పాతకాలం నాటి కోడి కూర రుచి కావాలా..? ఈ చిట్కాలతో ఇంట్లోనే కమ్మని చికెన్ కర్రీ.. ఎంత అన్నమైనా తినొచ్చు..
పాతకాలం నాటి కమ్మని కోడి కూర రుచి ఇప్పుడు ఇంట్లోనే సులువుగా పొందొచ్చు. చికెన్ను సరైన విధంగా మారినేట్ చేయడం, ఇంట్లోనే గరం మసాలా తయారు చేసుకోవడం ద్వారా రుచికరమైన చికెన్ కర్రీని సిద్ధం చేసుకోవచ్చు. ముఖ్యంగా బోనాల పండగ సందర్భంగా నాటు కోడి లేదా బ్రాయిలర్ చికెన్తో ఈ పాతకాలం నాటి పద్ధతిలో కూర తయారు చేసుకుంటే అదిరిపోయే రుచి వస్తుంది.
కోడి కూర.. అనగానే నాన్వెజ్ ప్రియులకు నోరూరుతుంది.. పండగైనా, ఎప్పుడు తినాలన్నా.. చికెన్ తెచ్చుకుని కమ్మగా వండుకోవాల్సిందే.. అయితే.. అంతకుముందు మన పెద్దలు వండితే కూర అద్భుతంగా ఉండేది.. కానీ.. ఇప్పుడు అంతగా రుచి రావడం లేదని పేర్కొంటుంటారు చాలామంది.. అలా తయారు చేయడం చాలా కష్టం అని అనుకుంటారు చాలా మంది. ముఖ్యంగా బ్యాచిలర్స్, వంట కొత్తగా నేర్చుకునే వారికి ఈ ఆలోచన వస్తుంది. కానీ సరైన పద్ధతులు, కొన్ని ముఖ్యమైన చిట్కాలు పాటిస్తే ఎవరైనా తేలికగా, అత్యంత రుచికరమైన పాతకాలం నాటి చికెన్ కర్రీని ఇంట్లోనే వండవచ్చు. బోనాలు పండుగ సందర్భంగా.. అద్భుతమైన నాటుకోడి లేదా బ్రాయిలర్ చికెన్ కూరను ఎలా తయారు చేయాలో ఈ కథనంలో వివరంగా తెలుసుకుందాం..
చికెన్ శుభ్రపరచడం, మారినేషన్:
ముందుగా, నాటు కోడి లేదా బ్రాయిలర్ చికెన్ను చిన్న ముక్కలుగా కట్ చేయించి తీసుకోవాలి. లెగ్ పీస్లు ఉంచదలిస్తే ఉంచుకోవచ్చు. చికెన్ను శుభ్రంగా కడిగి, నీరు పూర్తిగా పోయేలా చిల్లుల గిన్నెలో వేయాలి. ఆ తర్వాత మారినేషన్ ప్రక్రియ మొదలుపెట్టాలి. ఒక 1/4 స్పూన్ పసుపు, ఒక స్పూన్ ఉప్పు, ఒక చెక్క నిమ్మరసం (లేదా ఒక స్పూన్ వెనిగర్), ఒక టేబుల్ స్పూన్ నూనె వేసి ముక్కలకు బాగా పట్టించాలి. ఇలా మారినేట్ చేయడం వల్ల చికెన్ నుండి వచ్చే స్మెల్ తగ్గి, ముక్కలు త్వరగా ఉడికి, జ్యూసీగా మారతాయి. దీన్ని పక్కన పెట్టుకోవాలి. నాటు కోడి అయితే.. ముక్కలను కొంచెం ఉడికిస్తే బాగుంటుంది.
ఇంట్లో తయారుచేసిన గరం మసాలా:
కోడి కూర రుచికి ఇంట్లో చేసుకున్న గరం మసాలా చాలా ముఖ్యం. దీనికోసం ఒక టేబుల్ స్పూన్ ధనియాలు, ఒక బిర్యానీ ఆకు, చిన్న దాల్చిన చెక్క ముక్క, నాలుగు లవంగాలు, ఒక స్టార్ అనైస్, సగం జాపత్రి, రెండు యాలకులు, 10-15 మిరియాలు తీసుకోవాలి. ఈ మసాలా దినుసులను లో ఫ్లేమ్లో రెండు నిమిషాలు వేయించాలి. వేయించిన తర్వాత చల్లార్చి, మెత్తగా పొడి చేసుకోవాలి. ఈ పొడిని ఎక్కువ మొత్తంలో తయారు చేసుకుని నిల్వ చేసుకోవచ్చు, ఇది కర్రీ తయారీని సులభతరం చేస్తుంది.
వంట ప్రక్రియ:
ఒక కడాయిలో నూనె వేసి వేడి చేయాలి. నాన్-వెజ్ కూరలకు నూనె కొంచెం ఎక్కువుంటేనే రుచిగా ఉంటుంది. నూనె వేడయ్యాక 1/2 స్పూన్ జీలకర్ర వేయాలి. ఆ తర్వాత మీడియం సైజు ఉల్లిపాయ ఒకటి సన్నగా తరిగి, రెండు పచ్చిమిర్చి చీలికలు, కొద్దిగా పుదీనా ఆకులు వేసి వేయించాలి. ఉల్లిపాయలు బంగారు రంగు వచ్చేవరకు బాగా వేగాలి, అప్పుడే కూర రుచిగా ఉంటుంది. హై ఫ్లేమ్లో రెండు నిమిషాలు వేయించిన తర్వాత, రెండు మీడియం సైజు టమాటోలు సన్నగా తరిగి (లేదా ప్యూరీగా చేసి) వేయాలి. ఇక్కడ ఒక స్పూన్ ఉప్పు వేయడం వల్ల టమాటోలు త్వరగా మగ్గుతాయి. మూత పెట్టి రెండు నిమిషాలు మీడియం ఫ్లేమ్లో మగ్గనివ్వాలి.
టమాటోలు మగ్గిన తర్వాత అల్లం వెల్లుల్లి పేస్ట్ వేయాలి. ఆనియన్, టమాటో మగ్గకముందే అల్లం వెల్లుల్లి పేస్ట్ వేస్తే అడుగంటి మాడిపోయే అవకాశం ఉంటుంది. ఒక టేబుల్ స్పూన్ అల్లం వెల్లుల్లి పేస్ట్ వేసి 30 సెకన్లు వేయించాలి. తర్వాత లో ఫ్లేమ్లో 1 1/2 టేబుల్ స్పూన్ కారం (మీ రుచికి తగ్గట్టుగా సర్దుబాటు చేయండి), మనం సిద్ధం చేసుకున్న గరం మసాలా పొడి వేసి కొన్ని సెకన్లు వేయించాలి. ఇలా ఆయిల్ లో మసాలా వేయించడం వల్ల కారం వాసన రాదు.
చికెన్ ఉడికించడం:
ఇప్పుడు మారినేట్ చేసుకున్న చికెన్ను వేసి, మసాలా అంతా ముక్కలకు బాగా పట్టేలా కలపాలి. చాలా మంది వెంటనే నీళ్లు పోస్తారు, అలా చేయకూడదు. మీడియం ఫ్లేమ్లో మూత పెట్టకుండా 10 నిమిషాలు ఉడకనివ్వాలి, అప్పుడప్పుడు కలుపుతూ ఉండాలి. ఈ దశలో చికెన్ ఆయిల్ లో బాగా వేగి, మసాలాలు ముక్కలకు పట్టి, ముక్కలో నుండి నీళ్లు ఊరతాయి. ఇది కూర రుచికి చాలా ముఖ్యం. 10 నిమిషాల తర్వాత, ముక్క సైజు తగ్గి, కొంచెం నీరు ఊరడం గమనిస్తారు.
ఇప్పుడు గ్రేవీకి సరిపడా ఒక కప్పు నీళ్లు పోయాలి. ఎక్కువ గ్రేవీ కావాలంటే అర కప్పు నుండి ఒక కప్పు వరకు అదనంగా నీళ్లు పోసుకోవచ్చు. బాగా కలిపి, ఈ సమయంలో ఉప్పు, కారం సరిపోయిందో లేదో చూసి, అవసరమైతే కలుపుకోవచ్చు. మూత పెట్టి, ఐదు నిమిషాలు హై ఫ్లేమ్లో, ఆ తర్వాత ఐదు నిమిషాలు మీడియం ఫ్లేమ్లో ఉడికించాలి. మొత్తం 20 నిమిషాల్లో కోడి కూర చక్కగా ఉడికిపోతుంది. ముక్కలు జ్యూసీగా, రుచికరంగా తయారవుతాయి.
చివరగా, కూర టెక్చర్ చూసి, నూనె పైకి తేలి, గ్రేవీ చిక్కబడితే ఫైనల్గా కొత్తిమీర వేసి దించేయాలి. ఈ చిట్కాలను పాటించడం వల్ల అల్లం వెల్లుల్లి పేస్ట్, గరం మసాలా పొడి రెడీగా ఉంటే, చికెన్ కర్రీ వండడం కూరగాయల కూరల కంటే సులభం.. ఇలా రుచిచూస్తే అస్సలు వదిలిపెట్టకుండా ఆస్వాదిస్తూ తినొచ్చు..
మరిన్ని లైఫ్స్టైల్ వార్తల కోసం ఇక్కడ క్లిక్ చేయండి..