రూ. 99 కే చికెన్ బిర్యానీ అమ్మితే ఓనర్‌కు నిజంగా ఎంత మిగులుతుంది? కళ్లు బైర్లు కమ్మే అసలు లెక్క ఇదే!
హైదరాబాద్‌తో పాటు తెలుగు రాష్ట్రాల్లో ఎక్కడ చూసినా రూ. 99 కే చికెన్ బిర్యానీ బోర్డులు కనిపిస్తున్నాయి. ఇంత తక్కువ ధరకు బిర్యానీ అమ్మితే యజమానికి అసలు లాభం వస్తుందా? తెల్లవారుజాము నుంచి రాత్రి షట్టర్ దించే వరకు ఒక బిర్యానీ పాయింట్ గల్లా పెట్టె వెనుక జరిగే అసలు లెక్కేంటో తెలుసుకోండి.
హైదరాబాద్ వంటి మహానగరాల నుంచి చిన్న పట్టణాల వరకు ఇప్పుడు ఎక్కడ చూసినా '99 రూపాయలకే చికెన్ బిర్యానీ' అనే బోర్డులు విపరీతంగా ఆకర్షిస్తున్నాయి. మార్కెట్లో చికెన్ కిలో ధర రూ. 240 ఉన్నప్పుడు, ఇంత తక్కువ ధరకు ఒక ప్లేట్ బిర్యానీ అమ్మితే ఆ షాప్ యజమానికి అసలు ఏమైనా మిగులుతుందా అనే సందేహం మనందరికీ కలుగుతుంది. ఈ ప్రశ్నకు సమాధానం తెలియాలంటే ఒక బిర్యానీ పాయింట్‌లోని రోజూవారీ ఆదాయం, ఖర్చుల లెక్కలను లోతుగా పరిశీలించాలి.
మెయిన్ రోడ్డు పక్కన, కాలేజీలు, హాస్టళ్లు ఎక్కువగా ఉండే ప్రాంతంలో రోజుకు 400 ప్లేట్లు అమ్ముడయ్యే ఒక బిర్యానీ పాయింట్‌ను ఉదాహరణగా తీసుకుందాం. ఇక్కడ నేరుగా కొంటే ప్లేట్ రూ. 99, అదే ఆన్‌లైన్ యాప్స్‌లో అయితే రూ. 149. తెల్లవారుజామునే యజమాని పని మొదలవుతుంది. 400 ప్లేట్లకు కావాల్సిన చికెన్, బాస్మతి బియ్యం, నూనె, నెయ్యి, మసాలాలు, సాలన్, రైతా సరుకుల కోసమే రోజుకు దాదాపు రూ. 23,000 ఖర్చవుతుంది. దీనికి తోడు ఎనిమిది మంది సిబ్బంది జీతాలు, ముఖ్యంగా రుచిని నిలబెట్టే హెడ్ బావర్చి జీతం, షాప్ అద్దె, గ్యాస్ సిలిండర్లు, కరెంట్ ఖర్చులు అన్నీ కలిపి మొదటి ప్లేట్ అమ్మకముందే సుమారు రూ. 34,000 ఖర్చు పడుతుంది.
మనం సాధారణంగా పట్టించుకోని మరో పెద్ద ఖర్చు పార్సెల్ ప్యాకింగ్. రోజుకు 280 పార్సెల్స్ వెళ్తే, డబ్బాలు, కప్పులు, కవర్ల ఖర్చే నెలకు లక్ష రూపాయలు దాటుతుంది, ఇది షాప్ అద్దె కంటే ఎక్కువ. అలాగే ఆన్‌లైన్ ఆర్డర్లలో జీఎస్టీతో కలిపి దాదాపు 30 శాతం యాప్ కమిషన్‌కే వెళ్లిపోతుంది. రాత్రి సమయానికి బిర్యానీ మిగిలిపోతే ఆ నష్టం కూడా యజమానిదే.
రాత్రి షట్టర్ దించే సమయానికి అన్ని ఖర్చులు పోగా యజమాని జేబులో మిగిలే నికర లాభం సుమారు రూ. 5,600. ఇందులో అసలు ట్విస్ట్ ఏంటంటే, 400 బిర్యానీ ప్లేట్ల వల్ల వచ్చే లాభం కేవలం రూ. 2,700 మాత్రమే (అంటే ప్లేట్‌కు రూ. 7). మిగిలిన రూ. 2,900 లాభం కస్టమర్లు అడిగే 'ఎక్స్‌ట్రా చికెన్ పీస్' వల్ల వస్తుంది. రూ. 99 బోర్డు కేవలం కస్టమర్లను లోపలికి రప్పించే ఒక ఎర మాత్రమే; అసలు లాభం ఆ అదనపు ముక్కలోనే దాగి ఉంది.
అయితే, ఈ వ్యాపారం నిలబడాలంటే రోజుకు కనీసం 260 ప్లేట్లయినా అమ్ముడుపోవాలి, లేదంటే భారీ నష్టాలు తప్పవు. తక్కువ అద్దె ఉన్న చిన్న పట్టణాల్లో ప్లేట్ రూ. 130 కి అమ్మితే, రోజుకు 120 ప్లేట్లతోనే మంచి లాభాలు గడించవచ్చు. ఉద్యోగం చేస్తూ అదనపు ఆదాయం కావాలనుకునే వారు, కేవలం ఆదివారాలు మాత్రమే ఇంట్లో బిర్యానీ చేసి అపార్ట్‌మెంట్ గ్రూపుల్లో ముందస్తు ఆర్డర్ల ద్వారా విక్రయిస్తే ఎలాంటి అద్దె, సిబ్బంది ఖర్చు లేకుండా నెలకు రూ. 14,000 వరకు సంపాదించవచ్చు. ఏ వ్యాపారంలోనైనా తక్కువ ధర పెట్టడం కంటే, ఖర్చులను నియంత్రించుకోవడమే అసలైన తెలివి.