వంటింటి మసాలా కాదు.. బంగారానికంటే ఖరీదు.. ప్రపంచ మార్కెట్ను ఊపేస్తున్న రెడ్ గోల్డ్!
ప్రపంచంలోనే అత్యంత ఖరీదైన మసాలా దినుసుగా గుర్తింపు పొందిన కేసర్ను రెడ్ గోల్డ్ (ఎర్ర బంగారం) అని పిలుస్తారు. దీనిని ఆహారంతో పాటు మందులు, సౌందర్య సాధనాల్లో విస్తృతంగా ఉపయోగిస్తారు. అయితే కేసర్లో కూడా నాణ్యత, ధరను బట్టి పలు రకాలు ఉన్నాయి. వీటిలో అన్నింటికంటే ప్రీమియం, అత్యంత ఖరీదైనది భారతదేశానికి చెందినదేనని మీకు తెలుసా..? ఈ కుంకుమ పువ్వు ఖరీదు తెలిస్తే బాబోయ్ అని గుండెలు బాదుకుంటారు.. ప్రపంచంలోనే అత్యంత ఖరీదైన కేసర్ రకాలు.. వాటి ధరలు ఎంతో ఇక్కడ చూద్దాం..
భారతీయ వంటకాల్లో సుగంధ ద్రవ్యాలకు ప్రత్యేక స్థానం ఉంది. అయితే, వాటన్నింటిలోకి అత్యంత ఖరీదైనది, విలాసవంతమైనది ఏది అంటే ఎవరైనా వెంటనే కేసర్ (కుంకుమపువ్వు) అని చెబుతారు. అందుకే దీనిని రెడ్ గోల్డ్ లేదా ఎర్ర బంగారం అని కూడా పిలుస్తారు. కేసర్ను కేవలం వంటకాల్లో మంచి రంగు, సువాసన కోసమే కాకుండా.. ప్రాచీన వైద్యంలో, ఆధునిక ఔషధాలలో, సౌందర్య సాధనాల తయారీలో విస్తృతంగా ఉపయోగిస్తున్నారు. అయితే, మార్కెట్లో లభించే అన్ని కేసర్లు ఒకే రకమైనవి కావు. వాటి నాణ్యత, సాగు చేసే ప్రాంతం ఆధారంగా వాటి ధరలు మారుతుంటాయి. ప్రపంచంలోనే అత్యంత ప్రసిద్ధి చెందిన, ఖరీదైన కేసర్ రకాల గురించి ఇప్పుడు తెలుసుకుందాం.
కాశ్మీరీ మోంగ్రా కేసర్ (భారతదేశం): ప్రపంచంలోనే అత్యుత్తమ నాణ్యత కలిగిన అత్యంత ఖరీదైన కేసర్గా భారతదేశానికి చెందిన కాశ్మీరీ మోంగ్రా కేసర్ గుర్తింపు పొందింది. కాశ్మీర్ లోని పంపోర్ ప్రాంతంలో ఇది పండుతుంది. ఈ కేసర్ పువ్వు మధ్యలో ఉండే కేవలం ముదురు ఎరుపు రంగు భాగాన్ని మాత్రమే వేరు చేసి దీనిని సేకరిస్తారు. ఇందులో ఎలాంటి పసుపు రంగు కాడలు ఉండవు కాబట్టి ఇది అత్యంత స్వచ్ఛమైనదిగా పరిగణించబడుతుంది. భారత మార్కెట్లో దీని ధర కిలో రూ. 2,50,000 నుండి రూ. 3,00,000 వరకు పలుకుతుంది. ముఖ్యంగా స్విట్జర్లాండ్ వంటి అంతర్జాతీయ మార్కెట్లలో దీనికి ఉన్న విపరీతమైన డిమాండ్ కారణంగా విదేశాలలో ఇది కిలో ఏకంగా రూ. 5,00,000 వరకు అమ్ముడవుతుంది.
ఇరాన్ శర గోల్ కేసర్ (Sargol Saffron): ప్రపంచవ్యాప్తంగా సరఫరా అయ్యే కేసర్లో అత్యధిక శాతం ఇరాన్ నుంచే వస్తుంది. ఇరాన్కు చెందిన శర గోల్ రకం కేసర్ కూడా ఎరుపు రంగు దారాలను మాత్రమే కలిగి ఉంటుంది. ఇది మంచి సువాసన, రంగును ఇస్తుంది. అయినప్పటికీ, నాణ్యత, ఔషధ గుణాల పరంగా చూస్తే ఇది కాశ్మీరీ కేసర్ కంటే కొద్దిగా తక్కువగా పరిగణించబడుతుంది. అందువల్ల దీని ధర కాశ్మీరీ కేసర్ కంటే తక్కువగా ఉంటుంది.
స్పానిష్ లా మంచా కేసర్ (Spain): యూరప్ ఖండంలో అత్యంత ఖరీదైన కేసర్గా స్పెయిన్కు చెందిన లా మంచా కేసర్ గుర్తింపు పొందింది. దీనిని ప్రత్యేకమైన పద్ధతిలో పొగబెట్టి ఆరబెడతారు. దీనివల్ల దీనికి ఒక ప్రత్యేకమైన సువాసన వస్తుంది. యూరోపియన్ వంటకాల్లో, ముఖ్యంగా రాయల్ డిషెస్లో దీనిని ఎక్కువగా ఉపయోగిస్తుంటారు.
ధర ఎందుకు అంత ఎక్కువగా ఉంటుంది?: కేసర్ పువ్వులు (Crocus sativus) సంవత్సరంలో కేవలం కొన్ని రోజులు మాత్రమే వికసిస్తాయి. ఒక కిలో స్వచ్ఛమైన కేసర్ను తయారు చేయడానికి సుమారు 1,10,000 నుండి 1,70,000 పువ్వుల అవసరం ఉంటుంది. ఈ పువ్వుల నుండి కేసర్ దారాలను కేవలం చేతులతో మాత్రమే ఎంతో సున్నితంగా వేరు చేయాలి. ఈ విధమైన కఠినమైన శ్రమ, తక్కువ దిగుబడి కారణంగానే కేసర్ ప్రపంచంలోనే అత్యంత ఖరీదైన మసాలా దినుసుగా నిలిచింది.