Google AI Plus: విద్యార్థులకు గూగుల్ బంపర్ ఆఫర్.. ఏడాది పాటు AI ప్లాన్స్ ఫ్రీ! Geminiలో అదిరిపోయే స్టడీ ఫీచర్లు
Google AI Plus Free For Students: కాలేజీ విద్యార్థులకు గూగుల్ గుడ్న్యూస్ చెప్పింది. భారత్ సహా 140కి పైగా దేశాల్లో అర్హత కలిగిన విద్యార్థులకు Google AI Plusను ఏడాది పాటు ఉచితంగా అందించనుంది. అమెరికా విద్యార్థులకు Google AI Proను ఉచితంగా అందిస్తోంది.
Google AI Plus Free For Students: కాలేజీ విద్యార్థులకు గూగుల్ గుడ్న్యూస్ చెప్పింది. ఆర్టిఫిషియల్ ఇంటెలిజెన్స్ (AI) సేవలను విద్యార్థులకు మరింత అందుబాటులోకి తీసుకురావడంలో భాగంగా.. ఎంపికైన దేశాల్లో విద్యార్థులకు ఏడాది పాటు గూగుల్ ఏఐ ప్లాన్స్ను ఉచితంగా అందించనున్నట్లు ప్రకటించింది. ఈ మేరకు గూగుల్ ఆగస్టు 19న ప్రకటన చేసింది.
అమెరికా విద్యార్థులకు Google AI Pro ఉచితం
అమెరికాలో అర్హత కలిగిన కాలేజీ విద్యార్థులు Google AI Pro ప్లాన్ను 12 నెలల పాటు ఉచితంగా పొందవచ్చు. సాధారణంగా ఈ ప్లాన్కు నెలకు $19.99 చెల్లించాలి. AI Proలో అధిక Gemini వినియోగ పరిమితులతో పాటు Gemini Spark, Gmail, Google Docs వంటి యాప్స్లోని AI ఫీచర్లు, 5TB స్టోరేజ్ వంటి సదుపాయాలు ఉన్నాయి.
భారత్లో Google AI Plus ఫ్రీ
భారత్తో పాటు 140కి పైగా దేశాల్లోని అర్హత కలిగిన విద్యార్థులకు Google AI Plus ప్లాన్ను ఏడాది పాటు ఉచితంగా అందిస్తోంది. ఇందులో Gemini Omni, అధిక వినియోగ పరిమితులు, అదనపు స్టోరేజ్ వంటి ప్రయోజనాలు లభిస్తాయి. అంతేకాకుండా ఎంపిక చేసిన Google AI Pro ఆఫర్లు, YouTube Premium సబ్స్క్రిప్షన్లపై విద్యార్థులకు 70 శాతం వరకు డిస్కౌంట్ కూడా అందించనున్నట్లు గూగుల్ తెలిపింది.
విద్యార్థుల కోసం ప్రత్యేక Gemini హబ్
విద్యార్థుల అవసరాలను దృష్టిలో పెట్టుకుని Gemini యాప్లో ప్రత్యేకమైన Student Hubను గూగుల్ ఏర్పాటు చేసింది. ఇందులో ఒకే చోట స్టడీ నోట్బుక్స్, ఫ్లాష్కార్డులు, ప్రాక్టీస్ క్విజ్లు, ఇతర లెర్నింగ్ టూల్స్ అందుబాటులో ఉంటాయి. భవిష్యత్తులో విద్యార్థుల కోసం తీసుకురానున్న కొత్త Gemini ఫీచర్లను కూడా ఈ విభాగం నుంచే యాక్సెస్ చేసుకునే అవకాశం ఉంటుంది.
స్టడీ నోట్బుక్స్తో సులభంగా చదువు
గూగుల్ జూన్లో పరిచయం చేసిన Study Notebooks ఫీచర్ ద్వారా విద్యార్థులు తమ లెక్చర్ నోట్స్, క్లాస్ మెటీరియల్ను Geminiలోకి అప్లోడ్ చేసుకోవచ్చు. వాటిని ఆధారంగా చేసుకుని Gemini స్టడీ ప్లాన్ను రూపొందిస్తుంది. ముందుగా విద్యార్థికి ఏ అంశాల్లో అవగాహన తక్కువగా ఉందో తెలుసుకునేందుకు క్విజ్లు నిర్వహిస్తుంది. అనంతరం ఆ అంశాలకు అనుగుణంగా పాఠాలు, క్విజ్లను రూపొందిస్తుంది.
అలాగే విద్యార్థుల ప్రగతిని తెలుసుకునేందుకు Progress Dashboard కూడా ఉంటుంది. త్వరలో పాఠాల్లో గ్రాఫిక్స్, చిత్రాలను కూడా జోడించనున్నట్లు గూగుల్ తెలిపింది. సిలబస్లోని పరీక్షలు, అసైన్మెంట్ డెడ్లైన్లను గుర్తించి, విద్యార్థి అనుమతితో వాటిని Google Calendarలో చేర్చే ఫీచర్పై కూడా గూగుల్ పనిచేస్తోంది.
ఇంటరాక్టివ్ విజువల్స్తో లెర్నింగ్
పాఠాలను కేవలం టెక్స్ట్ రూపంలో కాకుండా విజువల్గా అర్థం చేసుకోవాలనుకునే విద్యార్థులకు Gemini కొత్త అవకాశాలను అందిస్తోంది. ప్రశ్నకు అనుగుణంగా 3D సిమ్యులేషన్లు, టేబుళ్లు, గ్రిడ్లు వంటి ఇంటరాక్టివ్ విజువల్స్ను రూపొందించగలదు. ఉదాహరణకు బయాలజీ విద్యార్థులు DNA ఎలా పనిచేస్తుందో 3D మోడల్ ద్వారా చూసి, దాన్ని తిప్పుతూ వివిధ కోణాల్లో పరిశీలించవచ్చు. అలాగే పెండ్యులమ్లో శక్తి బదిలీని లేదా వ్యాపారంలో క్యాష్ బర్న్ రేట్లను ఇంటరాక్టివ్ రూపంలో అర్థం చేసుకోవచ్చు.
Gemini Liveలో Deep Research
విద్యార్థుల రీసెర్చ్ అవసరాల కోసం Deep Research సామర్థ్యాలను Gemini Liveకు కూడా గూగుల్ తీసుకొస్తోంది. విద్యార్థులు Geminiకి మల్టీ-స్టెప్ రీసెర్చ్ టాస్క్ అప్పగించవచ్చు. Gemini రీసెర్చ్ చేస్తుండగా విద్యార్థులు ఇతర పనులు చేసుకోవచ్చు. రిపోర్ట్ సిద్ధమైన తర్వాత దానిపై Gemini Liveతో సంభాషిస్తూ మరిన్ని ప్రశ్నలు అడగవచ్చు, వివరాలను స్పష్టీకరించుకోవచ్చు, అవసరమైతే రీసెర్చ్ను మరింత మెరుగుపరచుకోవచ్చు.
మొత్తంగా చూస్తే, చదువు, అసైన్మెంట్లు, పరీక్షల ప్రిపరేషన్, రీసెర్చ్ వంటి విద్యార్థుల రోజువారీ అవసరాల్లో AIని మరింత విస్తృతంగా ఉపయోగించుకునేలా గూగుల్ ఈ కొత్త ఫీచర్లను తీసుకొస్తోంది.