రీ ఎంట్రీకి రెడీ అవుతున్న వార్నర్

ఆస్ట్రేలియా స్టార్‌ ఆటగాడు డేవిడ్ వార్నర్‌ తిరిగి గ్రౌండ్‌లో అడుగుపెట్టేందుకు సిద్ధమవుతున్నాడు. బాల్‌ ట్యాంపరింగ్‌ కేసులో చిక్కుకున్న వార్నర్‌పై సంవత్సరం పాటు క్రికెట్‌ నిషేధం విధిస్తూ ఐసీసీ నిర్ణయం తీసుకున్న విషయం తెలిసిందే. ఈ నెల 28తో వార్నర్‌పై నిషేధం ముగియనుంది. దీంతో వార్నర్‌ రీఎంట్రీ దాదాపు ఖరారైంది.

ప్రతిష్ఠాత్మక ఐపిఎల్ టోర్నీలో ఆడేముందు ఎస్‌ఆర్‌హెచ్‌ అభిమానులను ఒక వీడియోతో పలకరించాడు వార్నర్. ‘ ఇన్ని సంవత్సరాలుగా మీరు మాపై కురిపిస్తున్న ప్రేమాభిమానాలకి కృతజ్ఞతలు.. ఇప్పుడు మీ నమ్మకాన్ని నిలబెట్టే సమయం మళ్లీ వచ్చింది ’ అంటూ వార్నర్‌ మాట్లాడిన వీడియోని ఎస్‌ఆర్‌హెచ్‌ ప్రాంఛైజీ తన అధికారిక ట్విటర్‌ ఖాతాలో పోస్ట్‌ చేసింది. వార్నర్‌ నేతృత్వంలో 2016 ఐపీఎల్ సీజన్‌లో ఎస్‌ఆర్‌హెచ్‌ విజేతగా నిలిచింది. మార్చి 24న సన్‌రైజర్స్ హైదరాబాద్, కోల్‌కత్తా నైట్‌ రైడర్స్‌తో తొలి మ్యాచ్‌ ఆడనుంది.