సుష్మా జీ ఓ ఛాంపియన్: ఇవాంకా భావోద్వేగ ట్వీట్

కేంద్ర మాజీ విదేశాంగ మంత్రి, బీజేపీ సీనియర్ నేత సుష్మా స్వరాజ్ ఈ మంగళవారం రాత్రి తీవ్ర గుండెపోటుతో కన్నుమూసిన విషయం తెలిసిందే. ఆమె హఠాన్మరణం యావత్తు భారతంతో పాటు విదేశీ నేతలను కూడా కలిచివేసింది. విదేశాంగ మంత్రిగా పనిచేసిన సమయంలో పలువురు విదేశీ నేతలతో సుష్మా మంచి సాన్నిహిత్యాన్ని కలిగి ఉండగా.. వారందరూ ఆమెను తలచుకుంటూ నివాళులు అర్పించారు. ఇక తాజాగా అమెరికా అధ్యక్ష సలహాదారు ఇవాంకా ట్రంప్.. సుష్మా మరణంపై భావోద్వేగ ట్వీట్‌ చేశారు.

‘‘సుష్మా మరణంతో భారత్‌ ఒక గొప్ప, ఆదర్శ, ప్రజా సేవకురాలిని కోల్పోయింది. సుష్మా స్వరాజ్ భారత్‌లో ఉన్న మహిళలకే కాకుండా ప్రపంచంలో ఉన్న అందరికీ ఒక ఛాంపియన్. ఆమెను కలవడం ఓ గౌరవమైన అనుభవం’’ అంటూ ట్వీట్ చేశారు. ఈ సందర్భంగా సుష్మాతో కలిసి ఉన్న ఫొటోలను కూడా ఇవాంకా షేర్ చేసింది. కాగా సుష్మా అంత్యక్రియలు బుధవారం నిరాడంబరంగా ముగిశాయి.