Hardik Pandya : అసలు హార్దిక్ పాండ్యా ఎస్ఆర్హెచ్కు ఆడేవాడు.. కానీ, షాకింగ్ నిజాలు బయటపెట్టిన ఇర్ఫాన్
ఇండియన్ ప్రీమియర్ లీగ్లో ముంబై ఇండియన్స్ కెప్టెన్గా ఉన్న హార్దిక్ పాండ్యా తన ఐపీఎల్ అరంగేట్రం మరో ఫ్రాంచైజీతో చేయాల్సిందని టీమిండియా మాజీ క్రికెటర్ ఇర్ఫాన్ పఠాన్ సంచలన విషయం బయటపెట్టారు. సాధారణంగా ముంబై ఇండియన్స్ హార్దిక్ను బరోడాలో జరిగిన స్థానిక టీ20 టోర్నమెంట్లలో గుర్తించి 2015 ఐపీఎల్ వేలంలో కొనుగోలు చేసింది.
Hardik Pandya : ముంబై ఇండియన్స్ కెప్టెన్ హార్దిక్ పాండ్యా.. ఐపీఎల్ అరంగేట్రం వేరే ఫ్రాంచైజీతో చేయాల్సి ఉండేది. ఈ సంచలన విషయాన్ని మాజీ భారత ఆల్రౌండర్ ఇర్ఫాన్ పఠాన్ తాజాగా బయటపెట్టాడు. బరోడాలో జరిగిన స్థానిక టీ20 టోర్నమెంట్లలో అతని టాలెంటును గుర్తించిన ముంబై ఇండియన్స్ యాజమాన్యం, 2015 ఐపీఎల్ వేలంలో హార్దిక్ను కొనుగోలు చేసింది. కానీ, ముంబైకి కాకుండా మరో జట్టుకు హార్దిక్ ఆడే అవకాశం ఉందని ఇర్ఫాన్ పఠాన్ చెప్పాడు.
ముంబై ఇండియన్స్కు రాకముందు హార్దిక్ పాండ్యా, సన్రైజర్స్ హైదరాబాద్ జట్టులో చేరే అవకాశం ఉండేదని ఇర్ఫాన్ పఠాన్ వెల్లడించాడు. ఒకప్పుడు సన్రైజర్స్ హైదరాబాద్ మెంటార్గా ఉన్న వీవీఎస్ లక్ష్మణ్ తన మాట విననందుకు పశ్చాత్తాపపడ్డాడని ఇర్ఫాన్ గుర్తు చేసుకున్నాడు. “2012లో ఇర్ఫాన్ మాట విననందుకు నేను బాధపడుతున్నాను. ఆ రోజు ఇర్ఫాన్ మాట విని ఉంటే, హార్దిక్ పాండ్యా సన్రైజర్స్ హైదరాబాద్కు ఆడేవాడు” అని లక్ష్మణ్ తనతో అన్నట్లు ఇర్ఫాన్ తెలిపాడు. ఈ వ్యాఖ్యలతో తన స్వస్థలం బరోడా నుంచి వచ్చిన యువ క్రికెటర్లను తాను, తన సోదరుడు యూసుఫ్ పఠాన్ ఎప్పుడూ ప్రోత్సహిస్తారని ఇర్ఫాన్ పఠాన్ స్పష్టం చేశాడు.
ఇర్ఫాన్ పఠాన్, ఇటీవల టీ20 ప్రపంచ కప్ 2024 జట్టు ఎంపికపై హార్దిక్ పాండ్యాను ప్రశ్నించాడు. ఒక ప్రధాన ఆల్రౌండర్గా అంతర్జాతీయ స్థాయిలో మరింత ప్రభావం చూపాలని హార్దిక్కు ఇర్ఫాన్ సూచించాడు. “నాకు హార్దిక్ పాండ్యా గురించి ఒక విషయం అనిపిస్తుంది. భారత క్రికెట్ బోర్డు అతనికి ఇచ్చినంత ప్రాధాన్యతను ఇంకెవరికీ ఇవ్వకూడదు. ఒక ఆల్రౌండర్గా నువ్వు జట్టుకు చాలా అవసరం అనిపించుకోవాలంటే, అంతర్జాతీయ స్థాయిలో ఆ లెవల్ టాలెంట్ చూపించాలి” అని ఇర్ఫాన్ వ్యాఖ్యానించాడు.
అయితే, టీ20 ప్రపంచ కప్ ఫైనల్లో చివరి ఓవర్లో 15 పరుగులను అద్భుతంగా డిఫెండ్ చేసి, భారత్కు రెండో టీ20 ప్రపంచ కప్ టైటిల్ను అందించాడు హార్దిక్. ఈ టోర్నమెంట్లో 144 పరుగులు చేసి, 11 వికెట్లు కూడా పడగొట్టాడు. అయినప్పటికీ, ఇర్ఫాన్ తన వ్యాఖ్యలను సమర్థించుకున్నాడు. క్రికెట్లో విమర్శలు, ప్రశంసలు సహజమని, ఇది ఆటలో ఒక భాగమని అన్నాడు. “ఒక ఆటగాడిని విమర్శించడంలో తప్పు లేదు. క్రికెట్ ఆడుతున్నప్పుడు వాటిని ఎదుర్కోవాలి. సునీల్ గవాస్కర్, సచిన్ టెండూల్కర్ వంటి దిగ్గజాలు కూడా వీటిని ఎదుర్కొన్నారు. వారు ఎప్పుడూ ఆట కంటే తాము గొప్పవారమని అనుకోలేదు” అని ఇర్ఫాన్ పఠాన్ వివరించాడు.
మరిన్ని క్రికెట్ వార్తల కోసం ఇక్కడ క్లిక్ చేయండి..