కేవలం 2 గంటల్లోనే హైదరాబాద్ టూ బెంగళూరు! దూసుకొస్తున్న హైస్పీడ్ రైలు
హైదారబాద్ టూ బెంగళూరు, హైదరాబాద్ టూ చెన్నై మధ్య ప్రయాణించేందుకు రెండు గంటలే అంటే షాక్ అయ్యారా? విమానంలో అయి ఉంటుందిలే అనుకుంటున్నారా? అలా ఏం కాదు.. ట్రైన్ లోనే కేవలం రెండు గంటల్లోనే హైదరాబాద్ టూ బెంగళూరు, హైదరాబాద్ టూ చెన్నైకి ప్రయాణించే రోజులు వచ్చేస్తున్నాయి. అది ఎలాగో ఇప్పుడు చూద్దాం..
హైదరాబాద్, బెంగళూరు రెండు కూడా ఐటీ సిటీలే. ఇక్కడి నుంచి అక్కడికి, అక్కడి నుంచి ఇక్కడికి తరచుగా రాకపోకలు సాగించే వారి సంఖ్య భారీగా ఉంటోంది. ఈ రెండు మహానగరాల మధ్య రాకపోకలు సాగించేవారు ఎక్కువగా రైలు, లేదా విమానం ద్వారా ప్రయాణి సాగిస్తూ ఉంటారు. విమానంలో అయితే రెండు గంటల ప్రయాణం. కానీ, రైలులో మాత్రం తక్కువలో తక్కువ ఓ 12 గంటల సమయం పడుతోంది. దీంతో చాలా మంది తమకు సమయం వృథా అవుతుందని బాధపడుతుంటారు. ఎందుకంటే.. ఈ రెండు నగరాల్లో ఉంటే వ్యాపార వేత్తలు, పెద్ద పెద్ద ఉద్యోగాలు చేసే వారంతా టైమ్‌ను డబ్బుతో కొలుస్తుంటారు. అంటే టైమ్‌ వేస్ట్‌ అవుతే డబ్బు నష్టపోయినట్లు భావిస్తారు. ఇలా టైమ్‌కు ఎంతో ఇంపార్టెన్స్‌ ఇచ్చే వారికి ఇపై సమయం వృథా అవుతోంది అని బాధపడాల్సిన పని ఉండదు. ఎందుకంటే.. త్వరలోనే హైస్పీడ్ రైలు ప్రారంభించేందుకు ఇండియన్‌ రైల్వేస్‌ సిద్ధమవుతోంది.
ఇప్పటికే ముంబై – అహ్మదాబాద్ హైస్పీడ్ కారిడార్ అందుబాటులోకి వచ్చింది. ఈ నమూనాతోనే హైదరాబాద్ టూ బెంగళూరు, హైదరాబాద్ టూ చెన్నై హైస్పీడ్ ట్రైన్ కారిడార్లకు ఎఫ్ఎల్ఎస్ (ఫైనల్ లొకేషన్ సర్వే)కు రైల్వే అధికారులు టెండర్లు ఆహ్వానించారు. హైదరాబాద్ – చెన్నై హైస్పీడ్ కారిడార్ పొడవు 705 కిలో మీటర్లుగా ప్రతిపాదించగా, హైదరాబాద్ – బెంగళూరు హైస్పీడ్ రైలు కారిడార్ పొడవు 626 కిలో మీటర్లుగా ప్రతిపాదించారు. ఈ హైస్పీడ్ రైలు గంటకు సుమారు 320కిలో మీటర్ల వేగంతో పరుగులు పెట్టనుంది. ఫైనల్ లొకేషన్ సర్వే కు టెండర్లను రైల్వే బోర్డు ఆమోదిస్తే రాబోయే 8 ఏళ్లలో హైదరాబాద్ టూ చెన్నై, హైదరాబాద్ టూ బెంగళూరుకు హైస్పీడ్ రైళ్లు పరుగులు పెట్టనుంది.
హైస్పీడ్ రైళ్లకోసం ప్రత్యేక ట్రాక్ లను ఏర్పాటు చేయాల్సి ఉన్నందున మొదటి దశలో ఎఫ్ఎల్ఎస్ సర్వే చేసేందుకు టెండర్లను ఆహ్వానించారు. ఈ సర్వేను కేంద్ర రైల్వే బోర్డుకు పంపిస్తారు. దీన్ని బోర్డు ఆమోదిస్తే భౌగోళికమైన మ్యాపింగ్, భూమి స్వభావంపై పరీక్షలు నిర్వహిస్తారు. తరువాత బ్రిడ్జింగ్, టెన్నెలింగ్, బిల్డింగ్స్, ఇతర నిర్మాణాలతో సహా వివణాత్మక అంచనాలతో టెండర్లు పిలుస్తారు. అంత అనుకున్నట్లు జరిగితే అతి తక్కువ కాలంలోనే హైస్పీడ్ ట్రైన్లలో హైదరాబాద్, బెంగళూరు, చెన్నై ప్రజలు ప్రయాణించవచ్చు. అలాగే వ్యాపార, ఇతర వ్యవహారల నిమిత్తం తరచూ ఈ నగరాల మధ్య ప్రయాణాలు సాగించే వారు కేవలం రెండు గంటల్లోనే రైలులో చేరుకోవచ్చు. విమాన ఛార్జీలతో పోలిస్తే.. ఈ హైస్పీడ్ టిక్కెట్‌ ధర కాస్త తక్కువగానే ఉండే అవకాశం కూడా ఉంది.