యోగా వల్ల ఎన్నో ఆరోగ్య సమస్యలు నయమవుతాయని నిపుణులు చెబుతుంటారు. మిమ్మల్ని మీరు ఫిట్గా చేసుకోవాలంటే తప్పనిసరిగా నిత్యం యోగాలసనాలు వేయాలి. ఇటీవల ప్రపంచవ్యాప్తంగా యోగా ప్రయోజనాలపై విసృత ప్రచారం పెరిగింది. చాలా మంది స్టార్స్ ఈ విషయానికి ఎక్కువ ప్రాధాన్యత ఇస్తున్నారు. కరోనా తర్వాత ఆరోగ్య సృహ మరింత పెరిగింది. దీంతో చాలా మంది తమను తాము ఫిట్గా ఉంచుకోవడానికి యోగాను ఎంచుకుంటున్నారు. కొన్ని వారాలలోనే సెలబ్రిటీ బాడీని పొందాలంటే కొన్నిసార్లు చాలా క్లిష్టమైన ఆసనాలు కూడా వేయాల్సి వస్తుంది. కానీ అవగాహన లేకుండా చేస్తే లేనిపోని ప్రమాదాలు తలెత్తుతాయి.
మీకు తెలియకుండా అకస్మాత్తుగా ఏదైనా ట్రై చేస్తే, గాయం రావచ్చు. వీటిని జీవితాంతం మోయవలసి ఉంటుంది. యోగా ప్రయోజనాలు పొందాలంటే, క్రమం తప్పకుండా సాధన చేయాలి. యోగా చేసేటప్పుడు అనుసరించడానికి కొన్ని నియమాలు ఉన్నాయి. అవేంటో ఇక్కడ తెలుసుకుందాం..
యోగా సాధన చేసే ముందు శారీరక స్థితి, సమస్యల గురించి పూర్తి అవగాహన ఉండాలి. ఏదైనా ఆరోగ్య సమస్యలు ఉంటే దాని ప్రకారం యోగాలసనాలను ఎంచుకోవాలి. యోగాలో చాలా రకాలు ఉన్నాయి. హఠ యోగా, పవర్ యోగా, బిక్రమ్ యోగా, ఆక్వా యోగా వంటివి. మీరు ఏ రకమైన యోగాను అభ్యసించాలనుకుంటున్నారో ముందుగా నిర్ణయించుకోవాలి.
ఆసనం కొంచెం క్లిష్టంగా ఉంటే, శ్వాసను సాధారణంగా ఉంచడం మర్చిపోతాం. కానీ యోగా అంటే శ్వాస తీసుకోవడం. ఆసనం, శ్వాస ద్వారా శరీరం నిర్విషీకరణ చేయబడుతుంది. కాబట్టి ఆసనం వేసేటప్పుడు శ్వాస తీసుకోవడంపై శ్రద్ధ పెట్టాలి.
వేరొకరిని చూసి మొదట చాలా క్లిష్టమైన ఆసనాలు వేయడానికి మొగ్గు చూపకూడదు. యోగాలో విజయం సాధించాలంటే ఓర్పు, ఏకాగ్రత, శ్రద్ధ అవసరం. ఏదైనా ఆసనం చాలా కష్టంగా అనిపిస్తే, ఒక్కసారిగా చేయకుండా క్రమంగా ఆ ఆసనం వేసేందుకు శరీరాన్ని సిద్ధం చేయాలి.
చాలా మంది కొన్ని రోజుల పాటు బేసిక్ రొటీన్ని అనుసరించిన తర్వాత వదులుకుంటారు. ఒక్కోసారి ఇంట్లో ప్రాక్టీస్కు కూడా అంతరాయం ఏర్పడుతుంటుంది. ఒక్క రోజులో ఏదీ జరిగిపోదనే విషయం ముందుగా గుర్తుంచుకోవాలి. యోగా ప్రయోజనాలను పొందాలంటే వారానికి కనీసం మూడు రోజులు క్రమం తప్పకుండా సాధన చేయడం అవసరం.