బీఆర్ఎస్లో చేరికపై జీవన్ రెడ్డి కీలక వ్యాఖ్యలు.. ఏమన్నారంటే.?
బీఆర్ఎస్లో చేరిన అనంతరం జీవన్ రెడ్డి కీలక ఇంటర్వ్యూ ఇచ్చారు. రేవంత్ రెడ్డి చర్యలు, ప్రభుత్వ అస్థిరతే తన ఫిరాయింపునకు కారణమన్నారు. ఫిరాయింపులు చట్టరీత్యా తప్పైనప్పటికీ, గతంలో కేసీఆర్ కూడా ఇదే చేశారని గుర్తు చేశారు. కాంగ్రెస్ పార్టీలో గుర్తింపు లోపించడం కూడా ఒక కారణమని వివరించారు.
తెలంగాణ రాజకీయాల్లో సీనియర్ నాయకుడు, మాజీ ఎమ్మెల్సీ జీవన్ రెడ్డి టీవీ9 ‘క్రాస్ ఫైర్’ కార్యక్రమంలో కీలక వ్యాఖ్యలు చేశారు. తాను బీఆర్ఎస్లో చేరడానికి ముఖ్యమంత్రి రేవంత్ రెడ్డి తీసుకున్న నిర్ణయాలే కారణమని స్పష్టం చేశారు. దశాబ్దాలుగా పోరాడి సాధించుకున్న తెలంగాణలో, తమ సొంత ప్రభుత్వంలోనే గౌరవం దక్కకపోవడం తనను తీవ్రంగా కలిచివేసిందని ఆయన ఆవేదన వ్యక్తం చేశారు. గతంలో టీఆర్ఎస్ ప్రభుత్వాన్ని అస్థిరపరచాలని చూసినట్లే, ఇప్పుడు రేవంత్ రెడ్డి ప్రభుత్వాన్ని కూడా పడగొడతామని బీఆర్ఎస్ నాయకులు చేసిన వ్యాఖ్యల వల్లే ఫిరాయింపులు జరుగుతున్నాయని ఆయన పేర్కొన్నారు.
తన 30 ఏళ్ల కెరీర్లో 14 సార్లు బీ-ఫామ్ అందుకుని, 6 సార్లు విజయం సాధించానని, తన సామర్థ్యంపై ఎవరికీ సందేహాలు ఉండాల్సిన అవసరం లేదని అన్నారు. నిజామాబాద్ పార్లమెంట్ ఎన్నికల్లో ఓటమికి మత ప్రాతిపదికన ఓట్లు చీలడమే కారణమని, తనకంటే మెరుగైన అభ్యర్థి పార్టీలో లేరని ఆయన ధీమా వ్యక్తం చేశారు. కాంగ్రెస్ హైకమాండ్ ద్వితీయ శ్రేణి నాయకత్వాన్ని నిర్మించడంలో విఫలమైందని ఆయన విమర్శించారు. చివరగా, ఏ పరిస్థితిలోనైనా ఫిరాయింపులను తాను సమర్థించనని స్పష్టం చేశారు.