Maruti First EV: మారుతి నుంచి తొలి ఎలక్ట్రిక్ ఎస్‌యూవీ.. రేంజ్ ఎంతో తెలుసా?

Maruti First EV: భారతదేశం నేడు కొత్త యుగంలోకి ప్రవేశించింది. ప్రస్తుతం ఎలక్ట్రిక్‌ వాహనాల హవా కొనసాగుతోంది. రోజురోజుకు పెట్రోల్‌, డీజిల్‌ ధరలు పెరిగిన తర్వాత అన్ని వాహనాల కంపెనీలు ఎలక్ట్రిక్‌ వాహనాల వైపు ఆసక్తి చూపుతున్నాయి. తక్కువ ధరల్లోనే ఎలక్ట్రిక్‌ కార్లు, స్కూటర్లను విడుదల చేస్తున్నాయి. అప్పటికే మార్కెట్లో చాలా ఎలక్ట్రిక్‌ వాహనాలు అందుబాటులోకి రాగా, ఇప్పుడు మారుతి సుజుకి నుంచి కూడా ఈవీ విడుదలైంది. మారుతి సుజుకి నుంచి తొలి ఎలక్ట్రిక్‌ ఎస్‌యూవీ విడుదలైంది. దీనిని ప్రధాని నరేంద్ర మోదీ విడుదల చేశారు. మోదీ గుజరాత్‌లోని అహ్మదాబాద్ జిల్లాలోని హన్సల్‌పూర్‌లోని మారుతి సుజుకి ప్లాంట్‌ను సందర్శించి, మారుతి మొట్టమొదటి బ్యాటరీ ఎలక్ట్రిక్ SUV e-VITARAను జెండా ఊపి ప్రారంభించారు. దీనితో కంపెనీ కొత్త ఎలక్ట్రిక్ వాహన యూనిట్ కూడా ప్రారంభమైంది. ఈ SUV భారత మార్కెట్‌కు మాత్రమే కాకుండా జపాన్, యూరప్‌తో పాటు 100 కంటే ఎక్కువ దేశాలకు కూడా ఎగుమతి చేయనుంది. దీని మొదటి బ్యాచ్ నేటి నుండి ఉత్పత్తి ప్రారంభమైంది.

మారుతి ఇ విటారా: ఫీచర్లు, బ్యాటరీ ప్యాక్, రేంజ్

మారుతి ఇ-విటారా లిథియం ఐరన్-ఫాస్ఫేట్ (LFP) బ్యాటరీ ప్యాక్‌తో వస్తుంది. కంపెనీ దీనిని రెండు వేర్వేరు బ్యాటరీ ప్యాక్‌లతో పరిచయం చేసింది. ఇందులో 49kWh, 61kWh ఉన్నాయి. ఈ SUV 18-అంగుళాల అల్లాయ్ వీల్స్ కలిగి ఉంది. కారు పొడవు 4,275 mm, వెడల్పు 1,800 mm, ఎత్తు 1,635 mm. కంపెనీ ప్రకారం.. ఈ SUV ఒక్కసారి ఛార్జ్ చేస్తే 500 కి.మీ కంటే ఎక్కువ రేంజ్ ఇస్తుంది. కొత్త మారుతి ఇ-విటారా లుక్, సైజు గత సంవత్సరం ప్రవేశపెట్టిన మారుతి eVX కాన్సెప్ట్‌ని పోలి ఉంటుంది.

బ్యాటరీ తయారీలో పెద్ద అడుగు:

ఈ కార్యక్రమంలో భాగంగా గుజరాత్‌లోని టిడిఎస్ లిథియం-అయాన్ బ్యాటరీ ప్లాంట్‌లో హైబ్రిడ్ బ్యాటరీ ఎలక్ట్రోడ్‌ల ఉత్పత్తిని కూడా ప్రధాని మోదీ ప్రారంభించారు. ఇప్పుడు 80 శాతానికి పైగా బ్యాటరీలు భారతదేశంలోనే ఉత్పత్తి కానున్నాయి. ఈ దశ భారతదేశ బ్యాటరీ పర్యావరణ వ్యవస్థను తదుపరి స్థాయికి తీసుకెళ్తుంది. విదేశీ ఆధారపడటాన్ని తగ్గిస్తుంది.

మరిన్ని బిజినెస్ వార్తల కోసం ఇక్కడ క్లిక్ చేయండి