పిల్లల్ని కన్న తర్వాత ఆక్టోపస్‌ ఎందుకు చనిపోతుంది? నమ్మలేని నిజాలు..

ప్రకృతిలో కొన్ని జీవుల మరణం ఆశ్చర్యంగా ఉంటుంది. అందులో తల్లి ఆక్టోపస్ జీవితం ఓ విషాద గాథ. తన పిల్లల జననం కోసం అది తన మరణ శాసనాన్ని తనే రాసుకుంటుంది. గుడ్లు పెట్టిన క్షణం నుంచి దాని శరీరం నెమ్మదిగా స్వయం-విధ్వంసం వైపు ప్రయాణిస్తుంది. ఇది ప్రకృతి సిద్ధంగా జరిగే ఓ క్రూరమైన, అదే సమయంలో అంచనాలకు అందని ఓ అద్భుతమైన ప్రక్రియ. గుడ్లు పెట్టగానే ఆడ ఆక్టోపస్ ఆహారం తీసుకోవడం, వేటాడటం వంటి పనులన్నీ పూర్తిగా మానేస్తుంది. తన పూర్తి సమయాన్ని, శక్తిని ఆ గుడ్లను కాపాడటానికే కేటాయిస్తుంది. ఈ మార్పుకు కారణం దాని కళ్ల వెనుక ఉండే ‘ఆప్టిక్ గ్రంథులు’. గుడ్లు పెట్టిన వెంటనే ఆ గ్రంథులు కొన్ని ప్రత్యేకమైన హార్మోన్లు, స్టెరాయిడ్లను విడుదల చేస్తాయి. అవి శరీరాన్ని లోపలి నుంచి నాశనం చేయడం ప్రారంభిస్తాయి. ఆ సమయంలో కొలెస్ట్రాల్ జీవక్రియకు సంబంధించిన జన్యువులు అత్యంత చురుగ్గా మారతాయనీ షికాగో యూనివర్సిటీ పరిశోధనలో తేలింది. ముఖ్యంగా 7-డీహెచ్ సీ అనే రసాయనం ఈ మరణ ప్రక్రియలో కీలక పాత్ర పోషిస్తుందట. ఆ మరణం తప్పనిసరి కాదని, అదొక ఆదేశమని శాస్త్రవేత్తలు ప్రయోగపూర్వకంగా నిరూపించారు. 1977లో జెరోమ్ వోడెన్స్కీ అనే శాస్త్రవేత్త గుడ్లు పెట్టిన ఆక్టోపస్‌లకు ఆప్టిక్ గ్రంథులను శస్త్రచికిత్స ద్వారా తొలగించారు. ఆశ్చర్యకరంగా, ఆ ఆక్టోపస్‌లు మళ్లీ ఆహారం తీసుకోవడం మొదలుపెట్టి, దాదాపు ఆరు నెలల పాటు అదనంగా జీవించాయి. దీన్ని బట్టి ఆ గ్రంథులు లేకపోతే ‘మరణ ఆదేశం’ అమలు కాదని స్పష్టమైంది. ఒక్కసారి పునరుత్పత్తి జరిపి చనిపోయే ఆ విధానాన్ని ‘సెమెల్‌పారిటీ’ అంటారు. ఆకలితో క్షీణిస్తున్నప్పటికీ, తల్లి ఆక్టోపస్ తన ఉనికితోనే గుడ్లకు రక్షణ కల్పిస్తుంది. దాని మరణం తర్వాత ఆ ప్రాంతం తన పిల్లల మనుగడకు అనువుగా మారుతుంది. ఏ జన్యువులైతే తల్లి మరణానికి కారణమవుతాయో, అవే జన్యువులు సంతానం ద్వారా తర్వాతి తరానికి బదిలీ అవుతాయి.

మరిన్ని వీడియోల కోసం ఇక్కడ క్లిక్ చేయండి

Also Watch:

‘ఫ్రెంచ్ సండే’ ప్రత్యేకత ఏంటో తెలుసా? అసలు సీక్రెట్ ఇదే

అద్భుతాన్ని కనిపెట్టి.. సీక్రెట్‌ మెయిన్‌టైన్ చేసిన ఇస్రో!

కాలానికి తగ్గట్టు రంగు మార్చే పక్షిని చూశారా