ప్రకృతి వైపరీత్యాలతో కారు దెబ్బతింటే ఇన్సూరెన్స్ వస్తుందా? క్లెయిమ్ రూల్స్ ఇవే!
వర్షాకాలంలో లేదా తుఫానులు వచ్చినప్పుడు వరద నీటిలో కార్లు మునిగిపోవడం, ఈదురు గాలులకు చెట్లు లేదా విద్యుత్ స్తంభాలు కార్లపై విరిగి పడటం మనం తరచూ చూస్తుంటాం. ఇలాంటి సందర్భాల్లో వాహన దారులకు భారీ ఆర్థిక నష్టం వాటిల్లుతుంది. అయితే, ప్రకృతి వైపరీత్యాల వల్ల కారు దెబ్బతిన్నప్పుడు బీమా సంస్థ నుండి క్లెయిమ్ ఎలా పొందాలో, దానికి ఉన్న ముఖ్యమైన నియమాలు ఏంటో చాలామందికి తెలియదు. ఆ వివరాలు ఇప్పుడు చూద్దాం.
భారీ వర్షాలు, వరదలు, ఈదురు గాలులు లేదా చెట్లు విరిగి పడటం వల్ల కార్లు దెబ్బతిన్నప్పుడు ఇన్సూరెన్స్ క్లెయిమ్ చేసుకోవడానికి నిర్దిష్ట నియమాలు ఉంటాయి. ఇలాంటి సందర్భాలలో కేవలం సమగ్ర కార్ ఇన్సూరెన్స్ (Comprehensive Car Insurance) పాలసీ ఉన్నవారికి మాత్రమే బీమా పరిహారం లభిస్తుంది. సాధారణ థర్డ్ పార్టీ ఇన్సూరెన్స్ దీనికి వర్తించదు. ప్రకృతి వైపరీత్యాల వల్ల నష్టం వాటిల్లినప్పుడు ఏం చేయాలి..? ఎలాంటి నియమాలను పాటించాలి..?
పాలసీ రకం అత్యంత ముఖ్యం:
కారుకు జరిగిన నష్టానికి క్లెయిమ్ పొందాలంటే మీ వద్ద సమగ్ర కార్ ఇన్సూరెన్స్ (Comprehensive Car Insurance) పాలసీ ఉండటం తప్పనిసరి. చట్టప్రకారం తీసుకునే కేవలం థర్డ్-పార్టీ ఇన్సూరెన్స్ (Third-Party Insurance) వల్ల మీ కారు నష్టానికి ఎలాంటి పరిహారం లభించదు. సమగ్ర పాలసీ మాత్రమే వరదలు, భూకంపాలు, తుఫానులు, చెట్లు పడటం వల్ల జరిగే నష్టాలను కవర్ చేస్తుంది.
ఇంజిన్ ప్రొటెక్షన్ యాడ్-ఆన్ (Engine Protection Cover):
వరద నీటిలో కారు మునిగిపోయినప్పుడు అత్యధికంగా దెబ్బతినేది ఇంజిన్. ఒకవేళ ఇంజిన్లోకి నీరు చేరినప్పుడు మీరు కారును స్టార్ట్ చేయడానికి ప్రయత్నిస్తే హైడ్రోలాక్ (Hydrolock) ఏర్పడి ఇంజిన్ పూర్తిగా పాడైపోతుంది. సాధారణ కాంప్రహెన్సివ్ పాలసీలో ఇంజిన్ నష్టం కవర్ కాకపోవచ్చు. అందుకే, మీ పాలసీతో పాటు ఇంజిన్ ప్రొటెక్షన్ కవర్ అనే యాడ్-ఆన్ ఉంటే, బీమా సంస్థ ఎటువంటి ఇబ్బంది లేకుండా క్లెయిమ్ మంజూరు చేస్తుంది.
ఆధారాలు సేకరించడం (Collect Evidence):
ప్రకృతి వైపరీత్యం వల్ల కారు దెబ్బతిన్న వెంటనే, ఘటన జరిగిన ప్రదేశంలోనే కారు ఫోటోలు, వీడియోలను వివిధ కోణాల నుండి తీయాలి. కారుపై చెట్టు పడినా లేదా కారు వరద నీటిలో మునిగినా ఆ దృశ్యాలను రికార్డ్ చేయడం వల్ల క్లెయిమ్ ప్రక్రియ సులువవుతుంది.
కారును స్టార్ట్ చేయవద్దు:
కారు నీటిలో మునిగినప్పుడు దాన్ని అలాగే ఉంచాలి కానీ, బలవంతంగా స్టార్ట్ చేయడానికి ప్రయత్నించకూడదు. మీ నిర్లక్ష్యం వల్ల ఇంజిన్ పాడైందని సర్వేయర్ గుర్తిస్తే, బీమా సంస్థ మీ క్లెయిమ్ను తిరస్కరించే (Reject) అవకాశం ఉంది. కారును టోయింగ్ సర్వీస్ ద్వారా మాత్రమే సర్వీస్ సెంటర్కు తరలించాలి.
తక్షణమే సమాచారం అందించడం:
ఘటన జరిగిన 24 నుండి 48 గంటల లోపు మీ ఇన్సూరెన్స్ కంపెనీకి ఫోన్ ద్వారా లేదా ఆన్లైన్ యాప్ ద్వారా సమాచారం అందించి, క్లెయిమ్ రిజిస్టర్ చేయాలి. కంపెనీ పంపే సర్వేయర్ కారును పరిశీలించిన తర్వాతే రిపేర్ పనులు ప్రారంభించాలి. ప్రకృతి వైపరీత్యాల సమయాల్లో కారు ఇన్సూరెన్స్ క్లెయిమ్ చేసుకోవడానికి ఓపిక, సరైన ఆధారాలు అవసరం. వాహనదారులు తమ పాలసీ నిబంధనలను ముందే చదువుకుని, అవసరమైన యాడ్-ఆన్స్ కలిగి ఉండటం ద్వారా భారీ నష్టాల నుండి బయటపడవచ్చు.
మరిన్ని బిజినెస్ న్యూస్ కోసం క్లిక్ చేయండి..