ఇంట్లో చీమల బెడద చిరాకు తెప్పిస్తుందా..? ఈజీగా తరిమికొట్టే సింపుల్ చిట్కాలు..!!
చాలా మంది ఇంట్లో చీమలతో చిరాకు పడుతుంటారు. ఎక్కడ పడితే అక్కడ చీమలు బారులు కట్టి చికాకు పెడుతుంటాయి. ఇంటి గోడల మూలల్లో, వంటిట్లో ఉండే పంచదార, వండిన ఆహారాలను కూడా చుట్టుముడుతుంటాయి. అప్పుడప్పుడు బట్టల్లో కూడా దూరిపోతుంటాయి. ఇంతలా ఇబ్బంది కలిగించే చీమల బెడదనుంచి తప్పించుకునేందుకు ప్రజలు రకరకాల ప్రయత్నాలు చేస్తుంటారు. అయితే, ఇంట్లోనే లభించే పదార్థాలతో ఈజీగా చీమల్ని తరిమికొట్టవచ్చని మీకు తెలుసా..?
చీమలు మిరియాలను ద్వేషిస్తాయి.. కాబట్టి మీరు చీమలు గుమిగూడే ప్రదేశాలలో మిరియాలను చల్లుకోవచ్చు. దీంతో చీమలు అక్కడి నుంచి పారిపోతాయి. దీనికోసం మీరు నల్ల మిరియాల పొడి లేదా మిరియాల పొడిని నీళ్లలో కలిపి చీమలు ఉన్న చోట్ల చల్లాలి. ఇలా చేస్తే చీమలు చిటికెలో మాయమవుతాయి.
నిమ్మరసం చీమలను తరిమికొట్టడానికి నిమ్మరసం అద్భుతంగా పనిచేస్తుంది. ఎందుకంటే చీమలు పులుపును ఇష్టపడవు.. అటువంటి పరిస్థితిలో మీరు చీమలు ప్రవేశించే ప్రదేశంలో నిమ్మరసం చల్లుకోవచ్చు. నిమ్మకాయ వాసనకు చీమలు రాకుండా ఉంటాయి. ఇల్లు తుడిచేటప్పుడు కూడా నీటిలో కొన్ని చుక్కల నిమ్మరసాన్ని వేసి తుడిస్తే చీమల బెడద తగ్గుతుంది.
పుదీనా చీమలను తరిమికొడుతుందని మీకు తెలుసా? ఎందుకంటే చీమలు పుదీనా వాసనను ఇష్టపడవు. కాబట్టి చీమలను తరిమికొట్టేందుకు పుదీనాను ఉపయోగించవచ్చు. పుదీనాను మీ ఇంటి బాల్కనీలో, ఇంటి చుట్టుపక్కల పెంచుకోవడం వల్ల చీమలు, దోమలు, పురుగుల్లాంటివి అటువైపు రాకుండా ఉంటాయి.
స్ప్రే బాటిల్‌లో వెనిగర్ నింపి చీమలు ఉన్న చోట పిచికారీ చేయాలి. దీని వల్ల ఇంట్లో చీమల బెడద ఉండదు.
చీమలను తరిమికొట్టడానికి ఇలాంటి ఎఫెక్టివ్ హోం రెమెడీస్ అద్బుతంగా పనిచేస్తాయి. దీనికోసం మీరు గోరువెచ్చని నీటిలో నారింజ తొక్కను పేస్ట్ చేసి చీమల మీద చల్లుకోవాలి. తక్షణమే చీమలు అక్కడ్నుంచి పారిపోతాయి. మళ్లీ ఇంట్లో చీమలు రాకుండా ఉంటాయి.