ICC Rankings : ఐసీసీ ర్యాంకింగ్స్లో భారత్ హవా.. రెండు ఫార్మాట్లలో టీమిండియా టాప్!
ఐసీసీ ర్యాంకింగ్స్లో భారత టీం ఆధిపత్యం చెలాయిస్తోంది. మూడు ఫార్మాట్లలో ఐదుగురు భారత క్రికెటర్లు అభిషేక్ శర్మ, శుభ్మన్ గిల్, హార్దిక్ పాండ్యా, రవీంద్ర జడేజా, జస్ప్రీత్ బుమ్రా ప్రపంచ నెం.1 స్థానాన్ని కైవసం చేసుకున్నారు. టీమిండియా వన్డే, టీ20 జట్ల ర్యాంకింగ్స్లోనూ అగ్రస్థానంలో నిలిచింది.
ICC Rankings : అంతర్జాతీయ క్రికెట్ కౌన్సిల్ తాజాగా ప్రకటించిన ర్యాంకింగ్స్లో భారతదేశం ఆధిపత్యాన్ని చాటిచెప్పింది. ఏకంగా ఐదుగురు భారత ఆటగాళ్లు వివిధ ఫార్మాట్లలో అగ్రస్థానంలో నిలిచారు. వన్డే, టీ20 బ్యాటర్ల ర్యాంకింగ్స్లో ఇద్దరు యువ బ్యాట్స్మెన్ టాప్లో ఉండగా, టెస్ట్, టీ20 ఆల్రౌండర్ల జాబితాలో ఇద్దరు సీనియర్లు మొదటి స్థానాన్ని దక్కించుకున్నారు. అంతేకాదు, టీమిండియా జట్టుగా కూడా రెండు ఫార్మాట్లలో నంబర్ 1 స్థానంలో ఉంది.
ఐసీసీ ర్యాంకింగ్స్లో టాప్ ప్లేయర్స్!
1. అభిషేక్ శర్మ
టీ20 బ్యాటర్ల ర్యాంకింగ్స్లో ఎడమచేతి వాటం బ్యాట్స్మెన్ అభిషేక్ శర్మ ఫస్ట్ ప్లేసులోకి ఎగబాకారు. గతంలో అగ్రస్థానంలో ఉన్న ట్రావిస్ హెడ్ను అధిగమించి, అభిషేక్ శర్మ 829 పాయింట్లతో తొలి స్థానాన్ని కైవసం చేసుకున్నారు. అతని నిలకడైన ప్రదర్శన ఈ ఘనతకు కారణమైంది.
2. శుభ్మన్ గిల్
వన్డే క్రికెట్ బ్యాటర్ల జాబితాలో శుభ్మన్ గిల్ అగ్రస్థానంలో నిలిచారు. పాకిస్థాన్ మాజీ కెప్టెన్ బాబర్ ఆజమ్ను దాటి, గిల్ 784 పాయింట్లతో నంబర్ 1 స్థానంలో ఉన్నారు. అతని మెరుగైన ప్రదర్శన వన్డే క్రికెట్లో అతన్ని టాప్ బ్యాట్స్మెన్గా నిలబెట్టింది.
3. హార్దిక్ పాండ్యా
టీ20 ఆల్రౌండర్ల ర్యాంకింగ్స్లో హార్దిక్ పాండ్యా తన మొదటి స్థానాన్ని పదిలం చేసుకున్నారు. 252 పాయింట్లతో హార్దిక్ గత కొన్ని వారాలుగా నంబర్ 1 స్థానాన్ని నిలబెట్టుకుంటున్నారు. బ్యాట్, బాల్ రెండింటితోనూ అతని ఆల్రౌండ్ ప్రదర్శన అద్భుతం.
4. రవీంద్ర జడేజా
భారత టెస్ట్ జట్టు స్టార్ ఆల్రౌండర్ రవీంద్ర జడేజా టెస్ట్ ఆల్రౌండర్ల జాబితాలో తన అగ్రస్థానాన్ని కాపాడుకున్నారు. మొత్తం 422 పాయింట్లతో జడేజా గత ఒక నెల నుండి మొదటి స్థానం నుండి కిందకు రాలేదు. అతని స్థిరమైన బౌలింగ్, బ్యాటింగ్ ప్రదర్శనలు ఈ స్థానానికి కారణం.
5. జస్ప్రీత్ బుమ్రా
టెస్ట్ బౌలర్ల టాప్-10 జాబితాలో టీమిండియా పేసర్ జస్ప్రీత్ బుమ్రా మొదటి స్థానంలో నిలిచారు. 898 పాయింట్లతో బుమ్రా ఇంగ్లండ్ సిరీస్ ద్వారా అగ్రస్థానాన్ని నిలబెట్టుకోగలిగారు. అతని కచ్చితమైన బౌలింగ్ మరియు వికెట్లు తీసే సామర్థ్యం అతన్ని ఈ స్థానంలో నిలబెట్టింది.
టీమ్ ర్యాంకింగ్స్లో భారత్ స్థానం
ఐసీసీ జట్టు ర్యాంకింగ్స్ జాబితాలో కూడా టీమిండియా అగ్రస్థానంలో నిలిచింది. వన్డే, టీ20 జట్ల ర్యాంకింగ్స్లో భారత జట్టు మొదటి స్థానంలో ఉంది. అయితే, టెస్ట్ జట్ల ర్యాంకింగ్స్లో మాత్రం భారత్ 4వ స్థానంలో ఉంది. మొత్తం మీద, మూడు ఫార్మాట్లలో టాప్ ప్లేయర్స్, రెండు ఫార్మాట్లలో టీమ్ నంబర్ 1 గా ఉండడం భారత క్రికెట్కు గొప్ప విజయం.
మరిన్ని క్రికెట్ వార్తల కోసం ఇక్కడ క్లిక్ చేయండి..