బాబోయ్.. ఊసరవెల్లిలా రంగులు మార్చే వింత కీటకం.. 11 రోజుల్లోనే గులాబీ నుండి ఆకుపచ్చగా..! కారణం
ఈ కీటకం, గిరజాల లాగా రంగులు మారుస్తూ అందరినీ విస్తుపరిచింది. సాధారణంగా ఈ జాతి కీటకాలు ఆకుపచ్చ రంగులో ఉంటాయి. కానీ శాస్త్రవేత్తలకు తొలుత ఇది ముదురు గులాబీ రంగులో కనిపించింది. అయితే, దీనిని పరిశీలనలో ఉంచిన 11 రోజుల్లోనే, ఇది తన గులాబీ రంగును పూర్తిగా కోల్పోయి సాధారణ ఆకుపచ్చ రంగులోకి మారిపోయింది. స్మిత్సోనియన్ ట్రాపికల్ రీసెర్చ్ ఇన్స్టిట్యూట్ పరిశోధకులు దీనిని గమనించారు.
ప్రకృతి ఒడిలో ఎన్నో రహస్యాలు దాగి ఉన్నాయి. తాజాగా పనామా అడవుల్లో వెలుగుచూసిన ఒక సంఘటన శాస్త్రవేత్తలను సైతం నోరెళ్లబెట్టేలా చేసింది. గిరజాల లాగా రంగులు మార్చే ఒక అరుదైన కీటకం ఇప్పుడు ప్రపంచవ్యాప్తంగా చర్చనీయాంశమైంది. పనామాలోని బారో కొలరాడో ద్వీపంలో ఉన్న స్మిత్సోనియన్ ట్రాపికల్ రీసెర్చ్ ఇన్స్టిట్యూట్ శాస్త్రవేత్తలు తమ పరిశోధనలో భాగంగా ఒక ఆడ కాటిడిడ్ (Arota festae) కీటకాన్ని చూశారు. సాధారణంగా ఈ కీటకాలు ఆకుపచ్చగా ఉండి ఆకుల్లో కలిసిపోతాయి. కానీ, వీరికి కనిపించిన కీటకం మాత్రం ఎవరూ ఊహించని విధంగా హాట్ పింక్ రంగులో మెరిసిపోతోంది.
శాస్త్రవేత్తలు ఆ కీటకాన్ని బంధించి, ప్రతిరోజూ దానిని ఫోటోలు తీస్తూ గమనించారు. ఆశ్చర్యకరంగా మొదటి 4 రోజులు ముదురు గులాబీ రంగు కాస్త పలచబడి పాస్టెల్ షేడ్లోకి మారింది. 11వ రోజు నాటికి, ఆ కీటకం తన పాత రంగును పూర్తిగా వదిలేసి, తోటి ఆకుపచ్చ కీటకాల్లో కలిసిపోయేలా మారిపోయింది. గతంలో ఇలాంటి గులాబీ రంగు కీటకాలను చూసినప్పుడు, అవి ఏదో జన్యు లోపం వల్ల అలా పుట్టాయని శాస్త్రవేత్తలు భావించేవారు. కానీ ఈ తాజా పరిశీలనతో వారి అభిప్రాయం మారింది.
అడవుల్లో కొన్ని చెట్ల లేత ఆకులు మొదట గులాబీ రంగులో ఉంటాయి. ఆ ఆకులపై ఉన్నప్పుడు శత్రువులకు కనబడకుండా ఉండేందుకు ఈ కీటకాలు కూడా గులాబీ రంగులో ఉంటాయి. ఆకులు పెరిగి ఆకుపచ్చగా మారే కొద్దీ, ఇవి కూడా తమ రంగును మార్చుకుని ఆకుల్లో కలిసిపోతాయి. పర్యావరణానికి అనుగుణంగా జీవరాశులు తమను తాము ఎలా మలచుకుంటాయో చెప్పడానికి ఈ పింక్ కాటిడిడ్ ఒక అద్భుతమైన ఉదాహరణ. ఈ ఆవిష్కరణ జీవవైవిధ్యంపై మరిన్ని పరిశోధనలకు దారి తీస్తోందని నిపుణులు చెబుతున్నారు.