది. సోమవారం కొన్ని ప్రాంతాల్లో తేలికపాటి నుంచి మోస్తరు వర్షాలు కురిసే సూచనలు ఉన్నాయి. మంగళవారం ఒకటి లేదా రెండు చోట్ల తేలికపాటి నుంచి మోస్తరు జల్లులు కురవవచ్చు. ఈ మూడు రోజుల్లో ఒకటి లేదా రెండు చోట్ల ఉరుములు, మెరుపులతో పాటు 30-40 కి.మీ వేగంతో బలమైన గాలులు వీస్తాయి.

రాయలసీమ

రాగల మూడు రోజుల పాటు పలుచోట్ల తేలికపాటి నుంచి మోస్తరు వర్షాలు లేదా ఉరుములతో కూడిన జల్లులు కురిసే అవకాశం ఉంది. ఒకటి లేదా రెండు ప్రాంతాల్లో ఉరుములు, మెరుపులు సంభవించవచ్చని, గంటకు 30-40 కిలోమీటర్ల వేగంతో ఈదురుగాలులు వీచే అవకాశముందని వాతావరణ శాఖ తెలిపింది. ఉరుములు, మెరుపులు, ఈదురుగాలులు వీచే సమయంలో ప్రజలు, ముఖ్యంగా రైతులు, వ్యవసాయ కూలీలు చెట్ల కింద లేదా బహిరంగ ప్రదేశాల్లో ఉండరాదని అధికారులు హెచ్చరించారు.