మొక్కలు పచ్చగా, బలంగా పెరగాలా? వేప, వెల్లుల్లి, బెల్లంతో ఇంట్లోనే సహజ ఎరువు తయారీ!
ఇంటి తోటలు, కిచెన్ గార్డెన్లలో పెంచే మొక్కల ఆరోగ్యానికి ఆర్గానిక్ ఎరువులు ఎంతో మేలు చేస్తాయి. రసాయన ఎరువుల వల్ల మొక్కలు నాశనమవ్వడమే కాకుండా నేల సారం కూడా తగ్గుతుంది. అందుకే మన వంటగదిలోని చెత్తగా పడవేసే సహజ సిద్ధమైన పదార్థాలతో శక్తివంతమైన ద్రవ ఎరువు, కీటక నాశినిని సులభంగా తయారు చేసుకోవచ్చు. రూపాయి ఖర్చు లేకుండా ఇంట్లోనే ఆర్గానిక్ ఎరువులను ఎలా తయారు చేసుకోవాలో ఇప్పుడు తెలుసుకుందాం..
ఇంటి ప్రాంగణంలో లేదా మేడపై మొక్కలు పెంచడం చాలామందికి ఇష్టమైన వ్యాపకం. అయితే, తరచూ మొక్కలకు చీడపీడలు పట్టడం, ఆకులు పసుపు రంగులోకి మారడం లేదా ఎదుగుదల ఆగిపోవడం వంటి సమస్యలు ఎదురవుతుంటాయి. మార్కెట్లో దొరికే రసాయన ఎరువులు లేదా పెస్టిసైడ్స్ వాడితే తాత్కాలికంగా ఫలితం కనిపించినా, సుదీర్ఘకాలంలో అవి మొక్కల వేళ్లను దెబ్బతీసి నేల సారవంతతను తగ్గిస్తాయి. ఈ సమస్యకు చక్కని పరిష్కారం మన ఇంట్లోనే లభించే ఆర్గానిక్ పదార్థాలతో ద్రవ ఎరువు తయారీ.
కావలసిన పదార్థాలు:
వేపాకులు: సహజ సిద్ధమైన యాంటీ-ఫంగల్, కీటక నివారిణి.
వెల్లుల్లి: ఘాటైన వాసనతో క్రిమి కీటకాలను పారద్రోలుతుంది.
బెల్లం: బాక్టీరియా, సూక్ష్మజీవుల కిణ్వ ప్రక్రియకు సహాయపడుతుంది.
నీరు: మిశ్రమాన్ని కరిగించడానికి.
ద్రవ ఎరువు తయారీ విధానం: మొదట కొన్ని తాజా వేపాకులను, దంచిన వెల్లుల్లి రెబ్బలను తీసుకోండి. ఒక పాత్రలో నీరు పోసి ఈ రెండింటిని వేసి బాగా మరిగించాలి. నీరు సగం అయ్యే వరకు మరిగించిన తర్వాత చల్లారనివ్వాలి. మరొక పద్ధతిలో, ఒక ప్లాస్టిక్ డబ్బాలో నీరు తీసుకుని అందులో నూరిన వేపాకులు, వెల్లుల్లి ముద్ద, కొద్దిగా బెల్లం కలపాలి. ఈ మిశ్రమాన్ని మూత పెట్టి 3 నుండి 5 రోజుల పాటు నీడలో ఉంచాలి. బెల్లం వల్ల ఈ మిశ్రమంలో మంచి బాక్టీరియా వేగంగా అభివృద్ధి చెందుతుంది. 5 రోజుల తర్వాత ఈ ద్రవాన్ని వడకట్టి, అందులో సాధారణ నీటిని కలిపి (1:5 నిష్పత్తిలో) పలచన చేయాలి.
ఉపయోగాలు, వాడే పద్ధతి:
స్ప్రేగా వాడకం: ఈ ల్యాండ్ మిశ్రమాన్ని స్ప్రే బాటిల్లో పోసి ఆకులపై పిచికారీ చేయడం వల్ల పురుగులు, పిండి నల్లి, ఫంగస్ సమర్థవంతంగా నివారించబడతాయి.
వేళ్లకు పోషకాలు: ఈ ద్రవాన్ని నేరుగా కుండీలోని మట్టిలో పోయడం వల్ల వేళ్లకు నైట్రోజన్, పొటాషియం, కాల్షియం వంటి అవసరమైన పోషకాలు అందుతాయి.
ఖర్చు లేని మార్గం: ఒక్క రూపాయి కూడా ఖర్చు లేకుండా, వంటగది వ్యర్థాలు, సహజ మూలికలతో మొక్కలను ఆరోగ్యంగా, పచ్చగా ఉంచడానికి ఇది ఉత్తమమైన మార్గం.
వారానికి ఒకసారి ఈ సేంద్రీయ ద్రవ ఎరువును వాడటం వల్ల మీ కిచెన్ గార్డెన్లోని పువ్వులు, కూరగాయల మొక్కలు ఏపుగా పెరుగుతాయి.
మరిన్ని లైఫ్ స్టైల్ న్యూస్ కోసం క్లిక్ చేయండి..