దీపావళి ధమాకా..! పండగ రోజు సినిమాకు క్యూ కట్టిన జనం.. బాక్సాఫీస్ వద్ద రామాయణ రికార్డుల వేట..
రణ్‌బీర్ కపూర్, సాయి పల్లవి సీతారాములుగా నటించిన సినిమా రామాయణ. దంగల్ ఫేమ్ నితేశ్ తివారీ తెరకెక్కించిన ఈ మైథలాజికల్ మూవీలో కన్నడ స్టార్ యశ్ రావణుడిగా నటించాడు. దీపావళి కానుకగా నవంబర్ 05న విడుదలైన ఈ సినిమా మొదటి షో నుంచే బ్లాక్ బస్టర్ టాక్ తెచ్చుకుంది.
బాలీవుడ్‌లో అత్యంత భారీ బడ్జెట్‌తో ప్రతిష్ఠాత్మకంగా తెరకెక్కిన రామాయణ సినిమా బాక్సాఫీస్ వద్ద సంచలనాలు సృష్టిస్తోంది. విడుదలైన తొలి రోజు నుంచే భారీ వసూళ్లతో దూసుకెళ్తున్న ఈ చిత్రం.. కేవలం నాలుగు రోజుల్లోనే ప్రపంచవ్యాప్తంగా రూ.500 కోట్ల మార్కుకు చేరువైంది. ముఖ్యంగా దీపావళి పండుగ సందర్భంగా ఈ మూవీ సాధించిన వసూళ్లు ట్రేడ్ వర్గాలను సైతం ఆశ్చర్యపరుస్తున్నాయి. దీపావళి ఆదివారం రావడంతో థియేటర్లకు ప్రేక్షకులు భారీగా తరలివచ్చారు. ఈ క్రమంలో ఒక్క ఆదివారం రోజే ఇండియాలో రూ.56.15 కోట్ల నెట్ వసూళ్లను రాబట్టింది. దీంతో బాలీవుడ్‌లో దీపావళి రోజున అత్యధిక వసూళ్లు సాధించిన చిత్రంగా రామాయణ సరికొత్త రికార్డును నెలకొల్పింది. ఇప్పటివరకు ఈ రికార్డు సల్మాన్ ఖాన్ నటించిన టైగర్ 3 పేరిట ఉండేది. 2023లో విడుదలైన ఈ సినిమా దీపావళి రోజున రూ.44.50 కోట్ల నెట్ వసూళ్లను సాధించింది. ఇక 2024లో వచ్చిన సింగమ్ ఎగైన్ రూ.43.50 కోట్లతో తర్వాతి స్థానంలో నిలిచింది.
ఇక సినిమా తొలి నాలుగు రోజుల కలెక్షన్లను పరిశీలిస్తే.. మొదటి రోజు ఇండియాలో రూ.64.85 కోట్ల నెట్ వసూళ్లు సాధించింది. రెండో రోజు రూ.48.05 కోట్లు రాబట్టగా.. మూడో రోజు ప్రేక్షకుల నుంచి మరింత ఆదరణ లభించడంతో రూ.69.80 కోట్లను ఖాతాలో వేసుకుంది. ఇక నాలుగో రోజు దీపావళి సందర్భంగా రూ.56.15 కోట్ల నెట్ వసూళ్లను సాధించింది. దీంతో నాలుగు రోజుల్లో ఇండియా వైడ్ గా ఈ సినిమా మొత్తం నెట్ కలెక్షన్లు రూ.238.85 కోట్లకు చేరుకున్నాయి. గ్రాస్ వసూళ్ల విషయానికి వస్తే.. భారత్‌లో రూ.285.20 కోట్లు రాబట్టిన ఈ చిత్రం.. ఓవర్సీస్ మార్కెట్‌లోనూ మంచి వసూళ్లను సాధించింది. విదేశాల్లో ఇప్పటివరకు రూ.214 కోట్ల గ్రాస్ కలెక్షన్లు వచ్చినట్లు సమాచారం.
దీంతో ప్రపంచవ్యాప్తంగా మొత్తం వసూళ్లు రూ.499.20 కోట్లకు చేరుకున్నాయి. అంటే కేవలం నాలుగు రోజుల్లోనే రూ.500 కోట్ల క్లబ్‌లో చేరేందుకు అడుగు దూరంలో నిలిచింది. మరోవైపు ప్రభాస్ నటించిన ‘ఆదిపురుష్’ సినిమా తొలి నాలుగు రోజుల్లో భారత్‌లో సాధించిన రూ.237 కోట్ల నెట్ వసూళ్లను కూడా రామాయణ అధిగమించడం విశేషం. దీంతో ఈ సినిమా బాక్సాఫీస్ వద్ద మరో అరుదైన ఘనతను సొంతం చేసుకుంది. ఇదే జోరు కొనసాగితే రాబోయే రోజుల్లో మరిన్ని రికార్డులు బద్దలయ్యే అవకాశాలు కనిపిస్తున్నాయి. మొత్తానికి రామాయణ బాక్సాఫీస్ కలెక్షన్స్ ఇండస్ట్రీలో హాట్ టాపిక్ గా మారాయి.
మరిన్ని సినిమా వార్తల కోసం ఇక్కడ క్లిక్ చేయండి