లో దుస్తులపై నిషేధం.. ఈ రూల్ వెనుక అసలు కారణం తెలిస్తే అవాక్కవుతారంతే..!
Underwear Ban: ప్రపంచంలో రకరకాల వింత చట్టాలు ఉంటాయని విన్నాం కానీ, వేసుకునే లోదుస్తులపై కూడా ప్రభుత్వాలు నిషేధం విధిస్తాయని ఎప్పుడైనా ఊహించారా? ఆరోగ్య భద్రత సాకుతో కొన్ని రకాల లోదుస్తుల విక్రయాలను ఏకంగారద్దు చేయడం ఇప్పుడు తీవ్ర చర్చనీయాంశంగా మారింది.
Underwear Ban: ఒక్కో దేశంలో ఒక్కో విధమైన ఆచారాలు, కఠిన చట్టాలు అమల్లో ఉంటాయి. సింగపూర్లో చూయింగ్ గమ్ నమలడం, కెనడాలో చిన్న పిల్లల వాకర్లు వాడటంపై నిషేధాలు ఉన్నాయి. అదే బాటలో రష్యా, బెలారస్, కజకిస్తాన్ దేశాలు లోదుస్తుల విక్రయంపై వినూత్న నిబంధనలను తెరపైకి తెచ్చాయి. ప్రారంభంలో లేస్, సన్నటి నెట్ వస్త్రంతో తయారు చేసే ఫ్యాన్సీ లోదుస్తులను పూర్తిగా నిషేధిస్తున్నట్లు ప్రచారం సాగింది. అయితే, కేవలం లేస్ లేదా సింథటిక్ దుస్తుల మీద కాకుండా, శరీరం నుంచి వచ్చే చెమటను పీల్చుకోలేని నాసిరకం దుస్తుల అమ్మకాలపైనే ఈ ఆంక్షలు ఉన్నాయని యూరేషియన్ ఎకనామిక్ కమిషన్ స్పష్టం చేసింది.
ఆరోగ్య భద్రత కోసమే ఈ కఠిన ఆంక్షలు..: ఈ నిబంధన వెనుక ఉన్న ముఖ్యమైన శాస్త్రీయ కారణం వస్త్రం తేమను పీల్చుకునే సామర్థ్యమే. చర్మానికి నేరుగా తగిలే దుస్తులు కనీసం 6 శాతం తేమను లేదా చెమటను పీల్చుకునే గుణాన్ని కలిగి ఉండాలని ప్రభుత్వం స్పష్టమైన ప్రామాణికాలను నిర్దేశించింది. 6 శాతం కంటే తక్కువ తేమను పీల్చుకునే వస్త్రాలను విక్రయించడం అక్కడ తీవ్రమైన నేరంగా పరిగణిస్తారు.
ఇన్ఫెక్షన్ల నివారణకు ప్రత్యామ్నాయ మార్గాలు..: దీనిని ఒక చిన్న ఉదాహరణతో అర్థం చేసుకోవచ్చు. పూర్తిగా 100 శాతం నైలాన్తో తయారైన లోదుస్తులు వేసుకున్నప్పుడు, అవి చెమటను అసలు పీల్చుకోవు. దానివల్ల తేమ అంతా చర్మం పైనే ఉండిపోయి దురద, మంట, ప్రమాదకర బ్యాక్టీరియా ఇన్ఫెక్షన్లు వ్యాపించే ముప్పు పెరుగుతుంది. అదే కాటన్ లేదా చెమటను పీల్చే వస్త్రంతో చేసిన లోదుస్తులు అయితే చర్మాన్ని పొడిగా ఉంచి, హాయిగా ఉండేలా చేస్తాయి. కాబట్టి చర్మానికి రక్షణ ఇచ్చే వస్త్రాల అమ్మకానికే అక్కడ అనుమతి లభిస్తుంది.
కాటన్ కోటింగ్ ఉంటేనే అమ్మకాలకు ఆమోదం..: ప్రభుత్వ నిబంధనల ప్రకారం ల్యాబ్లో పరీక్షించినప్పుడు కనీసం 6% తేమను పీల్చుకునే సామర్థ్యం ఉన్నట్లు తేలితేనే ఆ వస్త్రాలను మార్కెట్లో అమ్మడానికి అనుమతిస్తారు. అంటే పూర్తిగా కాటన్తో చేసిన లోదుస్తులతో పాటు, కాటన్, సింథటిక్ మిశ్రమంతో తయారైన దుస్తులను కూడా అమ్మవచ్చు. లేస్ బ్రా, ప్యాంటీలను కూడా విక్రయించవచ్చు, కానీ వాటి లోపలి భాగంలో కాటన్ లేయర్ లేదా నిర్దేశిత తేమను పీల్చుకునే ప్రత్యేకమైన డిజైన్ ఉండటం తప్పనిసరి.
చూడటానికి విచిత్రంగా అనిపించినప్పటికీ, పౌరుల ఆరోగ్య సంరక్షణ, చర్మ ఇన్ఫెక్షన్ల నివారణను దృష్టిలో ఉంచుకునే ఈ దేశాలు ఈ కఠిన నిర్ణయాన్ని అమలు చేస్తున్నాయి. విదేశాలకు వెళ్లేవారు లేదా ఆయా ప్రాంతాల్లో వ్యాపారం చేసేవారు ఇలాంటి ఆసక్తికరమైన స్థానిక చట్టాలను తెలుసుకోవడం ఎంతైనా అవసరం.