IPL 2027: పంజాబ్ కింగ్స్‌కు బిగ్ షాక్.. కోచింగ్ స్టాఫ్ మొత్తం ఔట్.. ఇక పాంటింగ్ ఒక్కడే
IPL 2027: ఐపీఎల్ 2027 సీజన్‌కు ముందు పంజాబ్ కింగ్స్ కోచింగ్ స్టాఫ్‌లో ఊహించని పరిణామాలు చోటుచేసుకున్నాయి. హెడ్ కోచ్ రిక్కీ పాంటింగ్ మినహా అసిస్టెంట్ కోచ్ బ్రాడ్ హాడిన్, బౌలింగ్ కోచ్ జేమ్స్ హోప్స్, సాయిరాజ్ బహుతులే తమ పదవులకు రాజీనామా చేశారు. బిగ్ బాష్ లీగ్‌లో అవకాశాలు రావడం వల్లే వీరు తప్పుకున్నట్లు తెలుస్తోంది.
IPL 2027: ఐపీఎల్ 2027 సీజన్ కోసం ఫ్రాంచైజీలు ఇప్పుడే ప్రణాళికలు సిద్ధం చేస్తున్నాయి. ఈ క్రమంలో పంజాబ్ కింగ్స్ మేనేజ్‌మెంట్‌కు ఊహించని షాక్ తగిలింది. హెడ్ కోచ్ రిక్కీ పాంటింగ్ మినహా జట్టు ప్రధాన కోచింగ్ సిబ్బంది రాజీనామా చేశారు. అసిస్టెంట్ కోచ్ బ్రాడ్ హాడిన్, ఫాస్ట్ బౌలింగ్ కోచ్ జేమ్స్ హోప్స్ తమ పదవులకు స్వస్తి చెప్పారు. ఇటీవలే ఫీల్డింగ్ కోచ్ సాయిరాజ్ బహుతులే తప్పుకోగా, ఇప్పుడు బ్రాడ్ హాడిన్, జేమ్స్ హోప్స్ కూడా వెళ్లిపోవడంతో పంజాబ్ కింగ్స్ ఒకేసారి ముగ్గురు కోచ్‌లను కోల్పోయింది. ఆస్ట్రేలియాలో జరిగే బిగ్ బాష్ లీగ్ (BBL)లో కొత్త బాధ్యతలు దక్కడంతోనే వీరు ఐపీఎల్ కోచింగ్ నుంచి తప్పుకున్నట్లు వార్తలు వస్తున్నాయి. ఇప్పుడు ఈ ఖాళీలను భర్తీ చేసే బాధ్యత హెడ్ కోచ్ రిక్కీ పాంటింగ్ భుజస్కంధాలపై పడింది. రాబోయే ఆక్షన్ కంటే ముందే కొత్త సహాయక సిబ్బందిని ఎంపిక చేసేందుకు పాంటింగ్ కసరత్తు మొదలుపెట్టాడు.
ఐపీఎల్ 2025లో రన్నరప్‌గా రచ్చ
గత రెండు సీజన్లుగా పంజాబ్ కింగ్స్ ప్రదర్శనలో ఎంతో మార్పు వచ్చింది. శ్రేయస్ అయ్యర్‌ని కెప్టెన్‌గా దక్కించుకున్న తర్వాత జట్టు ఎంతో బలంగా తయారైంది. ఐపీఎల్ 2025 సీజన్ లో అద్భుత ప్రదర్శనతో ఫైనల్ చేరిన పంజాబ్ జట్టు, రాయల్ ఛాలెంజర్స్ బెంగళూరు చేతిలో ఓడిపోయి రన్నరప్‌గా నిలిచింది. పాంటింగ్-అయ్యర్ కాంబినేషన్ మైదానంలో మంచి ఫలితాలు అందించడంతో అభిమానుల్లో భారీ ఆశలు నెలకొన్నాయి.
ఐపీఎల్ 2026లో తృటిలో ప్లే ఆఫ్స్ మిస్
అయితే ఐపీఎల్ 2026 సీజన్ పంజాబ్ కింగ్స్ అనుకున్నంత ఆశాజనకంగా సాగలేదు. టోర్నీ ఆరంభంలో వరుస విజయాలతో దూసుకెళ్లినప్పటికీ, ఆ తర్వాత వరుస ఓటములతో నెమ్మదించింది. పాయింట్ల పట్టికలో ఐదో స్థానానికి పరిమితమై కేవలం ఒకే ఒక్క స్థానం తేడాతో ప్లేఆఫ్స్ అవకాశాన్ని చేజార్చుకుంది. కీలక సమయాల్లో ఒత్తిడికి గురికావడం జట్టు కొంపముంచింది.
2027 ఆక్షన్ ముందే పక్కా ప్లాన్
కోచింగ్ స్టాఫ్‌లో చోటుచేసుకున్న ఈ ఊహించని మార్పులు రాబోయే ఐపీఎల్ 2027 సీజన్‌పై ప్రభావం చూపే అవకాశం ఉంది. కొత్త కోచింగ్ బృందంతో కలిసి రిక్కీ పాంటింగ్ ఎలాంటి వ్యూహాలు రచిస్తాడో చూడాలి. ఆక్షన్ ద్వారా సరైన ఆటగాళ్లను ఎంపిక చేసుకోవడంతో పాటు బౌలింగ్, ఫీల్డింగ్ విభాగాలను బలోపేతం చేయడం పంజాబ్ కింగ్స్‌కు ఇప్పుడు అత్యంత కీలకంగా మారింది. టీమ్ కోచింగ్ సెటప్‌ను పునర్నిర్మించడం రిక్కీ పాంటింగ్‌కు పెద్ద సవాలే. బిగ్ బాష్ లీగ్ నుంచి లభించిన అవకాశాలతో వెళ్లిపోయిన కోచ్‌ల స్థానంలో కొత్తవారిని త్వరలోనే ప్రకటిస్తారని అభిమానులు ఆశిస్తున్నారు.
మరిన్ని క్రీడా వార్తల కోసం ఇక్కడ క్లిక్ చేయండి..