Watch: పాక్‌ ఆటగాళ్ల ముందే భారత కుర్రాళ్ల అగ్రెసివ్ సెలబ్రేషన్స్‌.. మైదానంలో రచ్చ
Watch: పాకిస్థాన్‌తో జరిగిన అండర్‌-19 ఆసియా కప్‌ ఫైనల్‌లో భారత జట్టు చివరి బంతికి ఒక్క వికెట్‌ తేడాతో సంచలన విజయం సాధించింది. 338 పరుగుల లక్ష్య ఛేదనలో 252 పరుగులకే ఎనిమిది వికెట్లు కోల్పోయిన భారత్‌ను మనాల్‌ చౌహాన్‌, మోహిత్‌ ఉల్వా ఆదుకున్నారు. గెలుపు తర్వాత భారత ఆటగాళ్లు మైదానంలో భారీగా సంబరాలు చేసుకున్నారు.
Watch: చేతిలో ఒక్క వికెట్‌ .. చివరి బంతికి మూడు పరుగులు కావాలి.. ప్రత్యర్థి పాకిస్థాన్‌.. ఇలాంటి ఉత్కంఠభరిత పరిస్థితుల్లోనూ భారత యువ ఆటగాడు మోహిత్‌ ఉల్వా ఏమాత్రం ఒత్తిడికి గురికాలేదు. చివరి బంతిని బౌండరీకి తరలించి భారత్‌కు అద్భుత విజయాన్ని అందించాడు. అండర్‌-19 ఆసియా కప్‌ ఫైనల్‌లో పాకిస్థాన్‌ను ఓడించిన భారత జట్టు సంబరాలు మిన్నంటాయి. భారత్‌ అండర్‌-19 జట్టు పాకిస్థాన్‌పై అద్భుత విజయంతో ఆసియా కప్‌ను అందుకుంది. ఒమన్‌లోని అల్‌ అమరత్‌ మైదానంలో శనివారం జరిగిన ఫైనల్‌ పోరులో చివరి బంతి వరకు ఉత్కంఠ కొనసాగింది. 338 పరుగుల భారీ లక్ష్యంతో బరిలోకి దిగిన భారత్‌ ఒక దశలో ఓటమి అంచుకు చేరింది. 252 పరుగులకే ఎనిమిది వికెట్లు కోల్పోవడంతో పాకిస్థాన్‌ విజయం దాదాపు ఖాయమని అనిపించింది. కానీ చివరి వరకు పోరాడిన భారత కుర్రాళ్లు మ్యాచ్‌ స్వరూపాన్నే మార్చేశారు. చివరి బంతికి మూడు పరుగులు కావాల్సిన సమయంలో మోహిత్‌ ఉల్వా బౌండరీ బాది భారత్‌కు ఒక్క వికెట్‌ తేడాతో విజయాన్ని అందించాడు. దీంతో భారత్‌ తొమ్మిదోసారి అండర్‌-19 ఆసియా కప్‌ టైటిల్‌ను గెలుచుకుంది.
ఓటమి అంచు నుంచి గెలుపు వైపు
భారత్‌ ఇన్నింగ్స్‌లో ఆర్యవీర్‌ సెహ్వాగ్‌ 58 పరుగులు, కెప్టెన్‌ లక్ష్య రైచందాని 80 పరుగులతో జట్టుకు మంచి ఆరంభం ఇచ్చారు. అయితే మధ్య ఓవర్లలో వరుసగా వికెట్లు పడటంతో భారత్‌ కష్టాల్లో పడింది. ఈ సమయంలో మనాల్‌ చౌహాన్‌, మోహిత్‌ ఉల్వా జట్టును ఆదుకున్నారు. వీరిద్దరూ పాక్‌ బౌలర్లపై ఎదురుదాడికి దిగి పరుగుల వేగాన్ని పెంచారు. తొమ్మిదో వికెట్‌కు కీలక భాగస్వామ్యంతో భారత శిబిరంలో ఆశలు రేపారు. మనాల్‌ 47 పరుగులు చేసి ఔటయ్యే సమయానికి భారత్‌ ఇంకా విజయానికి 29 పరుగుల దూరంలో ఉంది. చేతిలో ఒక్క వికెట్‌ మాత్రమే ఉండటంతో పాకిస్థాన్‌ ఆటగాళ్లు విజయంపై ధీమాగా కనిపించారు.
చివరి ఓవర్‌లో ఎనిమిది పరుగులు
మనాల్‌ ఔటైనా మోహిత్‌ మాత్రం ఒత్తిడికి గురికాలేదు. మరోవైపు చివరి బ్యాటర్‌ సి. వెంకట కూడా అతడికి అండగా నిలిచాడు. మోహిత్‌ వరుసగా బౌండరీలు బాదుతూ భారత్‌ను విజయానికి చేరువ చేశాడు. చివరి ఓవర్‌లో భారత్‌కు ఎనిమిది పరుగులు అవసరమయ్యాయి. పాకిస్థాన్‌ కెప్టెన్‌ అహ్మద్‌ హుస్సేన్‌ చేతికి బంతి ఇచ్చాడు. ఆ ఓవర్‌లో ఉత్కంఠ మరింత పెరిగింది. చివరి బంతికి మూడు పరుగులు చేయాల్సిన పరిస్థితి వచ్చింది. మోహిత్‌ ముందుకొచ్చి లాంగ్‌ ఆఫ్‌ దిశగా బంతిని బలంగా బాదాడు. అది బౌండరీ దాటడంతో భారత ఆటగాళ్ల ఆనందానికి అవధులు లేకుండా పోయాయి. మోహిత్‌ 26 బంతుల్లో 49 పరుగులతో అజేయంగా నిలిచాడు. వెంకట 11 పరుగులతో నాటౌట్‌గా ఉన్నాడు.
పాక్‌ ఆటగాళ్ల ముందే మన కుర్రాళ్ల సంబరాలు
విజయం ఖరారు కాగానే భారత ఆటగాళ్లంతా మైదానంలోకి పరుగెత్తుకొచ్చారు. మోహిత్‌ను చుట్టుముట్టి భుజాలపై ఎత్తుకుని అభినందించారు. అతడికి త్రివర్ణ పతాకాన్ని చుట్టి విజయోత్సవం చేసుకున్నారు. కొందరు ఆటగాళ్లు పాకిస్థాన్‌ వికెట్‌ కీపర్‌ హంజా జహూర్‌ ముందే తమ ఆనందాన్ని వ్యక్తం చేశారు. ప్రత్యర్థి జట్టుకు తమ విజయాన్ని చూపించేలా కొందరు సంజ్ఞలు చేయడంతో మైదానంలో ఉద్వేగభరిత వాతావరణం కనిపించింది. ఆ తర్వాత భారత ఆటగాళ్లు అభిమానుల వైపు వెళ్లి వారితో కలిసి సంబరాలు చేసుకున్నారు. మ్యాచ్‌ ముగిసిన తర్వాత ఈ దృశ్యాలు సామాజిక మాధ్యమాల్లో విస్తృతంగా చక్కర్లు కొట్టాయి. గత ఫైనల్‌లో భారత్‌పై భారీ విజయం సాధించిన పాకిస్థాన్‌కు ఈసారి చివరి బంతికి ఓటమి ఎదురైంది.
మరిన్ని క్రీడ వార్తల కోసం ఇక్కడ క్లిక్ చేయండి..