Political Movies: అధ్యక్షా.. ఎలక్షన్స్ కలిసొస్తున్నాయ్.. కలెక్షన్లు పరిగెడుతున్నాయ్..!
ఒకప్పుడు ఎన్నికలు దగ్గరికి వస్తున్నాయంటే.. కేవలం రాజకీయ నాయకులే హ్యాపీగా ఫీలయ్యే వాళ్లు.. మళ్లీ మాకు టైమ్ వచ్చిందని పండగ చేసుకునే వాళ్లు. గెలుపోటములు దైవాధీనం.. ముందు రంగంలోకి దిగుదాం అనుకునేవాళ్లు. కానీ ఇప్పుడు ఎలక్షన్స్ వస్తున్నాయంటే.. సినిమా ఇండస్ట్రీలో ఉన్న దర్శక నిర్మాతలు కూడా పండగ చేసుకుంటున్నారు. ఆ పొలిటికల్ హీట్ వాడుకుంటూ వరస సినిమాలు చేస్తున్నారు.
కొందరేమో డైరెక్ట్ అటాక్‌కు సిద్ధమవుతున్నారు. పార్టీలకు అనుకూలంగా సినిమాలు చేస్తూ ఎలక్షన్ మూవెంట్ క్యాష్ చేసుకోవాలని ప్లాన్ చేస్తున్నారు. ఎవరికి వాళ్లు ఎన్నికల సందడి క్యాష్ చేసుకోవడానికి తోచిన ప్రయత్నాలు చేస్తూనే ఉన్నారు. తాజాగా కోట బొమ్మాళీ సైతం ఎన్నికల సందర్భంలోనే వచ్చింది. ఈ చిత్రంలో జనాన్ని రాజకీయ నాయకులు ఎలా వెర్రోళ్లను చేస్తున్నారు.. ఓటుకు నోటు ఇచ్చి ఎలా మాయ చేస్తున్నారు.. పోలీసులను వాళ్లు ఎలా వాడుకుంటున్నారు.. వాళ్లతో ఎలా ఆడుకుంటున్నారు అనే విషయాలను చూపించారు.
శ్రీకాంత్ చాలా ఏళ్ళ తర్వాత సోలో హీరోగా సక్సెస్ అందుకున్నాడు. బన్నీ వాస్ నిర్మించిన ఈ సినిమాను తేజ మార్ని తెరకెక్కించాడు. నాయట్టు రీమేక్‌గా వచ్చినా.. ఇక్కడ ఆడియన్స్ టేస్టుకు తగ్గట్లు కథలో మార్పులు చేసాడు తేజ. ఇప్పుడు కలెక్షన్లు కూడా అలాగే వస్తున్నాయి. ఎన్నికల టైమ్ కావడం కోట బొమ్మాళీ పిఎస్ సినిమాకు మరింత కలిసొచ్చింది. మూడు రోజుల్లోనే ఈ చిత్రం 6 కోట్లకు పైగా గ్రాస్ వసూలు చేసింది.
ఇదిలా ఉంటే ఇదే దారిలో మరిన్ని సినిమాలు కూడా వస్తున్నాయి. అందులోనూ పొలిటికల్ థీమ్ ఎక్కువగా కనిపిస్తుంది. బయట మాదిరే.. ఇండస్ట్రీలోనూ పొలిటికల్ సీజన్ నడుస్తుందిప్పుడు. కోట బొమ్మాళీ సక్సెస్ చూసిన తర్వాత.. తాజాగా మరిన్ని పొలిటికల్ మూవీస్ క్యూ కడుతున్నాయి. ఇప్పటికే వర్మ వ్యూహం తీసాడు కానీ రిలీజ్ కానివ్వకుండా అడ్డుకున్నారు సెన్సార్ సభ్యులు.
మరోవైపు యాత్ర 2 వచ్చే ఏడాది ఏపీ ఎన్నికలే లక్ష్యంగా వచ్చేస్తుంది. 2019 ఎన్నికలకు ముందు యాత్ర సినిమాతో వచ్చిన మహి వి రాఘవ్.. 2024 ఎన్నికలకు ముందు యాత్ర 2తో రాబోతున్నారు. మమ్ముట్టి హీరోగా వచ్చిన యాత్రలో దివంగత నేత వైఎస్ రాజశేఖర్ రెడ్డి పాదయాత్రను చూపించారు మహి. యాత్ర 2లో వైఎస్ జగన్ పాదయాత్రను చూపిస్తున్నాడు మహి. పొలిటికల్ మూవీస్ కేటగిరీలో జగన్ వర్గమే కాస్త ముందుంది.
మరోవైపు నారా రోహిత్ కూడా పొలిటికల్ సినిమాతోనే వస్తున్నాడు. ప్రతినిథి 2 అంటూ జర్నలిస్ట్ మూర్తి దర్శకత్వంలో నటిస్తున్నాడు. ఈ సినిమాలో ప్రస్తుత రాజకీయాలనే ఎక్కువగా టార్గెట్ చేస్తున్నారు. వ్యూహం, శపథం, యాత్ర 2 ఓ పార్టీకి సపోర్ట్ చేస్తుంటే.. వాటికి పోటీగా మరో పార్టీ నుంచి ప్రతినిథి వస్తున్నాడు. మరి వీటిలో ఏది ఎలక్షన్ మూవెంట్‌ను క్యాష్ చేసుకుంటుందో చూడాలి.