ODI World Cup: 2027 వన్డే కప్పు కొట్టేది మనోళ్లే.. ఆకాష్ చోప్రా ఎంచుకున్న ఆరుగురు మొనగాళ్లు వీళ్లే
ODI World Cup: 2027 వన్డే వరల్డ్ కప్ కోసం మాజీ క్రికెటర్ ఆకాశ్ చోప్రా భారత జట్టు టాప్-6 ఆటగాళ్లను ప్రకటించాడు. రోహిత్ శర్మ, శుభ్‌మన్ గిల్, విరాట్ కోహ్లీ, శ్రేయస్ అయ్యర్, కేఎల్ రాహుల్, హార్దిక్ పాండ్యాలను ఆయన ఎంపిక చేశాడు.
ODI World Cup: భారత క్రికెట్ అభిమానుల్లో ఇప్పటినుంచే 2027 వన్డే ప్రపంచకప్ సందడి మొదలైపోయింది. సౌతాఫ్రికా, జింబాబ్వే, నమీబియా వేదికలుగా జరగబోయే ఈ మెగా టోర్నీకి సమయం దగ్గరపడుతున్న వేళ టీమిండియా స్క్వాడ్ ఎలా ఉండబోతుందనే దానిపై తీవ్ర చర్చ నడుస్తోంది. ఈ నేపథ్యంలో ప్రముఖ మాజీ క్రికెటర్, కామెంటర్ ఆకాశ్ చోప్రా తన యూట్యూబ్ ఛానెల్‌ వేదికగా 2027 వన్డే వరల్డ్ కప్ కోసం భారత బ్యాటింగ్ లైనప్‌లోని కీలకమైన టాప్-6 ఆటగాళ్లను ప్రకటించాడు. ప్రస్తుత ఫామ్, అనుభవాన్ని ప్రాతిపదికగా తీసుకుని ఆయన ఎంచుకున్న ఈ జాబితా ఇప్పుడు సోషల్ మీడియాలో విపరీతంగా వైరల్ అవుతోంది.
టాప్ ఆర్డర్‌లో మార్పులేదు
ఆకాశ్ చోప్రా ఎంచుకున్న ప్రణాళిక ప్రకారం 2023 వన్డే వరల్డ్ కప్ టాప్ ఆర్డర్‌నే 2027 లోనూ కొనసాగించాలని సూచించాడు. ఓపెనర్లుగా రోహిత్ శర్మ, శుభ్‌మన్ గిల్ బరిలోకి దిగుతారని, మూడో స్థానంలో ‘కింగ్’ విరాట్ కోహ్లీ బ్యాటింగ్‌కు వస్తారని స్పష్టం చేశాడు. 2026 సంవత్సరంలో వన్డేల్లో అత్యధిక పరుగులు చేసిన టాప్-5 బ్యాటర్లలో ఈ ముగ్గురూ ఉండటం విశేషం. గిల్ అగ్రస్థానంలో కొనసాగుతుండగా, రోహిత్, విరాట్ కూడా అద్భుతమైన ఫామ్‌లో ఉండటం భారత జట్టుకు కొండంత బలాన్ని ఇస్తోంది.
మిడిలార్డర్ భరోసా
మిడిలార్డర్‌లో నాలుగో స్థానానికి శ్రేయస్ అయ్యర్ సరైన ప్రాధాన్యమని ఆకాశ్ చోప్రా అభిప్రాయపడ్డాడు. వన్డేల్లో నాలుగో స్థానంలో 47కు పైగా సగటుతో 2000 కంటే ఎక్కువ పరుగులు చేసిన రికార్డు అయ్యర్ సొంతం. ఇక ఐదో స్థానంలో వికెట్ కీపర్ బ్యాటర్‌గా కేఎల్ రాహుల్‌‌ను ఎంపిక చేశాడు. ఐదో స్థానంలో రాహుల్ సాధించిన 68.58 సగటు, 4 సెంచరీలు, 10 అర్ధసెంచరీలు ఆయన ఆధిపత్యానికి నిదర్శనం. వికెట్ కీపింగ్ బ్యాకప్ రేసులో రిషభ్ పంత్ కంటే ఇషాన్ కిషన్‌కే ప్రాధాన్యత లభిస్తుందని ఆయన పేర్కొన్నాడు.
ఆల్‌రౌండర్ ఫినిషర్
ఆరో స్థానంలో ఆల్‌రౌండర్ హార్దిక్ పాండ్యా ఆడటం జట్టు సమతుల్యతకు అత్యంత కీలకమని చోప్రా వివరించాడు. ఐపీఎల్ 2026 తర్వాత గాయం కారణంగా హార్దిక్ మైదానానికి దూరంగా ఉన్నప్పటికీ, ఆయన రీఎంట్రీ ఇస్తే ఆరో స్థానంలో మరెవరూ ఆయనకు పోటీ రాలేరని చెప్పాడు. హార్దిక్ ఎప్పుడూ ఫామ్ కోల్పోవడం తాను చూడలేదని, ఎంతటి ఒత్తిడిలోనైనా మ్యాచ్‌ను ఫినిష్ చేయగల సత్తా ఆయనకు ఉందని ఆకాశ్ చోప్రా ప్రశంసించాడు.
అనుభవానికే అగ్రపీఠం
2023 ప్రపంచకప్ ఫైనల్ ఓటమి తర్వాత మరింత పట్టుదలతో ఉన్న భారత సీనియర్ ఆటగాళ్లు 2027 టోర్నీని సొంతం చేసుకోవడమే లక్ష్యంగా ముందుకు సాగుతున్నారు. ఆకాశ్ చోప్రా సూచించిన ఈ టాప్-6 కాంబినేషన్ చూస్తుంటే ప్రపంచంలోనే అత్యంత ప్రమాదకరమైన బ్యాటింగ్ లైనప్‌గా రూపుదిద్దుకునే సంకేతాలు స్పష్టంగా కనిపిస్తున్నాయి. రాబోయే సిరీస్‌లలో ఈ ఆటగాళ్ల ప్రదర్శన ఆధారంగా తుది స్క్వాడ్ రూపుదిద్దుకోనుంది.
మరిన్ని క్రీడా వార్తల కోసం ఇక్కడ క్లిక్ చేయండి..