4 నెలల క్రితం కుక్క కాటు.. రేబీస్‌ వ్యాధితో చిన్నారి మృతి!

నిత్యం తమ చుట్టూ తిరిగే పెంపుడు కుక్కలు ఉన్నట్లుండి ఇలా ఎందుకు ప్రవర్తిస్తున్నాయో తెలియక యజమానులు ఆశ్చర్యపోతుంటారు. పెట్‌ డాగ్స్‌ ఇలా దూకుడుగా మారే ముందు మనకు కొన్ని సంకేతాలను ఇస్తుంది. ఆ సంకేతాలను అర్థం చేసుకోవడం చాలా ముఖ్యం.

బెంగళూరు, ఆగస్టు 19: దేశ వ్యాప్తంగా పిచ్చికుక్కలు స్వైర విహారం చేస్తున్నాయి. ఇప్పటికే ఎన్నో ఉదంతాలు చోటు చేసుకున్నా ఆయా రాష్ట్ర ప్రభుత్వాలు మాత్రం పటిష్ట చర్యలు తీసుకోవడంలో విఫలమవుతున్నాయి. తాజాగా కర్ణాటకలో మరో విషాదం చోటు చేసుకుంది. నాలుగు నెలల క్రితం ఓ చిన్నారిని వీధి కుక్క దాడి చేసి గాయపరిచింది. తాజాగా ఆ చిన్నారికి రేబీస్‌ వ్యాధి సోకడంతో ప్రాణాలు కోల్పోయింది. ఈ ఘటన కర్ణాటకలోని దావణగెరెలో చోటు చేసుకుంది. వివరాల్లోకి వెళితే..

ఈ ఏడాది ఏప్రిల్‌లో ఖదీరాబాను అనే నాలుగేళ్ల చిన్నారి ఇంటి ఆవరణలో ఆడుకుంటుండగా వీధికుక్క దాడి చేసింది. ఈ దాడిలో చిన్నారి ముఖం, శరీర భాగాలపై తీవ్ర గాయాలయ్యాయి. వెంటనే కుటుంబ సభ్యులు చిన్నారిని స్థానిక ఆస్పత్రికి తరలించారు. అనంతరం మెరుగైన చికిత్స కోసం బెంగళూరుకు తీసుకెళ్లారు. అప్పటి నుంచి బెంగళూరులోని రాజీవ్‌గాంధీ ఆస్పత్రిలోనే చిన్నారికి చికిత్స అందిస్తున్నారు. ఈ క్రమంలో కుక్క కాటుతో రేబీస్‌ సోకి చిన్నారి చికిత్స పొందుతూ మంగళవారం ప్రాణాలు కోల్పోయింది.

అధికారిక సమాచారం మేరకు కర్ణాటక రాష్ట్ర వ్యాప్తంగా ఈ ఏడాది జనవరి నుంచి ఆగస్ట్‌ మధ్య కాలంలో దాదాపు 2.86 లక్షల మంది కుక్క కాటుకు గురయ్యారు. వీరిలో రేబిస్‌ వ్యాధితో ఏకంగా 26 మంది మృత్యువాత పడ్డారు. ముఖ్యంగా ఆగస్టు 4 నుంచి 10 మధ్య కాలంలోనే రాష్ట్రవ్యాప్తంగా 5,652 కుక్క కాటు కేసులు నమోదయ్యాయి. రేబిస్ వ్యాప్తిని అరికట్టడానికి ఆరోగ్య అధికారులు కేసులను ట్రాక్ చేయడం, సకాలంలో చికిత్స, టీకాలు వేయడం, పెంపుడు జంతువులపై అవగాహన డ్రైవ్‌లను నిర్వహించడం కొనసాగిస్తున్నారు.

4 Year Old Girl Dies Of Rabies

కాగా ఢిల్లీ వీధుల్లో కుక్కలు కనిపించరాదని సుప్రీంకోర్టు సోమవారం ఢిల్లీ ప్రభుత్వ అధికారులను ఆదేశించిన సంగతి తెలిసిందే. వీధి కుక్కలన్నింటినీ సాధ్యమైనంత వేగంగా స్టెరిలైజ్‌ చేసి షెల్టర్లకు తరలించాలని సుప్రీంకోర్టు ఢిల్లీ-ఎన్‌సీఆర్‌ అధికారులను ఆదేశించింది. వీధి కుక్కలను షెల్టర్లకు తరలించాలంటూ అత్యున్నత ధర్మాసనం ఇచ్చిన ఆదేశాలను సవాల్‌ చేస్తూ పలువురు పిటిషన్లు దాఖలు చేస్తున్నారు. ఈ నేపథ్యంలో సుప్రీం కోర్టు గురువారం తీర్పును వాయిదా వేసింది. అధికారుల నిర్లక్ష్యం వల్లే ఈ పరిస్థితి దాపురించిందని ధర్మాసనం వ్యాఖ్యానించింది. ఇందుకు సంబంధించి జారీ చేసిన ఉత్తర్వులపై మధ్యంతర స్టే విధించడానికి ధర్మాసనం తిరస్కరించింది.

మరిన్ని జాతీయ వార్తల కోసం క్లిక్‌ చేయండి.