Kuja Blessings: కుజుడి కటాక్షం.. మేషం, మకరం సహా ఈ రాశులకు గోల్డెన్ టైమ్..!
ప్రస్తుతం తన స్వస్థానమైన మేష రాశిలో సంచారం చేస్తున్న కుజ గ్రహం.. జూన్ వరకు అయిదు రాశుల వారిని ఉచ్ఛ స్థితికి తీసుకువెళ్లే అవకాశం ఉంది. అధికారానికి, ఆస్తిపాస్తులకు కారకుడైన కుజుడు మేషం, కర్కాటకం, తుల, వృశ్చికం, మకర రాశులకు శీఘ్ర పురోగతిని అనుగ్రహించడం జరుగుతుంది. అంతకన్నా ఎక్కువగా తప్పకుండా విజయాలను, సాఫల్యాలను అనుగ్రహించడం జరుగుతుంది. అంగారక స్తోత్రం పఠించినా, పగడపు ఉంగరం వేలికి పెట్టుకున్నా, ఎర్రటి వస్త్రాలు ధరించినా, సుబ్రహ్మణ్యాష్టకం చదువుకున్నా కుజుడి అనుగ్రహం రెట్టింపు అయ్యే అవకాశం ఉంటుంది.
మేషం: రాశ్యధిపతి కుజుడు స్వస్థానంలో బలమైన సంచారం చేస్తున్నందువల్ల ఈ రాశివారికి తప్పకుండా అధికార యోగం పడుతుంది. ఏ రంగంలో ఉన్నా ఉన్నత స్థానాలకు వెళ్లడం జరుగుతుంది. ఆస్తి వివాదాలు, కోర్టు కేసుల్లో విజయాలు సాధిస్తారు. వృత్తి, వ్యాపారాల్లో ఎటువంటి పోటీలు, సవాళ్లు ఎదురైనా ధైర్యంగా ఎదుర్కోవడం, విజయం సాధించడం జరుగుతుంది. ఆర్థిక పరిస్థితిని బాగా మెరుగుపరచుకుంటారు. ఉద్యోగంలో సీనియర్లను కాదని అధికారం చేపట్టడం జరుగుతుంది.
కర్కాటకం: ఈ రాశి మీద కుజుడి దృష్టి పడడం వల్ల ఈ రాశివారిలో ఆత్మవిశ్వాసం, ధైర్య సాహసాలు ఇనుమడిస్తాయి. ఎటువంటి సవాలునైనా ఎదుర్కోవడం జరుగుతుంది. పోటీ పరీక్షలు, ఇంటర్వ్యూలలో ఘన విజయాలు సాధిస్తారు. శత్రువులు, ప్రత్యర్థులు, పోటీదార్ల మీద పైచేయిగా ఉంటుంది. రుణ, రోగ సమస్యల నుంచి పూర్తిగా విముక్తి లభిస్తుంది. ఏ రంగంలో ఉన్నా దూసుకుపోతారు. పని తీరులో సహోద్యోగులను మించిపోతారు. ఆదాయ వృద్ధి ప్రయత్నాలన్నీ సఫలమవుతాయి.
తుల: ఈ రాశి మీద కుజుడి సప్తమ దృష్టి పడినందువల్ల ఈ రాశివారికి కొద్ది ప్రయత్నంతో ఆదాయం అత్యధికంగా వృద్ది చెందుతుంది. విదేశీ ఉద్యోగాల కోసం ప్రయత్నాలు చేస్తున్నవారి పంట పండుతుంది. ప్రతి సమస్యనూ పట్టుదలగా పరిష్కరించుకుంటారు. ఆస్తి వివాదాలు, కోర్టు కేసుల్లో సానుకూల ఫలితాలు పొందుతారు. పట్టిందల్లా బంగారం అవుతుంది. ఆరోగ్యం బాగా మెరుగుపడుతుంది. ప్రముఖులతో సన్నిహిత సంబంధాలు ఏర్పడతాయి. రావలసిన సొమ్మును రాబట్టుకుంటారు.
వృశ్చికం: రాశినాథుడైన కుజుడు అష్టమ దృష్టితో ఈ రాశిని వీక్షించడం వల్ల జూన్ 20 వరకు జీవితం నల్లేరు మీద బండిలా సాగిపోతుంది. ఆర్థిక, వ్యక్తిగత సమస్యల నుంచి పూర్తిగా విముక్తి లభిస్తుంది. ఆదాయ వృద్దికి ఎటువంటి ప్రయత్నం చేపట్టినా సఫలమవుతుంది. ఆర్థిక బలం పెరుగుతుంది. వృత్తి ఉద్యోగాల్లో అధికార యోగం కలగడంతో పాటు ఆర్థికంగా పురోగతి ఉంటుంది. నిరుద్యోగులు మంచి ఉద్యోగం సంపాదించుకుంటారు. ఆస్తి వివాదాల్ని రాజీమార్గంలో పరిష్కరించుకుంటారు.
మకరం: తనకు ఉచ్ఛ క్షేత్రమైన మకర రాశిని కుజుడు ఎక్కువగా అనుగ్రహిస్తాడు. కుజుడికి ఎక్కడ బలం పట్టినా ఈ రాశికి శుభ యోగాలు కలుగుతాయి. ప్రస్తుతం కుజుడి మేష సంచారం వల్ల వృత్తి, ఉద్యోగాల్లో ప్రాభవం, ప్రాధాన్యం పెరిగి అధికార యోగం పడుతుంది. రాజకీయాలు, రియల్ ఎస్టేట్, లిక్కర్, ఎక్సైజ్, ప్రభుత్వం వంటి రంగాలవారు ఆశించిన స్థాయిలో పురోగతి సాధిస్తారు. ఉద్యోగులు, నిరుద్యోగులకు విదేశీ ఆఫర్లు అందే అవకాశం ఉంది. రాజకీయ ప్రాబల్యం పెరుగుతుంది.