ఇటీవల కాలంలో పెద్ద సంఖ్యలో ఉద్యోగుల ప్రావిడెంట్ ఫండ్ సభ్యులు ఈపీఎఫ్ ఖాతాల నుంచి ఉపసంహరణ క్లెయిమ్లు చేసే సమయంలో అనేక సమస్యలను ఎదుర్కొంటున్నారు. ఉద్యోగుల ప్రావిడెంట్ ఫండ్ ఆర్గనైజేషన్ (ఈపీఎఫ్ఓ) వారి డేటాబేస్లోని వివరాలు ఈపీఎఫ్ సభ్యుడు ఇచ్చిన వివరాలతో సరిపోలకపోతే పీఎఫ్ విత్డ్రా క్లెయిమ్ రిజెక్ట్ అవుతుందని నిపుణులు చెబుతున్నారు. పేరు, పుట్టిన తేదీ, అసంపూర్ణమైన కేవైసీ రికార్డ్ ఈపీఎఫ్ఓ క్లెయిమ్ రిజెక్ట్ అవ్వడానికి కారణాలుగా ఉంటున్నాయి. ఈ నేపథ్యంలో ఎలాంటి ఇబ్బంది లేకుండా పీఎఫ్ విత్డ్రా చేసుకోవాలంటే మన వ్యక్తిగత వివరాలన్నీ కరెక్ట్గా ఉంచుకుని, అప్పుడే పీఎఫ్ విత్ డ్రా క్లెయిమ్ పెట్టాలని నిపుణులు సూచిస్తున్నారు. ఈ నేపథ్యంలో పీఎఫ్ విత్డ్రా రిజెక్ట్ అవ్వకుండా ఉండాలంటే ఎలాంటి జాగ్రత్తలు తీసుకోవాలో? ఓసారి తెలుసుకుందాం.
ఏదైనా ఈపీఎఫ్ క్లెయిమ్ ఫైల్ చేసే ముందు ఆ వ్యక్తి ఈపీఎఫ్ఓకు సంబంధించిన మెంబర్ సేవా పోర్టల్లో నిర్దిష్ట వివరాలను తనిఖీ చేయాలి. ఈపీఎఫ్ సభ్యులు ఎల్లప్పుడూ వారి ఈపీఎఫ్ఓ రికార్డులలో చేరిన, నిష్క్రమించే తేదీలు, యజమాని వివరాలకు సంబంధించి సరైన, లేటెస్ట్ ఇన్పర్మేషన్ ఉందో? లేదో? తనిఖీ చేయాలి. ఈపీఎఫ్ ఉపసంహరణ క్లెయిమ్ను సజావుగా ప్రాసెస్ చేయడంలో అప్ డేట్ చేసిన సమాచారం చాలా కీలకంగా ఉంటుంది. ఇలా చేయడం ద్వారా ఒక ఉద్యోగం నుంచి మరొక ఉద్యోగానికి మారిన సమయంలో ఈపీఎఫ్ ఖాతా సజావుగా బదిలీ అవుతుంది. అందువల్ల ఈపీఎఫ్ ఖాతాదారుడు తప్పనిసరిగా యూనివర్సల్ ఖాతా నంబర్ యాక్టివేట్ చేసి, అందులో తాజా ఉద్యోగ వివరాలతో అప్డేట్ చేసి ఉండాలని నిపుణులు సూచిస్తున్నారు.
అలాగే ఉపసంహరణకు సంబంధించిన సంబంధిత బ్యాంక్ ఖాతా సమాచారాన్ని అందించాలి. ఈపీఎఫ్ సభ్యులు తప్పనిసరిగా బ్యాంకు ఖాతా నంబర్ను ఒకటికి రెండుసార్లు తనిఖీ చేయాలి. ముఖ్యంగా ఐఎఫ్ఎస్సీ వివరాలు ఎప్పటికప్పుడు తనిఖీ చేసుకోవాలని నిపుణులు సూచిస్తున్నారు. అలాగే ఐడీతో పాటు చిరునామా ప్రూఫ్లు తప్పనిసరిగా ఈపీఎఫ్ రికార్డులలోని వివరాలతో సరిపోలాలి. ఇందులో పేరు, పుట్టిన తేదీ, తండ్రి పేరు, జెండర్ వంటి వివరాలు ఉంటాయి. ఈ వివరాలను తనిఖీ చేయడానికి యూఏఎన్ అకౌంట్లో లాగిన్ అవ్వాల్సి ఉంటుంది. ఈపీఎఫ్ సభ్యులు సంబంధింత వివరాలను అప్డేట్ చేయడంలో విఫలమైతే క్లెయిమ్ను తిరస్కరించే అవకాశం ఉంది. కాబట్టి క్లెయిమ్ ఫైల్ చేసే ముందు ఈ వివరాలను తనిఖీ చేయాలి. అలాగే క్లెయిమ్ చేసే సమయంలో మనకు అవసరమైన ఫామ్ను ఎంచుకున్నప్పుడే క్లెయిమ్ ప్రాసెస్ స్టార్ట్ అవుతుందని గమనించాలి. అందువల్ల క్లెయిమ్ ఫారమ్ వివరాలను సరి చూసుకోవాలి. ఈపీఎఫ్ ఉపసంహరణకు అర్హత ప్రమాణాలను ధ్రువీకరించడం చాలా ముఖ్యం. ఎందుకంటే ఉపసంహరణకు సంబంధించిన వివిధ ప్రయోజనాల కోసం వేర్వేరు షరతులు ఉంటాయని నిపుణులు వివరిస్తున్నారు.
మరిన్ని బిజినెస్ వార్తల కోసం ఇక్కడ క్లిక్ చేయండి