అత్యాధునిక సౌకర్యాలతో నిర్మించిన కొత్త క్రికెట్ స్టేడియాన్ని ప్రారంభించిన జైషా! ఎక్కడంటే..?
ఐసీసీ ఛైర్మన్ జయ్ షా అత్యాధునిక TCA అరేనాను ప్రారంభించారు. ప్రపంచకప్ ఛాలెంజ్ లీగ్కు వేదికగా నిలవనున్న ఈ స్టేడియం ప్రత్యేకతలు, టాంజానియా క్రికెట్ అభివృద్ధికి దీని ప్రాధాన్యం, ఇతర వివరాలు ఇలా ఉన్నాయి. పూర్తి వివరాల కోసం ఈ కథనం చదవండి.
అంతర్జాతీయ క్రికెట్ కౌన్సిల్ ఛైర్మన్ జైషా టాంజానియా క్రికెట్ అసోసియేషన్ నిర్మించిన అత్యాధునిక TCA అరేనాను అధికారికంగా ప్రారంభించారు. ఆదివారం జరిగిన ఈ కార్యక్రమం టాంజానియాలో క్రికెట్ అభివృద్ధికి కీలక మైలురాయిగా నిలిచింది. కొత్త స్టేడియం ప్రారంభంతో ఆఫ్రికా ప్రాంతంలో క్రికెట్ విస్తరణకు మరింత ఊతం లభిస్తుందని ఐసీసీ అభిప్రాయపడింది.
ప్రముఖుల సమక్షంలో ప్రారంభోత్సవం
ఈ కార్యక్రమానికి ఐసీసీ బోర్డు డైరెక్టర్లు, టాంజానియా ప్రభుత్వ ఉన్నతాధికారులు, క్రీడా ప్రముఖులు హాజరయ్యారు. జైషాతో పాటు దార్ ఎస్ సలామ్ విశ్వవిద్యాలయం వైస్ ఛాన్సలర్ ప్రొఫెసర్ విలియం అనంగిస్యే, జాతీయ క్రీడా మండలి సెక్రటరీ జనరల్ నీమా మ్సితా, టాంజానియా క్రికెట్ అసోసియేషన్ ఛైర్మన్ డాక్టర్ బి.ఎస్. శ్రీకుమార్ వేదికను పంచుకున్నారు.
ప్రపంచకప్ ఛాలెంజ్ లీగ్కు ప్రధాన వేదిక
ఆగస్టు 8 నుంచి 18 వరకు జరగనున్న ICC పురుషుల క్రికెట్ ప్రపంచకప్ ఛాలెంజ్ లీగ్–B 2026 టోర్నమెంట్కు ఈ TCA అరేనా ప్రధాన వేదికగా వ్యవహరించనుంది. అంతర్జాతీయ ప్రమాణాలతో నిర్మించిన ఈ స్టేడియం భవిష్యత్తులో మరిన్ని ICC పాత్వే టోర్నమెంట్లకు కూడా ఆతిథ్యం ఇవ్వనుంది.
రెండేళ్లలో పూర్తైన నిర్మాణం
డార్ ఎస్ సలామ్ విశ్వవిద్యాలయం భూమిని కేటాయించడంతో 2024లో ఈ ప్రాజెక్టుకు రూపురేఖలు సిద్ధమయ్యాయి. 2025లో శంకుస్థాపన అనంతరం నిర్మాణ పనులు వేగంగా సాగి, 2026 జూలై నాటికి అంతర్జాతీయ మ్యాచ్ల నిర్వహణకు అవసరమైన అన్ని సదుపాయాలతో స్టేడియం సిద్ధమైంది.
క్రికెట్ అభివృద్ధికి కేంద్రంగా అరేనా
TCA అరేనా కేవలం మ్యాచ్ల నిర్వహణకే పరిమితం కాదు. ఆటగాళ్ల శిక్షణ, కోచ్లు, అంపైర్లకు శిక్షణ, యువ ప్రతిభను గుర్తించడం, కమ్యూనిటీ క్రికెట్ కార్యక్రమాల నిర్వహణకు కూడా ఇది ప్రధాన కేంద్రంగా ఉపయోగపడనుంది. టాంజానియాలో క్రికెట్ను గ్రామీణ స్థాయి వరకు విస్తరించడంలో ఈ వేదిక కీలక పాత్ర పోషించనుంది.
మరిన్ని క్రికెట్ వార్తల కోసం ఇక్కడ క్లిక్ చేయండి.