Money Rules: మీరు ఇంట్లో ఎంత నగదు ఉంచుకోవాలి? అవసరమైన దానికంటే ఎక్కువ ఉంచుకుంటే నష్టమే..!

Personal Finance

Personal Finance: నేటి డిజిటల్ యుగంలో యూపీఐ, నెట్ బ్యాంకింగ్, డెబిట్ కార్డుల వాడకం పెరిగింది. అయినప్పటికీ, ఏదైనా అత్యవసర పరిస్థితిలో తక్షణమే వాడుకోవడానికి వీలుగా చాలా మంది ఇంట్లో కొంత నగదు ఉంచుకోవడం తప్పనిసరిగ్గా మారింది. అయితే, ఇంట్లో ఎంత నగదు ఉంచుకోవాలి అనే ప్రశ్న చాలా మందికి ఎదురవుతుంది.

మీరు ఇంట్లో చాలా తక్కువ డబ్బు ఉంచుకుంటే, ఇంటర్నెట్ సర్వర్ అకస్మాత్తుగా ఆగిపోయినప్పుడు లేదా ఏటీఎంలు పనిచేయనప్పుడు ఇబ్బందులు ఎదుర్కొంటారు. మీరు ఇంట్లో లక్షల రూపాయలు ఉంచుకుంటే, దొంగతనం భయం ఉండటమే కాకుండా, ద్రవ్యోల్బణం కారణంగా ఆ డబ్బు విలువ కూడా తగ్గిపోతుంది. మరి దీనికి సరైన లెక్క ఏమిటి?

ఇది కూడా చదవండి: Gold Price: రాబోయే రోజుల్లో బంగారం ధరలు తగ్గడానికి 5 కారణాలు.. అవేంటో తెలుసా..?

ఇంట్లో ఎంత నగదు ఉంచుకోవాలో ఎలా నిర్ణయించుకోవాలి?

ఇంట్లో ఎంత డబ్బు ఉంచుకోవాలనే విషయంలో అన్ని కుటుంబాలకు ఒకే నియమం వర్తించదు.

పట్టణ ప్రాంతాలు: నగరాల్లో నివసించే ప్రజలు ఎక్కువ నగదు వెంట ఉంచుకోవాల్సిన అవసరం లేదు. ఎందుకంటే ఏటీఎంలు, ఆన్‌లైన్ డెలివరీ, డిజిటల్ చెల్లింపు వ్యవస్థలు సులభంగా అందుబాటులో ఉంటాయి.

గ్రామీణ ప్రాంతాలు: గ్రామీణ ప్రాంతాలలో బ్యాంకులు, ఏటీఎం సౌకర్యాలు దూరంగా ఉండవచ్చు. అటువంటి ప్రదేశాలలో కొంచెం అదనపు నగదును వెంట ఉంచుకోవడం చాలా అవసరం.

ఒక కుటుంబం 3 నుండి 7 రోజుల అత్యవసర కిరాణా సామాగ్రి, పాలు, స్థానిక రవాణా, వైద్య అత్యవసర పరిస్థితులకు సరిపడా నగదును ఇంట్లో ఉంచుకోవడం తప్పనిసరి. దీనిని కేవలం ‘చిన్న అత్యవసర ఖర్చుల నిధి’గా మాత్రమే పరిగణించాలి. అంతేగానీ ఇంటి అల్మారాలో రెండవ బ్యాంకు ఖాతాలాగా ఉపయోగించకూడదు.

ఇంట్లో పెద్ద మొత్తంలో అత్యవసర నిధిని ఉంచుకోవద్దు:

ఉద్యోగం కోల్పోవడం, తీవ్రమైన అనారోగ్యం వంటి పెద్ద ఆర్థిక సంక్షోభాలను ఎదుర్కోవడానికి ప్రతిఒక్కరికీ ‘అత్యవసర నిధి’ ఉండటం చాలా అవసరం. సెబీ నిబంధనల ప్రకారం, దీర్ఘకాలిక పెట్టుబడులు పెట్టే ముందు ప్రతి ఒక్కరూ 3 నుండి 6 నెలల ఖర్చులకు సరిపడా అత్యవసర నిధిని కలిగి ఉండాలి. అయితే ఈ పెద్ద మొత్తాన్ని ఇంట్లో లాకర్‌లో లేదా అల్మరాలో నగదు రూపంలో ఉంచకూడదు. దానికి బదులుగా అవసరమైనప్పుడు తక్షణమే విత్‌డ్రా చేసుకోగలిగేలా దానిని లిక్విడ్ ఫండ్స్‌లో లేదా బ్యాంక్ ఫిక్స్‌డ్ డిపాజిట్లలో (FD/పొదుపు ఖాతా) ఉంచాలి. ఇలా చేయడం వల్ల డబ్బు సురక్షితంగా ఉండటమే కాకుండా, వడ్డీ కూడా లభిస్తుంది.

ఇంట్లో ఎక్కువ డబ్బు ఉంచుకోవడం వల్ల కలిగే ప్రమాదాలు ఏమిటి?

• వడ్డీ లేదు: ఇంట్లోని నోట్లు ఎలాంటి ఆదాయాన్ని లేదా వడ్డీని సంపాదించవు.
• ద్రవ్యోల్బణం దెబ్బ: ఏటా ధరలు పెరిగేకొద్దీ, ఇంట్లో నిరుపయోగంగా ఉన్న డబ్బు కొనుగోలు శక్తి క్షీణిస్తుంది.
• భద్రతా లోపం: దొంగతనం, అగ్నిప్రమాదం లేదా ప్రమాదవశాత్తు నష్టం జరిగే ప్రమాదం ఎల్లప్పుడూ ఉంటుంది.

ప్రత్యేక సందర్భాల కోసం మాత్రమే ఎక్కువ డబ్బు ఉంచుకోండి:

దూర గ్రామాలకు ప్రయాణించేటప్పుడు ఇంట్లో వృద్ధులు లేదా తీవ్ర అనారోగ్యంతో ఉన్న రోగులు ఉన్నప్పుడు, లేదా ప్రకృతి వైపరీత్యాల వంటి పరిస్థితులలో తాత్కాలికంగా కొంచెం అదనపు నగదును ఉంచుకోవడం మంచిది. పరిస్థితి చక్కబడిన తర్వాత ఆ అదనపు డబ్బును బ్యాంకులో జమ చేయడం మీ ఆర్థిక ఆరోగ్యానికి మంచిది.

ఇది కూడా చదవండి: ఇతను రూ.90 లక్షల జీతం వచ్చే ఉద్యోగాన్ని వదిలి ఏం చేశాడో తెలుసా? అవాక్కవాల్సిందే..!

ఇది కూడా చదవండి: Hair Mistakes: తలస్నానం చేసేటప్పుడు ఈ తప్పులు అస్సలు చేయకండి.. జుట్టు డ్యామేజ్‌ అవుతుంది!

మరిన్ని బిజినెస్ వార్తల కోసం ఇక్కడ క్లిక్ చేయండి