Most wanted గర్ల్‌ ఫ్రెండ్‌ అరెస్ట్‌.. జైల్లో అష్టకష్టాలు! ఏం జరిగిందంటే..?

దాదాపు 60 లక్షల మంది ఇన్‌స్టాగ్రామ్ ఫాలోవర్లు ఉన్న ప్రముఖ డచ్ OnlyFans మోడల్ వెరా డిజ్‌మన్స్ (29) అమెరికాలో ICE అధికారుల అదుపులోకి వెళ్లింది. ఇమ్మిగ్రేషన్ కోర్టు విచారణకు హాజరుకాకపోవడంతో ఆమెపై తొలగింపు ఉత్తర్వులు జారీ అయినట్లు అమెరికా అధికారులు వెల్లడించారు. ప్రస్తుతం న్యూజెర్సీలోని డెలానీ హాల్ నిర్బంధ కేంద్రంలో ఉన్న ఆమెకు అక్కడ సరైన ఆహారం, పరిశుభ్రత, వసతులు లేవని కుటుంబ సభ్యులు ఆరోపిస్తున్నారు. మరోవైపు, ఇమ్మిగ్రేషన్ నిబంధనల ప్రకారమే చర్యలు తీసుకుంటున్నామని అమెరికా హోంల్యాండ్ సెక్యూరిటీ విభాగం స్పష్టం చేసింది..

Most wanted గర్ల్‌ ఫ్రెండ్‌ అరెస్ట్‌.. జైల్లో అష్టకష్టాలు! ఏం జరిగిందంటే..?
Most Wanted Girlfriend Vera Dijkmans

Updated on: Nov 18, 2026 | 6:53 AM

అమెరికాలో మరో సంచలన ఘటన వెలుగులోకి వచ్చింది. తనను తాను ‘ప్రపంచంలోనే అత్యధికంగా కోరుకునే గర్ల్‌ఫ్రెండ్‌’గా అభివర్ణించుకున్న ప్రముఖ OnlyFans మోడల్, సోషల్ మీడియా ఇన్‌ఫ్లుయెన్సర్ వెరా డిజ్‌మన్స్ (29)ను అమెరికా ఇమ్మిగ్రేషన్ అండ్ కస్టమ్స్ ఎన్‌ఫోర్స్‌మెంట్ (ICE) అధికారులు అదుపులోకి తీసుకున్నారు. న్యూజెర్సీలోని డెలానీ హాల్ డిటెన్షన్ కేంద్రంలో ఆమెను ఉంచినట్లు కుటుంబ సభ్యులు వెల్లడించారు. అక్కడి పరిస్థితులపై ఆమె కుటుంబం తీవ్ర ఆందోళన వ్యక్తం చేస్తోంది. దాదాపు 60 లక్షల మంది ఇన్‌స్టాగ్రామ్ ఫాలోవర్లు, OnlyFansలో 8.75 లక్షల మంది సబ్‌స్క్రైబర్లు ఉన్న వెరా.. నవంబర్ 11న మియామీ నుంచి న్యూయార్క్‌కు విమానంలో ప్రయాణించి నెవార్క్ లిబర్టీ అంతర్జాతీయ విమానాశ్రయానికి చేరుకుంది. అక్కడే ICE అధికారులు ఆమెను అదుపులోకి తీసుకున్నట్లు సమాచారం. న్యూయార్క్‌లోని మాడిసన్ స్క్వేర్ గార్డెన్‌లో జరగనున్న UFC 334 కార్యక్రమానికి హాజరై, ఫైటర్లతో కలిసి కంటెంట్ రూపొందించాలనేది ఆమె ప్రణాళికగా తెలుస్తోంది.

వెరాను ICE అధికారులు ఎందుకు అదుపులోకి తీసుకున్నారు?

వెరా ఇమ్మిగ్రేషన్ కోర్టు విచారణకు హాజరుకాకపోవడంతో ఆమెపై తొలగింపు ఉత్తర్వులు (Removal Order) జారీ అయినట్లు కుటుంబ సభ్యులు చెబుతున్నారు. విచారణ తేదీకి సంబంధించిన నోటీసు తనకు అందకపోవడం వల్లే కోర్టుకు హాజరు కాలేకపోయిందని ఆమె సోదరి ఇజా డిజ్‌మన్స్ వెల్లడించింది. ఈ విషయంపై న్యాయవాదిని సంప్రదించినప్పటికీ, ఇప్పటికే తొలగింపు ఉత్తర్వులు ఉండటంతో సమస్యను పరిష్కరించడం కష్టమైందని ఆమె తెలిపింది. గ్రీన్ కార్డ్ దరఖాస్తుకు సంబంధించిన ఇమ్మిగ్రేషన్ అపాయింట్‌మెంట్‌కు కూడా వెరా హాజరుకాలేదని ఆమె తల్లి మరియానే స్కోల్ట్ పేర్కొన్నారు. వెరా తరచూ ప్రయాణాలు చేయడం, హోటళ్లలో బస చేయడం వల్ల అధికారిక నోటీసులు అందకపోయి ఉండవచ్చని ఆమె తల్లి అభిప్రాయపడ్డారు. ఆమె అమెరికాలో టూరిస్ట్ వీసాపై ఉన్నట్లు సమాచారం. ఈ వీసాపై ఉద్యోగం చేయడానికి అనుమతి ఉండదని, అయితే అమెరికాలో ఉన్న సమయంలో వెరా కంటెంట్ క్రియేట్ చేసిందని ఆమె తల్లి అంగీకరించారు.

డిటెన్షన్ కేంద్రంలో దారుణ పరిస్థితులు?

న్యూజెర్సీలోని డెలానీ హాల్ నిర్బంధ కేంద్రంలో వెరా ఎదుర్కొంటున్న పరిస్థితులపై కుటుంబ సభ్యులు తీవ్ర ఆరోపణలు చేస్తున్నారు. అక్కడ ఆహారం నాణ్యతగా లేదని, పరిశుభ్రత లోపించిందని, గదుల్లో అధిక సంఖ్యలో ఖైదీలను ఉంచుతున్నారని పేర్కొన్నారు. వెరా మరో 12 మంది మహిళలతో కలిసి ఒకే గదిలో ఉంటోందని ఆమె సోదరి తెలిపింది. అక్కడి వాతావరణం ఎప్పుడూ ఉద్రిక్తంగా ఉంటోందని, సరైన నిద్ర కూడా ఉండటం లేదని ఆవేదన వ్యక్తం చేసింది. అంతేకాకుండా, ఆరు రోజులుగా ఆమెకు సూర్యరశ్మి కూడా కనిపించలేదని, కిటికీలు మూసి ఉంచారని సోదరి ఆరోపించింది. నిర్బంధ కేంద్రంలోని సిబ్బంది ప్రవర్తన వల్ల కూడా ఆమె భయాందోళనలకు గురవుతోందని పేర్కొంది. వెరాను చూడటానికి నెదర్లాండ్స్ నుంచి అమెరికాకు వచ్చిన ఆమె తల్లి కూడా కుమార్తె పరిస్థితిని చూసి కన్నీళ్లు పెట్టుకున్నట్లు డచ్ మీడియా వెల్లడించింది. జైలు దుస్తుల్లో ఉన్న తన కుమార్తెను చూసి గుర్తుపట్టలేకపోయానని ఆమె ఆవేదన వ్యక్తం చేశారు.

ఇవి కూడా చదవండి

వెరాకు కుటుంబ సభ్యులతో మాట్లాడేందుకు ఇచ్చే ఫోన్ కాల్స్ సమయాన్ని కూడా తగ్గించినట్లు ఆమె తల్లి ఆరోపించారు. గతంలో 45 నిమిషాల వరకు మాట్లాడేందుకు అవకాశం ఉండగా, ప్రస్తుతం కేవలం ఐదు నిమిషాలకే పరిమితం చేశారని తెలిపారు. ఈ కేంద్రంలో సుమారు 60 మంది నిర్బంధితులకు నాలుగు ఫోన్లు మాత్రమే అందుబాటులో ఉన్నట్లు కుటుంబ సభ్యులు పేర్కొన్నారు. ఈ వ్యవహారంపై నెదర్లాండ్స్ ప్రభుత్వం, అమెరికాలోని తమ రాయబార కార్యాలయం ద్వారా స్పందించింది. వెరా కేసు తమ దృష్టికి వచ్చిందని, ఆమెకు అవసరమైన కాన్సులర్ సహాయం అందిస్తున్నామని ప్రభుత్వ ప్రతినిధి తెలిపారు. అయితే వ్యక్తిగత గోప్యత కారణంగా మరిన్ని వివరాలు వెల్లడించలేదు.

వెరా ఇమ్మిగ్రేషన్ చరిత్రపై DHS కీలక ప్రకటన

మరోవైపు అమెరికా హోంల్యాండ్ సెక్యూరిటీ విభాగం (DHS) వెరా ఇమ్మిగ్రేషన్ చరిత్రకు సంబంధించిన వివరాలను వెల్లడించింది. 2019 మార్చిలో హ్యూస్టన్‌లోని జార్జ్ బుష్ అంతర్జాతీయ విమానాశ్రయం ద్వారా అక్రమంగా అమెరికాలోకి ప్రవేశించేందుకు ప్రయత్నించినప్పుడు కస్టమ్స్ అండ్ బోర్డర్ ప్రొటెక్షన్ అధికారులు ఆమెను అరెస్టు చేసి దేశం నుంచి పంపించినట్లు తెలిపింది. అనంతరం 2024 ఆగస్టులో ఆమెకు తాత్కాలికంగా అమెరికాలోకి ప్రవేశించేందుకు అనుమతి ఇచ్చినట్లు పేర్కొంది. అయితే అనుమతించిన గడువు ముగిసిన తర్వాత కూడా ఆమె దేశంలోనే ఉన్నారని ఆరోపించింది. 2025 ఆగస్టులో ఆమెపై తొలగింపు ప్రక్రియ ప్రారంభమైందని, 2026 మేలో ఇమ్మిగ్రేషన్ న్యాయమూర్తి తుది తొలగింపు ఉత్తర్వులు జారీ చేశారని DHS వెల్లడించింది. విచారణకు ఆమె హాజరుకాకపోవడంతో ఈ నిర్ణయం తీసుకున్నట్లు పేర్కొంది. గ్రీన్ కార్డ్ కోసం దరఖాస్తు చేసుకున్నంత మాత్రాన అమెరికాలో చట్టబద్ధమైన వలస హోదా లభించదని DHS ప్రతినిధి స్పష్టం చేశారు. తగిన న్యాయ ప్రక్రియ అనంతరం ఆమెను ICE కస్టడీలోనే ఉంచి దేశం నుంచి తొలగించే ప్రక్రియ కొనసాగిస్తామని తెలిపారు.

5 వేల మందికి పైగా ఆమెకు ప్రపోజ్ చేశారా?

వెరా డిజ్‌మన్స్ గతంలోనూ తన వ్యక్తిగత జీవితం కారణంగా వార్తల్లో నిలిచారు. 2023లో తనను ప్రేమించి పెళ్లి చేసుకోవాలనుకునే పురుషుల నుంచి దరఖాస్తులు ఆహ్వానించారు. ఉద్యోగం, నివాసం, గత ప్రేమ సంబంధాలు వంటి వివరాలను దరఖాస్తులో పొందుపరచాలని సూచించారు. ఈ ప్రక్రియకు సుమారు 5 వేల మంది పురుషులు స్పందించినట్లు ఆమె గతంలో పేర్కొన్నారు. అయితే ఇంతమంది ఆసక్తి చూపినప్పటికీ, ఈ ప్రయత్నం ద్వారా తనకు సరైన జీవిత భాగస్వామి దొరకలేదని సమాచారం. 2025 జనవరిలో డైలీ మెయిల్‌కు ఇచ్చిన ఇంటర్వ్యూలో తనకు కాబోయే భాగస్వామి తొలి డేటింగ్‌ను ప్రత్యేకంగా ప్లాన్ చేయాలని, బహుమతి కూడా తీసుకురావాలని తన అభిప్రాయాన్ని వెల్లడించారు. లూయిస్ విట్టన్, హెర్మెస్ వంటి లగ్జరీ బ్రాండ్ల దుస్తులు తనకు బహుమతిగా వచ్చాయని, అయితే బహుమతి ధర కంటే దాని వెనుక ఉన్న ఆలోచన ముఖ్యమని ఆమె చెప్పినట్లు కథనాలు పేర్కొన్నాయి. ప్రస్తుతం వెరా డిజ్‌మన్స్ అమెరికా ఇమ్మిగ్రేషన్ అధికారుల అదుపులో ఉండటంతో ఈ వ్యవహారం అంతర్జాతీయంగా చర్చనీయాంశంగా మారింది. ఒకవైపు ఆమె కుటుంబం నిర్బంధ కేంద్రంలోని పరిస్థితులపై ఆందోళన వ్యక్తం చేస్తుండగా, మరోవైపు అమెరికా అధికారులు ఇమ్మిగ్రేషన్ నిబంధనల ప్రకారం చర్యలు కొనసాగిస్తున్నట్లు చెబుతున్నారు.

Loading...
Unable to load recommendations.
Follow Us