కుక్కలు చనిపోయే ముందు ఎలాంటి సంకేతాలు ఇస్తాయో తెలుసా..? యజమానులు తెలుసుకోవాల్సిన నిజాలివే..

How To Tell If Your Dog Is Dying

మనుషుల పట్ల కుక్కలు చూపించే విశ్వాసం, ప్రేమ అంతా ఇంతా కాదు. తమ యజమానులను, వారి కుటుంబాలను రక్షించడం కోసం కుక్కలు తమ ప్రాణాలను సైతం పణంగా పెట్టిన ఉదాహరణలు చరిత్రలో ఎన్నో ఉన్నాయి. అయితే ప్రతి జీవిలాగే వాటి జీవిత కాలం కూడా ముగిసిపోతుంది. వృద్ధాప్యం లేదా తీవ్రమైన అనారోగ్యం కారణంగా కుక్కలు తమ జీవిత చరమాంకానికి చేరుకున్నప్పుడు, అవి చనిపోయే ముందు కొన్ని నిర్దిష్టమైన సంకేతాలను చూపిస్తాయి. మనుషులలాగా కుక్కలు మరణాన్ని పూర్తిగా అర్థం చేసుకోలేకపోయినప్పటికీ అవి తమ శరీరంలో, శక్తిలో, పరిసరాలలో జరిగే మార్పుల పట్ల చాలా సున్నితంగా ఉంటాయి. అందుకే ఆఖరి రోజుల్లో వాటి ప్రవర్తనలో కొన్ని స్పష్టమైన మార్పులు కనిపిస్తాయి. ఈ భావోద్వేగ మార్పుల గురించి ప్రతి యజమాని అవగాహన కలిగి ఉండటం చాలా ముఖ్యం.

ఆకలి తగ్గడం.. నిద్ర, ఏకాంతంపైనే మక్కువ

జీవిత చివరి దశకు చేరుకున్న కుక్కలలో కనిపించే అత్యంత సాధారణ మార్పు.. అవి మామూలు కంటే చాలా ఎక్కువగా నిద్రపోతాయి. ఈ సమయంలో అవి చాలా తక్కువగా ఆడుకుంటూ, అటూ ఇటూ పరిగెత్తడానికి లేదా నడవడానికి అస్సలు ఇష్టపడవు. వాటి ప్రపంచం నెమ్మదిగా కుంచించుకుపోతున్నట్లు అనిపిస్తుంది. అలాగే ఇల్లు లేదా పరిసరాలలో నిశబ్దంగా, ఏకాంతంగా ఉండే ప్రదేశాలను వెతుక్కుని, అక్కడే ఎక్కువ సమయం గడపడానికి ప్రయత్నిస్తాయి. దీంతో పాటు క్రమక్రమంగా ఆహారం, నీటిపై పూర్తిగా ఆసక్తిని కోల్పోతాయి. ఆకలి, దాహం మందగించడం అనేది అవి చివరి దశకు చేరుకున్నాయనడానికి ఒక స్పష్టమైన సంకేతం.

యజమానిపై స్పర్శ కోసం ఆరాటం

చివరి రోజుల్లో కుక్కలు రెండు రకాల విభిన్న ప్రతిచర్యలను చూపిస్తాయి. కొన్ని కుక్కలు పూర్తిగా ఏకాంతాన్ని కోరుకుంటే, మరికొన్ని కుక్కలు మాత్రం తమ యజమానులను అస్సలు విడిచిపెట్టకుండా నీడలా అనుసరిస్తుంటాయి. తమకు బాగా సుపరిచితమైన వాతావరణంలో యజమాని పక్కనే ఉంటే అవి సురక్షితంగా ఉన్నట్లు భావిస్తాయి. ఇది అవి మానసిక భద్రతను పొందేందుకు చేసే ఆఖరి ప్రయత్నం. ఈ సమయంలో కొన్ని కుక్కలు యజమాని స్పర్శను ఎక్కువగా కోరుకుంటాయి. కౌగిలించుకోవడం, ఆప్యాయంగా నిమరడం వంటివి వాటికి ఎంతో ఊరట, ప్రశాంతతను ఇస్తాయి. ఈ దశలో వాటి శ్వాస తీసుకోవడం కూడా చాలా నెమ్మదిగా లేదా అస్తవ్యస్తంగా మారుతుంది.

ఒకే చోట స్థిరంగా ఉండటం.. నెమ్మదైన స్పందన

ఆఖరి రోజుల్లో కుక్కలు తమకు నచ్చిన ఒక సురక్షితమైన, సౌకర్యవంతమైన ప్రదేశాన్ని ఎంచుకుని గంటల తరబడి ఒకే చోట పడుకుని ఉండిపోతాయి. ఆ సమయంలో ఎవరైనా పిలిచినా, చుట్టుపక్కల ఎలాంటి శబ్దాలు వచ్చినా లేదా ఎవరైనా ఆప్యాయంగా నిమిరినా కూడా అవి వెంటనే స్పందించవు. స్పందించడానికి చాలా ఎక్కువ సమయం తీసుకుంటాయి. ఒకప్పుడు చురుగ్గా ఉన్న కుక్కలో ఇలాంటి మార్పులు చూసి యజమానులు ఆందోళన చెందాల్సిన అవసరం లేదు. ఎందుకంటే తన శరీరం, మనస్సు మారిపోతున్నాయని యజమానికి తెలియజేయడానికి కుక్కలు ఉపయోగించే అతి సున్నితమైన సంకేతాలు ఇవి మాత్రమే.

యజమానిగా మీ బాధ్యత చాలా ముఖ్యం

తన జీవితాంతం నిస్వార్థమైన ప్రేమను పంచిన మీ పెంపుడు కుక్క జీవిత చరమాంకానికి చేరుకుందని మీరు గ్రహించినప్పుడు, ఒక యజమానిగా మీ బాధ్యత మరింత పెరుగుతుంది. ఈ క్లిష్ట సమయంలో దానికి అన్నిటికన్నా ఎక్కువగా కావాల్సింది మీ ప్రేమ, ఓర్పు, సున్నితమైన సంరక్షణ. అది ఆఖరి శ్వాస విడిచే వరకు దానికి తోడుగా ఉండటం ఓదార్చడం, సున్నితంగా నిమరడం వంటివి ఆ మూగజీవికి కొండంత హాయిని కలిగిస్తాయి. జీవితాంతం అది మీపై చూపిన అంతులేని విశ్వాసానికి, కృతజ్ఞతగా దానికి ప్రేమతో, గౌరవంతో వీడ్కోలు పలకడం ప్రతి యజమాని కనీస ధర్మం.