Ind vs Eng 5th Test : టీమిండియాను వెంటాడుతున్న ఐదో టెస్ట్ శాపం.. గిల్ సేన గెలిచి రికార్డు తిరగరాస్తుందా ?
క్రికెట్ అభిమానులకు ఓవల్ టెస్ట్ అంటేనే టెన్షన్! భారత్, ఇంగ్లాండ్ మధ్య జరగనున్న ఐదో, చివరి టెస్ట్ మ్యాచ్ ఇది. ఈ మ్యాచ్ టీమిండియాకు 'డు ఆర్ డై' లాంటిది. ఓడిపోతే సిరీస్ చేజారుతుంది, గెలిస్తే ఓటమి బాధ నుండి బయటపడొచ్చు. కానీ ఓవల్లో గెలవడం అంత తేలిక కాదు.
Ind vs Eng 5th Test : క్రికెట్ అభిమానులకు ఓవల్ టెస్ట్ అంటేనే టెన్షన్ పట్టుకుంది. భారత్, ఇంగ్లాండ్ మధ్య జరగనున్న ఐదో, చివరి టెస్ట్ మ్యాచ్ ఇది. ఈ మ్యాచ్ టీమిండియాకు డు ఆర్ డై లాంటిది. ఓడిపోతే సిరీస్ చేజారుతుంది, గెలిస్తే ఓటమి బాధ నుండి బయటపడొచ్చు. కానీ ఓవల్లో గెలవడం అంత తేలిక కాదు. ఎందుకంటే, ఇక్కడ భారత్ రికార్డు దారుణంగా ఉంది. అంతేకాదు, ఒక శాపంలా వెంటాడుతున్న ఒక రికార్డు కూడా టీమిండియాను భయపెడుతోంది. టీమిండియాకు ఏ టెస్ట్ సిరీస్లోనైనా ఐదో టెస్ట్ అంటే ఒక శాపంలాంటిది. భారత క్రికెట్ చరిత్రలో ఇప్పటివరకు ఏ కెప్టెన్ కూడా విదేశీ గడ్డపై ఐదో టెస్ట్ను గెలవలేదు. ఇప్పటివరకు భారత్ 16 సార్లు విదేశాల్లో ఐదు మ్యాచ్ల టెస్ట్ సిరీస్లు ఆడింది. కానీ ఒక్కసారి కూడా చివరి టెస్ట్లో గెలుపు రుచి చూడలేదు. మొత్తం 16 మ్యాచ్ల్లో 10 మ్యాచ్ల్లో ఓడిపోయింది, 6 మ్యాచ్లు డ్రా అయ్యాయి. ఇప్పుడు మళ్ళీ ఓవల్లో భారత జట్టు సిరీస్లోని ఐదో టెస్ట్ ఆడబోతోంది. ఈసారి శుభమన్ గిల్ ఈ చరిత్రను మారుస్తాడా? లేదా అనేది ఆసక్తిగా మారింది.
ఈ టెస్ట్ సిరీస్లో భారత జట్టుకు ఇప్పటివరకు బ్యాటింగ్కు అనుకూలమైన పిచ్లు లభించాయి. కానీ ఓవల్లో పరిస్థితి భిన్నంగా ఉండవచ్చు. శుభమన్ గిల్ స్వయంగా ప్రెస్ కాన్ఫరెన్స్లో మాట్లాడుతూ, ఓవల్ పిచ్పై గడ్డి ఉందని, ఇక్కడ పేస్ బౌలర్లకు ఎక్కువ సహాయం లభించవచ్చని చెప్పారు. ఇంగ్లాండ్ కూడా ఈ పిచ్ను దృష్టిలో ఉంచుకునే తమ ప్లేయింగ్ ఎలెవన్లో మార్పులు చేసింది. స్పెషలిస్ట్ స్పిన్నర్ను కూడా తీసుకోకుండా, నలుగురు ప్యూర్ పేస్ బౌలర్లతో బరిలోకి దిగుతోంది. అందులో ముగ్గురు స్వింగ్ బౌలర్లు ఉన్నారు. టీమిండియాకు ఒక మంచి విషయం ఏమిటంటే, ఇంగ్లాండ్ కెప్టెన్ బెన్ స్టోక్స్ గాయం కారణంగా ఈ మ్యాచ్ ఆడటం లేదు. అలాగే జోఫ్రా ఆర్చర్కు విశ్రాంతినిచ్చారు. దీంతో మంచి ఫామ్లో ఉన్న భారత బ్యాట్స్మెన్లకు ఇక్కడ పరుగులు చేసే అవకాశం లభిస్తుంది.
ఓవల్లో రికార్డు దారుణంగా ఉన్నా, గత మ్యాచ్లలో భారత బ్యాట్స్మెన్లు చూపిన తెగువ, ఫామ్ చూస్తుంటే ఈసారి ఆ శాపం పోయే అవకాశం ఉందని అభిమానులు ఆశిస్తున్నారు. శుభమన్ గిల్ కెప్టెన్సీలో టీమిండియా సరికొత్త చరిత్ర సృష్టించి, విదేశీ గడ్డపై ఐదో టెస్ట్ను గెలిచి, సిరీస్లో ఓటమిని తప్పించుకుంటుందా లేదా అనేది చూడాలి.
మరిన్ని క్రికెట్ వార్తల కోసం ఇక్కడ క్లిక్ చేయండి..