పొరపాటున కుళ్లిన గుడ్డు తింటే శరీరంలో ఏం జరగుతుందో తెలుసా..? ఫ్రెష్ ఎగ్ను ఇలా కనిపెట్టండి..
ఉదయం ఉడకబెట్టిన గుడ్డు లేదా ఆమ్లెట్తో రోజును ప్రారంభించే వారి సంఖ్య అంతకంతకూ పెరుగుతుంది. అయితే మార్కెట్లో విక్రయించే గుడ్లలో ఏవి తాజావో, ఏవి పాడైపోయాయో సాధారణ కంటితో చూసి గుర్తించడం అంత తేలికైన విషయం కాదు. ఒక్కోసారి కుళ్లిన గుడ్లు తెచ్చుకుంటాం. ఇటువంటి గుడ్లు తింటే శరీరంలో ఏం జరుగుతుంది..? గుడ్లు ఫ్రెష్గా ఉన్నాయా.. లేదా..? అని ఎలా కనిపెట్టాలి..? అనే విషయాలు ఈ స్టోరీలో తెలుసుకుందాం..
శరీరానికి అవసరమైన మంచి ప్రొటీన్లు, విటమిన్లు అందించడంలో గుడ్లు అగ్రస్థానంలో ఉంటాయి. రోజువారీ ఆహారంలో భాగంగా చాలా మంది రెండు నుంచి మూడు గుడ్లను క్రమం తప్పకుండా తీసుకుంటారు. అయితే మార్కెట్లో విక్రయించే అన్ని గుడ్లూ ఆరోగ్యకరమైనవి కావు. కొన్నిసార్లు తెలియకుండా కొనుగోలు చేసే పాత లేదా కుళ్లిన గుడ్లు ప్రాణాల మీదికి తెచ్చే తీవ్రమైన అనారోగ్య సమస్యలకు దారితీస్తాయి.
పైకి సాధారణంగా కనిపించినప్పటికీ, పాడైపోయిన గుడ్లలో సాల్మొనెల్లా వంటి ప్రమాదకర బ్యాక్టీరియా వృద్ధి చెందుతుంది. ఈ బ్యాక్టీరియా ఆహార ఫుడ్ పాయిజన్కు ప్రధాన కారణం అవుతుంది. కుళ్లిన గుడ్డును ఉడికించి తిన్నా లేదా ఆమ్లెట్ రూపంలో తీసుకున్నా, అందులోని విషపూరిత అంశాలు జీర్ణవ్యవస్థపై తీవ్ర ప్రభావాన్ని చూపిస్తాయి.
పాడైపోయిన గుడ్లను తిన్న కొద్ది గంటల్లోనే శరీరంలో లక్షణాలు బయటపడతాయి. విపరీతమైన కడుపు నొప్పి, వాంతులు, విరేచనాలు, తీవ్రమైన జ్వరం వంటి ప్రాథమిక లక్షణాలు కనిపిస్తాయి. దీనివల్ల శరీరం త్వరగా డీహైడ్రేషన్కు గురై నీరసించిపోతుంది. ఇటువంటి గుడ్లు జీర్ణకోశంలో తీవ్రమైన ఇన్ఫెక్షన్లు, పేగుల వాపుకు దారితీస్తాయి. కడుపు ఉబ్బరం, గ్యాస్, అజీర్ణం, కడుపులో విపరీతమైన అసౌకర్యం కలుగుతాయి. రోగనిరోధక శక్తి తక్కువగా ఉండే పిల్లలు, వృద్ధులు, గర్భిణులపై ఈ ఇన్ఫెక్షన్ల ప్రభావం మరింత ప్రమాదకరంగా మారి ఆసుపత్రి పాలయ్యే పరిస్థితి వస్తుంది.
గుడ్డు మంచిదో కాదో తెలుసుకోవడానికి వాటర్ ఫ్లోట్ టెస్ట్ సులభమైన మార్గం. ఒక గిన్నెలో నీళ్లు తీసుకుని గుడ్డును వేసినప్పుడు, అది అడుగున మునిగి పడుకుంటే తాజా గుడ్డు అని అర్థం. గుడ్డు నిటారుగా తేలియాడుతూ పైకి వస్తే అది పాతబడి, లోపల గాలి చేరి కుళ్లిపోయిందని గుర్తించాలి. అలాగే గుడ్డును పగలగొట్టినప్పుడు తీవ్రమైన దుర్వాసన వచ్చినా, సొన విరిగిపోయి వింత రంగులో ఉన్నా వెంటనే పారేయాలి.
ప్యాక్ చేసిన గుడ్లను కొనుగోలు చేసేటప్పుడు ప్యాకేజింగ్, ఎక్స్పైరీ తేదీలను తప్పనిసరిగా పరిశీలించాలి. గుడ్లను ఎల్లప్పుడూ చల్లని వాతావరణంలో లేదా రిఫ్రిజిరేటర్లో భద్రపరచుకోవడం మంచిది. వండే ముందు సరైన పరిశీలన చేయడం ద్వారా ఇన్ఫెక్షన్ల బారిన పడకుండా ఆరోగ్యాన్ని కాపాడుకోవచ్చు.