T20 Cricket: టీ20ల్లో బాదుడే బాదుడు.. ఓపెనర్లుగా అత్యధిక పరుగులు సాధించిన టాప్ 6 వీరులు వీరే
T20 Cricket: టీ20 ఇంటర్నేషనల్స్‌లో ఓపెనర్‌గా అత్యధిక పరుగులు చేసిన టాప్ 6 బ్యాటర్ల జాబితా ఇది. ఐర్లాండ్ ఆటగాడు పాల్ స్టిర్లింగ్ 3,818 పరుగులతో ప్రథమ స్థానంలో నిలవగా, భారత దిగ్గజం రోహిత్ శర్మ 3,750 పరుగులతో రెండో స్థానంలో ఉన్నారు. ముహమ్మద్ వసీమ్, మార్టిన్ గుప్తిల్, రిజ్వాన్, వార్నర్ తరువాత స్థానాల్లో నిలిచారు.
T20 Cricket: టీ20 క్రికెట్ అంటేనే ఫటాఫట్ ఆడే ఫార్మాట్. ఇందులో ఓపెనర్ల రోల్ చాలా కీలకం. మొదటి ఆరు ఓవర్ల పవర్ ప్లేలో బౌండరీలు బాదుతూ టీమ్‌కు మంచి స్టార్ట్ ఇవ్వాల్సిన బాధ్యత వాళ్ల మీదే ఉంటుంది. వికెట్ కాపాడుకుంటూనే స్కోరు బోర్డును పరుగులు పెట్టించాలి. ఇలాంటి టఫ్ డ్యూటీని సూపర్ సక్సెస్‌ఫుల్‌గా చేస్తూ, టీ20 ఇంటర్నేషనల్స్‌లో ఓపెనర్లుగా వేల పరుగులు సాధించిన టాప్-6 బ్యాట్స్‌మెన్ ఎవరో చూద్దాం. ఈ లిస్టులో మన ఇండియన్ స్టార్ రోహిత్ శర్మతో పాటు వరల్డ్ క్లాస్ ప్లేయర్లు ఉన్నారు.
టాప్ ప్లేసులో ఐర్లాండ్ బ్యాటర్
పొట్టి క్రికెట్ చరిత్రలో ఓపెనర్‌గా బరిలోకి దిగి అత్యధిక పరుగులు సాధించిన ఆటగాళ్ల జాబితాలో ఐర్లాండ్ స్టార్ బ్యాటర్ పాల్ స్టిర్లింగ్ మొదటి స్థానంలో నిలిచాడు. ఇన్నింగ్స్ ఆరంభం నుంచి ఎంతో దూకుడుగా ఆడే ఈ డాషింగ్ ఓపెనర్ ఇప్పటివరకు ఏకంగా 3,818 పరుగులు సాధించి సరికొత్త చరిత్ర సృష్టించాడు. ప్రత్యర్థి బౌలర్ల వ్యూహాలను చిత్తు చేస్తూ నిలకడగా పరుగులు రాబట్టే నైపుణ్యం స్టిర్లింగ్‌ను ఐర్లాండ్ జట్టుకు ప్రధాన బలంగా మార్చింది. పవర్ ప్లే అవకాశాలను సంపూర్ణంగా వాడుకోవడంలో ఈ ఆటగాడు దిట్టగా పేరుగాంచాడు.
రెండో స్థానంలో రోహిత్ శర్మ
ఈ రేసులో భారత మాజీ కెప్టెన్, హిట్ మ్యాన్ రోహిత్ శర్మ రెండో స్థానంలో కొనసాగుతున్నాడు. టీ20 ఇంటర్నేషనల్స్‌లో భారత ఇన్నింగ్స్ ప్రారంభించి రోహిత్ శర్మ 3,750 పరుగులు సాధించాడు. పవర్ ప్లే ఓవర్లలో తనకే సొంతమైన టైమింగ్‌తో భారీ సిక్సర్లు బాదుతూ టీమిండియాకు వేగవంతమైన ఆరంభాలు ఇచ్చాడు. జట్టుకు అనేక చిరస్మరణీయ విజయాలు అందించిన రోహిత్ రికార్డులు నేటికీ క్రీడాభిమానులను విశేషంగా ఆకట్టుకుంటున్నాయి.
మూడో స్థానంలో యుఏఈ ప్లేయర్
ఈ జాబితాలో ఎవరూ ఊహించని విధంగా యునైటెడ్ అరబ్ ఎమిరేట్స్ (యుఏఈ) కెప్టెన్ ముహమ్మద్ వసీమ్ మూడో స్థానాన్ని కైవసం చేసుకున్నాడు. ధనాధన్ బ్యాటింగ్‌తో ప్రత్యర్థులపై విరుచుకుపడే వసీమ్ ఓపెనర్‌గా 3,337 పరుగులు సాధించి అందరి దృష్టిని ఆకర్షించాడు. అసోసియేట్ దేశం నుంచి వచ్చినప్పటికీ అగ్రశ్రేణి జట్ల ఆటగాళ్లతో పోటీపడుతూ ఈ స్థాయిలో పరుగులు రాబట్టడం అభినందనీయం.
నాలుగో స్థానంలో న్యూజిలాండ్ బ్యాటర్
న్యూజిలాండ్ దిగ్గజ ప్లేయర్ మార్టిన్ గుప్తిల్ ఈ ప్రతిష్టాత్మక జాబితాలో నాలుగో స్థానంలో ఉన్నాడు. తన సుదీర్ఘ కెరీర్‌లో కివీస్ జట్టుకు ఓపెనర్‌గా సేవలు అందించిన గుప్తిల్ 3,170 పరుగులు సాధించాడు. క్రీజులో కుదురుకుంటే మైదానం నలుమూలలా భారీ షాట్లతో విధ్వంసం సృష్టించే నైపుణ్యం ఈ మాజీ ఆటగాడి ప్రత్యేకత.
ఐదు, ఆరు స్థానాల్లో రిజ్వాన్, వార్నర్
పాకిస్థాన్ వికెట్ కీపర్ బ్యాటర్ మహమ్మద్ రిజ్వాన్ 3,162 పరుగులతో ఐదో స్థానంలో నిలిచాడు. ఓపెనర్‌గా మైదానంలోకి అడుగుపెట్టి నిలకడైన ఆటతీరుతో పాకిస్థాన్‌కు ఎన్నో విజయాలు అందించాడు. ఆస్ట్రేలియా ధనాధన్ బ్యాటర్ డేవిడ్ వార్నర్ 3,109 పరుగులతో ఆరో స్థానాన్ని దక్కించుకున్నాడు. ఆరంభం నుంచే మైదానంలో దూకుడు ప్రదర్శిస్తూ ప్రత్యర్థి బౌలర్లపై మానసిక ఒత్తిడి పెంచడంలో వార్నర్ ప్రత్యేక ముద్ర వేసాడు.
మరిన్ని క్రీడా వార్తల కోసం ఇక్కడ క్లిక్ చేయండి..