Copy Cat Bird: ఆ పక్షి చిన్నారిలా ఏడ్చి ఏమారుస్తుంది.. ఆగకుండా నాలుగు గంటల పాటు పాడి ఆకట్టుకుంటుంది.. అదేమిటో చూడండి..
పక్షులు కిలాకిలా రావాలు చేస్తాయని మనకు తెలుసు. కోకిల చక్కగా శ్రావ్యంగా కూస్తుందని తెలుసు. కానీ, అచ్చం మనిషిలా ఏడిచే పక్షిని మీరు ఎక్కడైనా చూశారా? పోనీ, ఇటువంటి పక్షి గురించి విన్నారా? లేదా అయితే ఈ స్టోరీ మీ కోసమే!
నిర్మానుష్యమైన అడవి లోంచి వెళుతున్నప్పుడు చిన్నారి ఏడుస్తున్న శబ్దం వినిపిస్తే షాక్ అవ్వడం సహజం. ఉలిక్కి పడి.. కాస్త ధైర్యం తెచ్చుకుని అక్కడ గాలిస్తే.. మీకు కనిపించే దృశ్యం చూస్తే ఆశ్చర్యం వేస్తుంది. ఎందుకంటే అది ఒక పక్షి చేసే శబ్దం.
ప్రస్తుతం అడవిలో ఎక్కడ ఈ పక్షి ఉంటుంది అనేది వెతకలేము కదా.. కానీ, ఆస్ట్రేలియాలోని సిడ్నీలోని తారోంగా జంతుప్రదర్శనశాలలో ఇలాంటి పక్షి ఉంది. ఇది మనుషులను అనుకరిస్తుంది. ఇది పిల్లల గొంతులో ఏడుపును సరిగ్గా అనుకరిస్తుంది. దీనిని లైర్‌బర్డ్ ఎకో అంటారు. మానవ స్వరాన్ని అనుకరించడం వలన, దీనిని కాపీ క్యాట్ పక్షి అని కూడా అంటారు.
ఆస్ట్రేలియాలోని తరోంగా జూ లైర్‌బర్డ్ వీడియోను ట్విట్టర్‌లో షేర్ చేసింది. ఆస్ట్రేలియన్ మ్యూజియం ప్రకారం, లైర్‌బర్డ్స్ శబ్దాలను అనుకరించడంలో నిపుణులు. ఇది పరిసరాల్లో చెక్కను కత్తిరించే యంత్రాలు, కారు ఇంజన్లు, జంతువుల శబ్దాలను కూడా అనుకరించగలదు.
జూ అడ్మినిస్ట్రేషన్ ప్రకారం, కొన్నిసార్లు ఇక్కడి సిబ్బంది భయపడేలా శబ్దాలు చేస్తాయి. నేషనల్ ఆడుబన్ సొసైటీ ప్రకారం, మగ లైర్‌బర్డ్స్ కొన్నిసార్లు సంతానోత్పత్తికి శబ్దాలు చేస్తాయి. మగ లైర్‌బర్డ్ ఆడ పక్షితో సంబంధం కోరుకున్నపుడు అనేక రకాల పెద్ద శబ్దాలు చేస్తుంది. సంతానోత్పత్తి సాధారణంగా జూన్ మరియు ఆగస్టు మధ్య జరుగుతుంది. ఈ సమయంలో ఆ మగపక్షి 3 నుంచి 4 గంటలు ఆగకుండా పాడుతుంది.
కార్నెల్ యూనివర్శిటీ పరిశోధకులు కూడా ఈ పక్షికి ఏదైనా ప్రమాదం జరిగినప్పుడు, దాని చుట్టూ అనేక పక్షులు ఉన్నట్లు సూచిస్తూ, సమూహాలలో నివసించే పక్షుల శబ్దాలను వెలువరించగలవని చెప్పారు.