Wiaan Mulder : ఎప్పుడొచ్చాం అని కాదు అన్నయ్య.. ఫస్ట్ మ్యాచ్ లోనే రికార్డు విక్టరీ అందించిన డేంజరస్ ప్లేయర్
దక్షిణాఫ్రికా జింబాబ్వేపై ఇన్నింగ్స్ 236 పరుగుల తేడాతో ఘన విజయం సాధించి, సిరీస్ను 2-0తో క్లీన్ స్వీప్ చేసింది. కెప్టెన్ వియాన్ ముల్డర్ 367 పరుగులతో అదరగొట్టాడు. దక్షిణాఫ్రికా ఇప్పుడు వరుసగా 10 టెస్ట్ విజయాలను సొంతం చేసుకుని చరిత్ర సృష్టించింది.
Wiaan Mulder : సౌతాఫ్రికా జింబాబ్వేపై రెండో టెస్ట్ మ్యాచ్లో అదరగొట్టింది. 236 పరుగుల తేడాతో ఘన విజయం సాధించింది. కేవలం మూడు రోజుల్లోనే మ్యాచ్ను ముగించి,సౌతాఫ్రికా 2-0తో సిరీస్ను క్లీన్ స్వీప్ చేసింది. కెప్టెన్ వియాన్ ముల్డర్ అద్భుతమైన ఆల్ రౌండ్ ప్రదర్శన, అందులో ఒక మర్చిపోలేని ట్రిపుల్ సెంచరీ ఈ మ్యాచ్కే హైలైట్గా చెప్పుకోవచ్చు. గత కొంతకాలంగా వెనుకబడి ఉన్న సౌతాఫ్రికా టెస్ట్ క్రికెట్లో బలంగా పుంజుకుంటుంది. ఈ మ్యాచ్ వారికి మరో మైలురాయిని అందించింది. జింబాబ్వేపై విజయం సాధించడంతో, సౌతాఫ్రికా ఇప్పుడు వరుసగా 10 టెస్ట్ విజయాలు సాధించింది. వారి టెస్ట్ క్రికెట్ చరిత్రలో ఇలా జరగడం ఇదే మొదటిసారి. అంతకుముందు, సౌతాఫ్రికా ప్రపంచ టెస్ట్ ఛాంపియన్షిప్ ఫైనల్లో ఆస్ట్రేలియాను ఓడించి మొదటిసారిగా టైటిల్ను గెలుచుకుంది. ఇది ఈ ఫార్మాట్లో తన ఆధిపత్యాన్ని ప్రదర్శించింది.
కెప్టెన్గా వియాన్ ముల్డర్కు ఇది మొదటి టెస్ట్ మ్యాచ్. ఈ మ్యాచ్లో అతను ఒక మర్చిపోలేని ప్రదర్శన చేశాడు. మొదట బ్యాటింగ్ చేసిన సౌతాఫ్రికా, 626/7 భారీ స్కోర్ వద్ద తమ ఇన్నింగ్స్ను డిక్లేర్ చేసింది.కెప్టెన్ వియాన్ ముల్డర్ ముందుండి నడిపించి, 367 పరుగులు చేశాడు. ఈ ఇన్నింగ్స్లో 49 ఫోర్లు, 4 సిక్స్లు ఉన్నాయి. ఇది అతని మొదటి ట్రిపుల్ సెంచరీ, సౌతాఫ్రికా కెప్టెన్లలో ఇది అత్యుత్తమ వ్యక్తిగత ప్రదర్శనలలో ఒకటిగా నిలిచింది. బెడింగ్హామ్ కూడా 82 పరుగులు చేసి స్కోర్బోర్డును ముందుకు నడిపించాడు.
జింబాబ్వే రెండు ఇన్నింగ్స్లలోనూ ఎటువంటి ప్రభావం చూపించలేకపోయింది. మొదటి ఇన్నింగ్స్లో వారు 170 పరుగులకే ఆలౌట్ అయ్యారు. ఆ తర్వాత ఫాలో ఆన్ ఆడవలసి రాగా రెండో ఇన్నింగ్స్లో కేవలం 220 పరుగులు మాత్రమే చేయగలిగారు. మొదటి ఇన్నింగ్స్లో ప్రెనెలాన్ సుబ్రాయెన్ 4 వికెట్లు తీసి అద్భుతంగా రాణించగా, ముల్డర్ 2 వికెట్లు పడగొట్టాడు. రెండో ఇన్నింగ్స్లో కార్బిన్ బోష్ అద్భుతంగా బౌలింగ్ చేసి 4 వికెట్లు తీసి జింబాబ్వేను త్వరగా ఆలౌట్ చేశాడు.
ఈ అద్భుతమైన విజయంతో, దక్షిణాఫ్రికా జింబాబ్వేను సిరీస్లో పూర్తిగా ఓడించడమే కాకుండా, తదుపరి డబ్ల్యూటీసీ సైకిల్కు అద్భుతమైన ఫామ్తో వెళ్తున్నామని చాటింది. వియాన్ ముల్డర్ ఒక డైనమిక్ కెప్టెన్గా, అద్భుతమైన ఆటగాడిగా ఎదగడం జట్టుకు కొత్త బలాన్ని ఇచ్చింది. బ్యాటింగ్, బౌలింగ్లలో రాణించి సౌతాఫ్రికా జట్టు టెస్ట్ క్రికెట్లో ఒక బలమైన శక్తిగా మారింది.
మరిన్ని క్రికెట్ న్యూస్ కోసం ఇక్కడ చేయండి..