రైతులకు కాసుల వర్షమే.. తక్కువ నీటితో నెల తిరిగేసరికి జేబు నింపే పంటలు ఇవే..

Low Investment Profitable Crops

ఎకరాకు వేల రూపాయల పెట్టుబడి పెట్టి.. విత్తనాలు, ఎరువులు, కూలీల ఖర్చులు తడిసి మోపెడై.. తీరా చేతికొచ్చే సమయానికి ధరలు పడిపోవడమో లేదా ప్రకృతి వైపరీత్యాలతో పంట తుడిచిపెట్టుకుపోవడమో చూసి అన్నదాతలు తీవ్ర ఆందోళన చెందుతున్నారు. పత్తి, వరి వంటి సంప్రదాయ పంటలనే ఏళ్ల తరబడి నమ్ముకుంటూ అప్పుల ఊబిలో కూరుకుపోయే బదులు, వ్యవసాయాన్ని ఒక పక్కా వ్యాపార ప్రణాళికతో నడపాల్సిన సమయం ఆసన్నమైంది. నేటి మార్కెట్ అవసరాలకు అనుగుణంగా తక్కువ విస్తీర్ణంలో, అతి తక్కువ ఖర్చుతో, స్వల్ప వ్యవధిలోనే వరుసగా జేబులోకి డబ్బులు తెచ్చిపెట్టే పంటలపై రైతులు దృష్టి సారిస్తున్నారు.

కొత్తిమీర సాగు: కేవలం నెల రోజుల్లోనే నగదు రాబడి

ఆకుకూరల మార్కెట్‌లో కొత్తిమీరకు ఉండే డిమాండ్ ఎప్పటికీ తగ్గదు. సామాన్యుడి వంటగది నుంచి స్టార్ హోటళ్లు, క్యాటరింగ్ సేవల వరకు ప్రతి రోజూ టన్నుల కొద్దీ కొత్తిమీర వినియోగం జరుగుతోంది. విత్తనం చల్లిన 30 నుంచి 45 రోజుల్లోనే పంట కోతకు సిద్ధమవుతుంది. విత్తన ఖర్చు తప్ప ఇతర ఖర్చులు చాలా తక్కువ. నేల తేమను బట్టి స్వల్పంగా నీటి తడులు అందిస్తే చాలు. పొలం మొత్తం కేటాయించాల్సిన అవసరం లేదు. ప్రధాన పంటలైన చెరకు, పండ్ల తోటలు లేదా కూరగాయల గట్ల మధ్య అంతర పంటగా సులభంగా పండించవచ్చు.

మెంతి కూర: తక్కువ నీటితో ప్రకృతి సాగు

ఆరోగ్యం పట్ల ప్రజల్లో అవగాహన పెరిగిన నేపథ్యంలో మెంతాకుతో పాటు మెంతి గింజలకు మార్కెట్లో గిరాకీ విపరీతంగా పెరిగింది. ప్రకృతి వ్యవసాయం చేయాలనుకునే చిన్న రైతులకు ఇది అత్యంత అనుకూలమైన ఎంపిక. తక్కువ నీటితో ఈ పంటను పండించవచ్చు. సాధారణంగా మెంతికి చీడపీడల బెడద చాలా తక్కువగా ఉండటం వల్ల ఖరీదైన రసాయన పురుగుమందుల వాడకం పూర్తిగా తప్పుతుంది. స్థానిక సంతలు, ఆర్గానిక్ స్టోర్లు, సూపర్ మార్కెట్లతో పాటు బ్లింకిట్, జెప్టో వంటి క్విక్ కామర్స్ ప్లాట్‌ఫామ్‌లకు సరుకు అందించే వెండర్లకు నేరుగా విక్రయించి అత్యధిక లాభాలను కళ్లజూడవచ్చు.

తులసి: మార్కెట్ ఒడిదుడుకులు లేని కాంట్రాక్ట్ సాగు

భారత్‌లో ఆయుర్వేదం, మూలికా ఔషధాలు, ఫార్మా రంగం వేగంగా విస్తరిస్తోంది. దీంతో తులసి ఆకులు, విత్తనాలు, నూనెకు పారిశ్రామికంగా భారీ డిమాండ్ ఏర్పడింది. సాంప్రదాయ పంటల్లో ధరలు పడిపోతాయన్న భయం ఉండే రైతులకు ఇది తిరుగులేని ప్రత్యామ్నాయం. వర్షాభావ పరిస్థితులను, అధిక ఉష్ణోగ్రతలను సైతం తట్టుకుని నిలబడే రోగనిరోధక శక్తి తులసి మొక్కలకు ఉంటుంది. అతి ముఖ్యమైన విషయం ఏమిటంటే.. పశువులు, అడవి జంతువులు ఈ మొక్కలను ముట్టవు కాబట్టి రక్షణ కంచెలు, కాపలా ఖర్చులు అసలే ఉండవు. మొక్కలు నాటిన 3 నుంచి 4 నెలల తర్వాత మొదటి కోత వస్తుంది. ఆ తర్వాత క్రమం తప్పకుండా వరుస కోతలు తీసుకోవచ్చు.

బంతి పూల సాగు: పండుగల వేళ కాసుల పంట

శుభకార్యాలు, పెళ్లిళ్లు, దేవాలయాల పూజలు, రాజకీయ సభలకు పూల అవసరం నిత్యం ఉంటుంది. వీటిలో బంతి పూల సాగు రైతులకు నిరంతర ఆదాయాన్నిచ్చే ఏటీఎం లాంటిదని చెప్పవచ్చు. మొక్కలు నాటిన 45 నుంచి 60 రోజుల్లో పూత ప్రారంభమవుతుంది. ఒక్కసారి పూత మొదలైన తర్వాత వారానికి రెండు సార్లు చొప్పున సుమారు 2 నుంచి 3 నెలల పాటు నిరంతరం కోతలు వస్తాయి. బతుకమ్మ, దసరా, దీపావళి, కార్తీక మాసం, సంక్రాంతి సమయాలను దృష్టిలో పెట్టుకుని నాట్లు వేసుకుంటే పూల ధరలు గరిష్ట స్థాయికి చేరి ఊహించని లాభాలు అందుతాయి. పూల మార్కెట్లలో అమ్మడంతో పాటు స్థానిక కల్యాణ మండపాలు, ఈవెంట్ మేనేజర్లు, ప్రముఖ దేవాలయాల కమిటీలతో నేరుగా ఒప్పందం చేసుకుంటే మార్కెట్ కమీషన్ల బాధ తప్పుతుంది.

మిరప

దీర్ఘకాలిక వాణిజ్య పంటల్లో రైతుకు భారీ ఆదాయాన్ని తెచ్చిపెట్టే సత్తా మిరప పంటకు ఉంది. దేశీయ మార్కెట్లలోనే కాకుండా అంతర్జాతీయ మసాలా దినుసుల ఎగుమతుల్లో భారతీయ మిరపకు తిరుగులేని గుర్తింపు ఉంది. మార్కెట్‌లో పచ్చిమిర్చికి మంచి ధర ఉంటే వెంటనే కోసి అమ్మేయవచ్చు. ఒకవేళ ఆ సమయంలో ధరలు ఆశాజనకంగా లేకపోతే కాయలను ఎండబెట్టి ఎండుమిర్చిగా నిల్వ ఉంచి మంచి డిమాండ్ ఉన్నప్పుడు విక్రయించుకునే అనుకూలత ఈ పంట సొంతం.

రైతులు పాటించాల్సిన లాభదాయక సూత్రాలు

సమగ్ర సస్యరక్షణ చర్యలు: తెగుళ్లు, పురుగులు సోకిన తర్వాత వేలకు వేలు ఖర్చు చేసి రసాయనాలు పిచికారీ చేయడం కంటే విత్తన శుద్ధి, జీవ నియంత్రణ పద్ధతుల ద్వారా ఆరంభంలోనే చీడపీడలను అరికట్టవచ్చు. దీనివల్ల సాగు ఖర్చు 30 నుంచి 40 శాతం వరకు ఆదా అవుతుంది.

మార్కెట్ అవగాహన: పంట వేయడానికి ముందే మన ప్రాంతంలో ఏ పంటకు నిరంతరం గిరాకీ ఉంటుందో అధ్యయనం చేయాలి. పంట కోత దశకు రాకముందే వ్యాపారులు, వినియోగదారులతో ముందస్తు బంధం ఏర్పరచుకుంటే మధ్యవర్తుల దోపిడీ లేకుండా రైతు కష్టానికి తగిన ప్రతిఫలం దక్కుతుంది.