అదిగదిగో..ఆకాశంలో… ‘ ఎగిరే పళ్లెం ‘.. మళ్ళీ అదే మిస్టరీ !

ఫ్లయింగ్ సాసర్.. అంటే ఎగిరే పళ్లెం గురించి ఎంత చెప్పుకున్నా తక్కువే ! ఈ మిస్టీరియస్ ఆబ్జెక్ట్ ఏమిటో ఇప్పటికీ మనిషికి సవాలుగానే నిలిచింది. ఆకాశంలో అది ఎప్పుడు, ఎవరికి కనబడుతుందో, ఎటు నుంచి ఎటు పోతోందో నేటికీ ఎవరూ కనిపెట్టలేకపోయారు. ‘ ఇదిగో చూసాం..’ ‘ అదిగో చూసాం ‘ అని దీన్ని చూసినవాళ్లు చెబుతున్నారే తప్ప, దీని మిస్టరీ మాత్రం సస్పెన్స్ ని క్రియేట్ చేస్తూనే ఉంది. ఏలియన్స్ పై పరిశోధనలు జరుపుతున్నవాళ్ళు పనిలో పనిగా ఈ ఫ్లయింగ్ సాసర్ల మీదా ఫోకస్ పెట్టి అదేపనిగా తమ ప్రకటనలను ‘ జారీ ‘ చేస్తున్నారు. ఇటీవల కాలిఫోర్నియాలో ఓ వ్యక్తికి స్పష్గంగా ఓ ఎగిరే పళ్లెం కనబడింది. అక్కడి ఆరెంజ్ కౌంటీ లోని షెర్లీ హెలీషియా అనే ఆ వ్యక్తికి గత జూన్ 19 న డిస్క్ షేపులో అత్యంత వేగంగా ప్రయాణిస్తున్న యు ఎఫ్ ఓ కనబడగానే వీడియో తీసి యూట్యూబ్ ఛానల్ కి ఎక్కించారు. ఇక ఇది వైరల్ కావడం ప్రారంభమైంది. ఈ వీడియో చూసినవారంతా దీనిపై చర్చించుకోవడం మొదలెట్టారు. ఇది కనబడిందంటే గ్రహాంతర జీవులు (ఏలియన్స్) ఉన్నట్టే లెక్క. ఇంతకన్నా నిదర్శనం ఇంకేం కావాలి ? భూమిపై మానవుల కార్యకలాపాలను మానిటర్ చేయడానికి ఏలియన్స్ అంతరిక్షం నుంచి ఎగిరే పళ్లాల మీద వఛ్చి పోతుంటారు ‘ అని కొందరంటే..మరికొందరు.. బహుశా మానవాళిపై దాడి చేసే ప్రయత్నంలో వారు చేస్తున్న యోచనలో భాగమే ఇదై ఉండవచ్చునని అభిప్రాయపడ్డారు. ఇక ఏలియన్స్ లేరని వాదించే వారు… ఈ వీడియోలో కనిపించింది డ్రోన్ అయి ఉంటుందని అంటున్నారు. ఇంకొంతమంది మే బీ ఇది సీక్రెట్ మిలిటరీ వెహికల్ అయివుంటుందని, హైపర్ సోనిక్ స్పీడ్ తో ట్రావెల్ చేసే ‘ సత్తా ‘ దీనికి ఉంటుందని నిట్టూర్చారు. ఏలియన్స్ ఉన్నారని తాను నమ్మడంలేదని అమెరికా అధ్యక్షుడు డోనాల్డ్ ట్రంప్ ప్రకటించిన కొన్ని రోజులకే ఈ ఎగిరే పళ్లెం తాలూకు వీడియో బయటకు రావడం విశేషం. యు ఎఫ్ ఓ ల చుట్టూ ఉన్న రహస్యాలను ఛేదించేందుకు తాము రహస్య మిషన్ ని నిర్వహిస్తున్నామని పెంటగాన్ (అమెరికా రక్షణ శాఖ) ధృవీకరించిన నేపథ్యంలో ఈ ‘ వీడియో ‘ వ్యవహారం మళ్ళీ కథను మొదటికి తెచ్చింది.