ఫ్లైట్లో ఎన్ని లీటర్ల మద్యం తీసుకెళ్లొచ్చు..? ఈ తప్పులు చేస్తే చిక్కులు తప్పవు..
విమాన ప్రయాణం అంటేనే కఠినమైన ఆంక్షలు, నిబంధనలు. లగేజీ బరువు నుంచి వెంట తీసుకెళ్లే వస్తువుల వరకు ప్రతిదానికీ ఓ లెక్క ఉంటుంది. ముఖ్యంగా మద్యం తీసుకెళ్లే విషయంలో నిబంధనలు మరింత కచ్చితంగా ఉంటాయి. మద్యం బాటిల్ను ఎక్కడ ప్యాక్ చేయాలి? ఆల్కహాల్ శాతం ఎంత ఉండాలి? మీరు చేసే చిన్న పొరపాటు వల్ల ఎయిర్పోర్టులో ఎలాంటి చిక్కులు ఎదురవుతాయి? అనేది తెలుసుకుందాం..
గోవా టూర్ ముగించుకుని తిరిగొస్తూ అక్కడి ఫేమస్ ఫెనీ, వైన్ లేదా నచ్చిన బ్రాండ్ విస్కీని తెచ్చుకోవాలనుకుంటున్నారా? లేదా విదేశాల నుంచి వస్తూ కనెక్టింగ్ డొమెస్టిక్ ఫ్లైట్లో మీ ఊరికి మద్యం తీసుకెళ్తున్నారా? అయితే విమానాల్లో మద్యం రవాణాకు సంబంధించి బ్యూరో ఆఫ్ సివిల్ ఏవియేషన్ సెక్యూరిటీ, డైరెక్టరేట్ జనరల్ ఆఫ్ సివిల్ ఏవియేషన్ నిర్దేశించిన కఠిన నిబంధనలపై అవగాహన ఉండటం అత్యంత ముఖ్యం. నిబంధనలు తెలియక చాలామంది ఎయిర్పోర్టులలో సెక్యూరిటీ చెకింగ్ వద్ద చేదు అనుభవాలను ఎదుర్కొంటున్నారు. భారతదేశంలో దేశీయ విమానాల్లో మద్యం తీసుకెళ్లడానికి సంబంధించి అమల్లో ఉన్న కీలక మార్గదర్శకాల గురించి అందరూ తెలుసుకోవాలి.
గరిష్ట పరిమితి 5 లీటర్లే.. ఆల్కహాల్ శాతమే కీలకం..
ఆల్కహాల్ పరిమాణం (24 నుంచి 70శాతం): విస్కీ, రమ్, వోడ్కా, జిన్ వంటి డ్రింక్స్లో సాధారణంగా ఆల్కహాల్ శాతం 24 నుంచి 70శాతం వరకు ఉంటుంది. నిబంధనల ప్రకారం ఒక ప్రయాణికుడు గరిష్టంగా 5 లీటర్ల వరకు మాత్రమే తీసుకెళ్లేందుకు అనుమతి ఉంటుంది.
70శాతం కంటే ఎక్కువ ఉంటే నో ఎంట్రీ: ఆల్కహాల్ పరిమాణం 70 శాతం మించిన ఘాటైన మద్యాన్ని మండే స్వభావం కలిగిన ప్రమాదకర పదార్థంగా పరిగణిస్తారు. దీన్ని విమానంలోకి ఎట్టిపరిస్థితుల్లోనూ అనుమతించరు.
బీర్, వైన్లకు వర్తించని 5 లీటర్ల నిబంధన: 24శాతం కంటే తక్కువ ఆల్కహాల్ శాతం ఉండే వైన్, బీర్లకు 5 లీటర్ల పరిమితి వర్తించదు. కానీ ఎయిర్లైన్ అనుమతించిన చెక్ ఇన్ బ్యాగేజీ మొత్తం బరువు పరిమితికి లోబడి ఉండాలి.
ప్యాకేజింగ్ – లగేజీ నిబంధనలు
ఒరిజినల్ ప్యాకింగ్ తప్పనిసరి: మద్యం బాటిళ్లు కంపెనీ ఇచ్చిన అసలైన రిటైల్ ప్యాకేజింగ్లో, పగలని విధంగా భద్రపరిచి ఉండాలి. సీల్ తీసిన లేదా సగం వాడిన బాటిళ్లను తీసుకెళ్లడం పూర్తిగా నిషిద్ధం.
చెక్ ఇన్ బ్యాగేజీలోనే ఉంచాలి: సాధారణంగా హ్యాండ్ బ్యాగ్లో మద్యం తీసుకెళ్లేందుకు అనుమతించరు. బాటిళ్లను కేవలం చెక్ ఇన్ లగేజీలోనే భద్రపరుచుకోవాలి.
డ్యూటీ ఫ్రీ కొనుగోళ్లు: సెక్యూరిటీ చెక్ పూర్తయిన తర్వాత సెక్యూరిటీ హోల్డ్ ఏరియాలోని డ్యూటీ ఫ్రీ షాపుల్లో కొనుగోలు చేసిన మద్యం సీసాలను, అధికారిక సీల్డ్ పౌచ్లలో ఉంచితే విమానయాన సంస్థ నిబంధనల మేరకు క్యాబిన్ బ్యాగేజీగా తీసుకెళ్లవచ్చు.
కనెక్టింగ్ ఫ్లైట్ ఉందా? ఈ తప్పు అస్సలు చేయకండి
- విదేశాల నుంచి అంతర్జాతీయ విమానంలో భారత్కు వచ్చి, అక్కడి నుంచి మరో డొమెస్టిక్ ఫ్లైట్కు మారే ప్రయాణికులు మరింత అప్రమత్తంగా ఉండాలి.
- అంతర్జాతీయ ప్రయాణంలో విదేశీ డ్యూటీ ఫ్రీ నుంచి భారత్లోకి గరిష్టంగా 2 లీటర్ల మద్యం మాత్రమే డ్యూటీ ఫ్రీగా తెచ్చుకోవచ్చు. అంతకంటే ఎక్కువ ఉంటే కస్టమ్స్ డ్యూటీ చెల్లించాల్సి వస్తుంది.
- అంతర్జాతీయ విమానం దిగి, కస్టమ్స్ క్లియర్ అయ్యాక మొదటి విమానాశ్రయంలో మీ చెక్-ఇన్ లగేజీని సేకరించినప్పుడే, చేతిలోని మద్యం సీసాలను చెక్-ఇన్ బ్యాగ్లోకి మార్చడం మంచిది.
- దేశీయ టెర్మినల్ సెక్యూరిటీ చెకింగ్ వద్ద క్యాబిన్ బ్యాగ్లో 100 ఎంఎల్ కంటే ఎక్కువ ద్రవాలను అనుమతించరు. కాబట్టి డ్యూటీ ఫ్రీ సీల్డ్ బ్యాగులు ఉన్నప్పటికీ, సెక్యూరిటీ సమస్యలు తలెత్తకుండా బాటిళ్లను చెక్ ఇన్ లగేజీలోనే పెట్టేయడం ఉత్తమం.