ఆ మహిళా జడ్జికి శాశ్వత హోదాపై సిఫారసు ఉపసంహరణ, సుప్రీంకోర్టు కొలీజియం నిర్ణయం.

బాంబే హైకోర్టు జడ్జి పుష్ప గనెడివాలాకు శాశ్వత హోదా కల్పించాలన్న తన సిఫారసును సుప్రీంకోర్టు కొలీజియం ఉపసంహరించుకుంది. ఇది చాలా అరుదైన ఘటన.. లైంగిక దాడులు, నేరాలపై గత కొన్ని రోజులుగా జస్టిస్ పుష్ప వివాదాస్పద ఉత్తర్వులు జారీ చేశారు. ఈ విధమైన కేసుల్లో ఒక  జడ్జికి శాశ్వత హోదా కల్పించాలన్న నిర్ణయం ఆయనకు లేదా ఆమెకు మరింత శిక్షణ అవసరమన్న ప్రాతిపదికపై ఆధారపడి ఉంటుందని అత్యున్నత న్యాయస్థాన వర్గాలు తెలిపాయి. ఈ కేసులో ఈ జడ్జిపై  వ్యక్తిగతంగా  కోర్టుకు  వ్యతిరేక అభిప్రాయమేదీ లేదని, కానీ ఆమె లాయర్ గా ఉన్నప్పుడు ఇలాంటి కేసులను డీల్ చేసి ఉండకపోవచ్చునని. ఆమెకు ఇంకా శ్జిక్షణ అవసరమని ఈ వర్గాలు వివరించాయి. జడ్జీలకు శాశ్వత హోదా కల్పించడం, ఈ విషయంలో కొలీజియం తన సిఫార్సులను ప్రభుత్వానికి పంపడం పరిపాటి.. ఒక్కోసారి కొన్ని కొర్రీలతో ఈ విధమైన సిఫారసులు తిరిగి కొలీజియానికి చేరుతాయి.

పుష్ప గనెడివాలా ను బాంబే హైకోర్టు నాగపూర్ బెంచ్ కి శాశ్వత జడ్జిగా ధృవీకరిస్తూ ఈ నెల 20 న సుప్రీంకోర్టు కొలీజియం ప్రభుత్వానికి సిఫారసు చేసింది. అయితే లైంగిక నేరాలపై ఆమె ఈ మధ్య రెండు వివాదాస్పద ఉత్తర్వులు జారీ చేశారు. మైనర్ ఛాతీని నిమరడం, స్కిన్ టు స్కిన్ కాంటాక్ట్ లేకపోవడం పోక్సో చట్టం కింద నేరం కాదని ఆమె మొదట రూలింగ్ ఇఛ్చారు. ఆ  మరుసటి రోజే… బాధితురాలి చేతులను తాకుతూనో, లేదా ప్యాంట్ జిప్ విప్పడమో వంటివి కూడా ఈ చట్టం కింద  అఫెన్స్ కాదని మరో తీర్పు ఇస్తూ.. 5 ఏళ్ళ బాలిక పట్ల అసభ్యంగా ప్రవర్తించిన వ్యక్తిని నిర్దోషిగా విడిచిపుచ్చారు.. కానీ ఈ తీర్పులపై సుప్రీంకోర్టు స్టే విధించింది. చివరకు ఈ తీర్పులకు గాను ఆ మహిళా జడ్జికి సంబంధించి తన నిర్ణయాన్ని సుప్రీంకోర్టు కొలీజియం వెనక్కి తీసుకుంది.