
శీతాకాలం ప్రారంభం కాగానే చల్లని గాలుల ప్రభావం మన చర్మంతో పాటు జుట్టు మీద కూడా తీవ్రంగా పడుతుంది. ఈ కాలంలో తల చర్మం పొడిబారడం, దురద పుట్టడం, జుట్టు జీవం కోల్పోయి చిక్కులు పడటం వంటి సమస్యలు ఎక్కువగా కనిపిస్తాయి. ఇలాంటి సమయంలో చాలా మంది గోరువెచ్చని నూనెతో తలకు మర్దన చేసుకుంటారు. అయితే, చలికాలంలో జుట్టుకు కొబ్బరి నూనె వాడాలా లేక ఆవ నూనె వాడాలా అనే విషయంలో తరచూ గందరగోళం ఏర్పడుతుంది. వీటిలో ఏది ఎక్కువ ప్రయోజనకరమో శాస్త్రీయ పరిశోధనల ఆధారంగా తెలుసుకుందాం.
జర్నల్ ఆఫ్ కాస్మెటిక్ సైన్స్ లో ప్రచురితమైన ఒక అధ్యయనం ప్రకారం, ఆరోగ్యకరమైన, దెబ్బతిన్న జుట్టు రెండింటిలోనూ ప్రోటీన్ నష్టాన్ని తగ్గించడంలో కొబ్బరి నూనె అద్భుతంగా పనిచేస్తుంది. కొబ్బరి నూనెలోని అణువులు చాలా చిన్నవిగా ఉండటం వల్ల ఇది జుట్టు కుదుళ్ల లోపలి పొరల వరకు సులభంగా చొచ్చుకుపోయి లోతైన పోషణను అందిస్తుంది. దీనివల్ల జుట్టు మధ్యలో తెగిపోవడం తగ్గి మృదువుగా మారుతుంది.
ఇంటర్నేషనల్ జర్నల్ ఆఫ్ ట్రైకాలజీ నివేదిక ప్రకారం, ఆవ నూనె తలపై ఏర్పడే ఫంగల్ ఇన్ఫెక్షన్ల ప్రమాదాన్ని కొంతవరకు తగ్గించడంలో సహాయపడుతుంది. చలికాలంలో స్కాల్ప్ పొడిబారి పొట్టులా రాలే సమస్య ఉంటే ఆవ నూనె కొంత ఉపశమనం కలిగిస్తుంది. అయితే, ఇది చుండ్రును పూర్తిగా నయం చేస్తుందనడానికి ఖచ్చితమైన ఆధారాలు లేవు.
పొడిబారిన, దెబ్బతిన్న జుట్టు కోసం: తలస్నానం చేయడానికి ముందు జుట్టు పొడవునా కొబ్బరి నూనె రాసుకోవడం అత్యుత్తమ ఎంపిక. ఇది జుట్టుకు తేమను అందించి పొడిబారకుండా కాపాడుతుంది.
పొడి స్కాల్ప్ కోసం: మీ తల చర్మం మరీ పొడిగా ఉండి, ఆవ నూనె వాడాలనుకుంటే ముందుగా ప్యాచ్ టెస్ట్ చేసుకొని కొద్ది పరిమాణంలో మాత్రమే ఉపయోగించాలి.
జిడ్డు చర్మం ఉన్నవారు: ఒకవేళ మీ స్కాల్ప్ జిడ్డుగా ఉన్నా లేదా సున్నితంగా ఉన్నా నూనెకు బదులుగా కేవలం జుట్టు చివర్లకు కండీషనర్ వాడటం మంచిది.