WTC 2025 SemiFinal: భారత్ వాకౌట్.. కట్‌చేస్తే.. ఫైనల్ చేరిన పాకిస్తాన్..

India Champions Wcl

వరల్డ్ ఛాంపియన్‌షిప్ ఆఫ్ లెజెండ్స్ (WCL) 2025 టోర్నమెంట్‌లో భారీ ప్రకంపనలు సృష్టిస్తూ, సెమీఫైనల్‌లో పాకిస్తాన్ ఛాంపియన్స్ జట్టుతో తలపడేందుకు ఇండియా ఛాంపియన్స్ ఆటగాళ్లు నిరాకరించారు. ఇప్పటికే ఉత్కంఠగా మారిన ఈ టోర్నమెంట్‌లో ఈ పరిణామం తీవ్ర చర్చనీయాంశంగా మారింది. కొన్ని నివేదికల ప్రకారం, ఈ నిర్ణయంతో భారత్ టోర్నమెంట్ నుంచి అధికారికంగా వైదొలిగింది. దీంతో పాకిస్తాన్ నేరుగా ఫైనల్‌కు అర్హత సాధించింది.

గురువారం జరగాల్సిన ఇండియా ఛాంపియన్స్, పాకిస్తాన్ ఛాంపియన్స్ మధ్య సెమీఫైనల్ మ్యాచ్‌ను ఆడటానికి భారత ఆటగాళ్లు సుముఖత వ్యక్తం చేయలేదు. ఈ టోర్నమెంట్ గ్రూప్ దశలో కూడా ఇరు జట్ల మధ్య జరగాల్సిన మ్యాచ్ భద్రతా కారణాలు, రాజకీయ ఉద్రిక్తతల కారణంగా రద్దు చేయబడిన విషయం తెలిసిందే. అప్పట్లో పహల్గామ్ ఉగ్రదాడి వంటి ఘటనల నేపథ్యంలో భారత ఆటగాళ్లు, ప్రధాన స్పాన్సర్ ఈజీమైట్రిప్ అభ్యంతరాలు వ్యక్తం చేశారు. “ఉగ్రవాదం, క్రికెట్ కలిసి సాగలేవు” అనే నినాదంతో వారు మ్యాచ్‌ను బహిష్కరించారు.

సెమీఫైనల్‌లో మరోసారి పాకిస్తాన్‌తో తలపడాల్సి రావడంతో, యువీ, శిఖర్ ధావన్, హర్భజన్ సింగ్, ఇర్ఫాన్ పఠాన్, యూసుఫ్ పఠాన్ వంటి భారత ఛాంపియన్స్ ఆటగాళ్లు తమ పాత వైఖరికే కట్టుబడి ఉన్నారు. తాము పాకిస్తాన్‌తో ఆడబోమని స్పష్టంగా తెలియజేశారు. ఈజీమైట్రిప్, టోర్నమెంట్ ప్రముఖ స్పాన్సర్‌లలో ఒకటి, మరోసారి ఈ సెమీఫైనల్ మ్యాచ్ నుంచి తమ స్పాన్సర్‌షిప్‌ను ఉపసంహరించుకుంది. “మా సంస్థ భారత్‌కు అండగా నిలుస్తుంది. ఉగ్రవాదాన్ని ప్రోత్సహించే దేశంతో సంబంధాలను సాధారణీకరించడానికి ప్రయత్నించే ఏ కార్యక్రమానికి మేం మద్దతు ఇవ్వలేం” అని ఈజీమైట్రిప్ సహ వ్యవస్థాపకుడు నిశాంత్ పిట్టి పునరుద్ఘాటించారు. “కొన్ని విషయాలు క్రీడ కంటే గొప్పవి. దేశమే ముందు, వ్యాపారం ఆ తర్వాత” అని ఆయన పేర్కొన్నారు.

శిఖర్ ధావన్ గతంలోనే దీనిపై స్పందిస్తూ, “గతంలోనే ఆడనప్పుడు, ఇప్పుడు కూడా ఆడను” అని తేల్చి చెప్పినట్లు వార్తలు వచ్చాయి. ఇప్పుడు టీమిండియా లెజెండ్స్ తీసుకున్న ఈ నిర్ణయం దేశభక్తి, క్రీడా స్ఫూర్తి మధ్య తలెత్తిన సంఘర్షణను మరోసారి హైలైట్ చేసింది. క్రికెట్ అభిమానులలో దీనిపై భిన్న అభిప్రాయాలు వ్యక్తమవుతున్నాయి. కొందరు ఆటగాళ్ల నిర్ణయానికి మద్దతు తెలుపుతుండగా, మరికొందరు క్రీడను రాజకీయాలకు అతీతంగా చూడాలని వాదిస్తున్నారు.

ఈ పరిణామం డబ్ల్యూసీఎల్ 2025 సెమీఫైనల్ భవిష్యత్తుపై తీవ్ర అనిశ్చితిని సృష్టించింది. టోర్నమెంట్ నిర్వాహకులు ఈ పరిస్థితిని ఎలా ఎదుర్కొంటారో వేచి చూడాలి. ఏదేమైనా, ఇండియా-పాకిస్తాన్ క్రికెట్ మ్యాచ్‌లపై రాజకీయ ఉద్రిక్తతల ప్రభావం మరోసారి స్పష్టంగా కనిపించింది. ఈ నిర్ణయం పాకిస్తాన్‌ను నేరుగా ఫైనల్‌కు పంపిందని మీడియా నివేదించింది.